រាជធានីភ្នំពេញ ៖ នៅទីបំផុតការប្រកួតជម្រុះក្នុងវគ្គ២ទម្លាក់ពីជើងខ្លាំង១៦នាក់យក៨នាក់ បានដំណើរការចប់សប្ដាហ៍ទី៤ហើយ កាលពីថ្ងៃទី៣១ មីនា មុននេះ ដោយកីឡាករដែលឈ្នះក្នុងវគ្គ១៦នាក់ចំនួន៤រូបបានឡើងប្រកួតជម្រុះគ្នាបន្តទៀត ។ យ៉ាងណាមិញ សម្រាប់កីឡាករបង្គោលក្រហម សង គង់ ដែលដណ្ដើមបានកៅអី៨នាក់ដើម្បីទៅប្រកួតនៅក្នុងវគ្គបន្តនោះ ត្រូវបានគេដឹងថាបានឈ្នះគូប្រកួតយ៉ាងមានកិត្តិយស តែលោកបែរជាប្រកាសថាគឺជារឿងចៃដន្យ និងមិននឹកស្មានដល់ បើទោះជាកីឡាកររូបនេះ បានអះអាងថាខ្លួនឡើងអង្គុយកៅអីលេខរៀងទី៧នោះទាំងលំបាកមិនងាយស្រួល។
យោងតាមលទ្ធផលដែលបានស្ដែងឡើង កីឡាករវ័យក្មេងជើងខ្លាំង សង គង់ បានទម្លាក់គូប្រកួតឱ្យធ្លាក់ហាលអាវគួរឱ្យភ្ញាក់ផ្អើល នៅក្នុងរូបភាពឈ្នះដោយកិត្តិយស ដែលខុសពីការប្រកួតបង្គ្រប់កិច្ចរបស់ យុគ យក្សផ្លែ កាលពីសប្ដាហ៍មុន ។ កាលពីអាទិត្យមុន គណៈកម្មការបានប្រកាសរួចជាស្រេចថា យុគ យក្សផ្លែ នឹងឈ្នះដោយមិនចាំបាច់ត្រួតពិនិត្យលទ្ធផល តែតម្រូវឱ្យអ្នកទាំងពីរនៅតែប្រកួតគ្នាដដែល ដើម្បីកុំឱ្យខូចម៉ោងដែលត្រូវដាក់ផ្សាយបន្តផ្ទាល់ ដោយសារតែកីឡាករ នឹម នន ជាគូប្រកួតមិនថែរក្សាខ្លួន ហើយបណ្ដោយឱ្យលើសគីឡូដែលបានកំណត់រហូតដល់ជិត៥គីឡូ ដែលធ្វើឱ្យកីឡាករនឹម នន ត្រូវបានគណៈកម្មការប្រកាសមិនឱ្យឈ្នះទៅវគ្គបន្ត បើទោះជាគេអាចមានសមត្ថភាពធ្វើឱ្យយុគ យក្សផ្លែ បរាជ័យក្តី។
ការប្រកួតនាគ្រានោះ មានការកត់សម្គាល់ថាការបរាជ័យរបស់ នឹម នន គឺជាការបរាជ័យមួយដែលខុសប្លែកពីគេ ចាប់តាំងពីការប្រកួតមួយនេះត្រូវបានធ្វើឡើងនៅប៉ុស្ដិ៍លេខ៥ ប៉ុន្តែម្នាក់ៗក៏ស្ដាយកីឡាករនឹម នន ផងដែរ ដែលគេគឺជាកីឡាករល្អ បែរជាបណ្ដោយខ្លួនឱ្យឡើងទម្ងន់លើសពីគីឡូ៥៧ដែលបានកំណត់ដោយក្រុមអ្នកបច្ចេកទេស ។ អ្នកទាំងពីរ ប្រកួតគ្នានៅក្នុងថ្ងៃនោះ បើគ្មានការប្រកាសជាមុនថានឹងឱ្យកីឡាករ យុគ យក្សផ្លែ ទទួលបានជ័យជម្នះដោយស្វ័យប្រវត្តិ គឺមិនមានអ្នកណាស្មានថាកីឡាករូបនេះ នឹងឈ្នះដោយស្រួលនោះទេ ដោយសារតែគូប្រកួតរបស់គេក៏មិនធម្មតាតាំងពីក្នុងវគ្គ៣២នាក់ ឡើងមកកាន់កៅអី១៦នាក់ ។
គាប់ជួនជាយុគ យក្សផ្លែ ក៏ប្រកួតធ្លាក់ដៃសម្រាប់ការប្រកួតនាពេលកន្លងមកផង ទើបកាន់តែគ្មានអ្នកជឿថាគេធ្វើបានសម្រាប់ការប្រកួតដ៏តឹងតែងនោះ ។ ជាងពាក់កណ្ដាលអ្នកទៅទស្សនាដោយផ្ទាល់ សុទ្ធតែមានការភ្ញាក់ផ្អើលក្រោយពីមានការប្រកាសនៅត្រង់ចំណុចនោះ ហើយម្នាក់ៗក៏មានអារម្មណ៍សោកស្ដាយមិនតិចដែរ បន្ទាប់ពីកីឡាករល្អម្នាក់ បែរជាត្រូវប្រកាសថាចាញ់ដោយស្វ័យប្រវត្តិ ព្រោះតែហេតុផលដែលគេមិនចេះរក្សាទម្ងន់ខ្លួនរបស់គេឱ្យត្រូវនឹងកម្មវិធីដែលបានកំណត់ ដើម្បីឱ្យបានដឹងថា បើការប្រកួតមួយនេះមិនខុសពីលក្ខន្តិកៈ តើនឹងល្អមើលកម្រិតណា? គ្រប់គ្នាសុទ្ធតែមានការលើកឡើងថា កីឡាករ យុគ យក្សផ្លែ មានឱកាសបានឈ្នះការប្រកួតដោយស្រួល គឺព្រោះតែគេសំណាងបានប៉ះកីឡាករជាគូប្រកួត មិនគោរពតាមអ្វីដែលបានគ្រោងទុកប៉ុណ្ណោះ ប៉ុន្តែបើឱ្យប្រកួតត្រឹមត្រូវគឺមិនអាចនោះទេ គឺពិតជាកីឡាករម្ខាងទៀតប្រឹងវាយខ្ចប់ៗជាមិនខាននោះទេ ថ្វីដ្បិតថាកីឡាករយុគ យក្សផ្លែ ធ្លាប់មានបទពិសោធន៍ប្រកួតបានច្រើនជាងយ៉ាងណាក៏ដោយ ។
ងាកមកមើលលទ្ធផលកីឡាករ សង គង់ គេទទួលបានជ័យជម្នះមិនដូចគ្នាទេ ដោយសារតែគេប្រឹងប្រកួតខ្លាំងណាស់ទម្រាំអាចផ្ដួលកីឡាករផាន់ ពិសិដ្ឋ ដែលធ្លាប់មានឈ្មោះបោះសំឡេង និងជាអ្នកឈ្នះក្នុងវគ្គ១៦នាក់ឱ្យបរាជ័យបាន។ ការប្រកួតរវាងកីឡាករទាំងពីរ ម្នាក់ៗនិយាយថាមានការចាប់អារម្មណ៍យ៉ាងខ្លាំង ហើយក៏ធ្វើឱ្យអ្នកទស្សនាបុកពោះពិបាកប៉ាន់ស្មានដឹងពីលទ្ធផលផងដែរ ដោយសារតែម្នាក់ៗសុទ្ធតែប្រឹងរៀងខ្លួន ហើយជាពិសេស ផាន់ ពិសិដ្ឋ ក៏ជំហររឹង ។ ការប្រកួតមួយនេះ នៅទឹកទី២ កាន់តែធ្វើឱ្យម្នាក់ៗកញ្ជ្រោល និងមានការចាប់អារម្មណ៍ ដោយសារតែកីឡាករ ផាន់ ពិសិដ្ឋ ត្រូវបានភាគីម្ខាងទៀតវាយត្រូវខ្ចប់ៗ ហើយហាក់ដូចជាស៊យមួយពេលក្នុងពេលដែលគេចេញស្ដាំក៏ខុសចេញឆ្វេងក៏ខុស ហើយភ្លាត់ឱ្យកីឡាករ សង គង់ មានប្រៀបល្អជាង ។
កីឡាកររូបនេះ ក្រោយពីប្រកាសថាឈ្នះពិន្ទុ បានធ្វើឱ្យគេត្រេកអរយ៉ាងខ្លាំង ហើយអ្វីដែលគេចាប់អារម្មណ៍ គឺកីឡាករប្រាប់ថាជារឿងមិននឹកស្មានដល់ ។ ពេញរយៈពេល៣ទឹក ដ្បិតថាកីឡាករ សង គង់ មិនបានឈ្នះដាច់ ប៉ុន្តែគេក៏មានឱកាសវាយត្រូវបានច្រើនមិនធម្មតាផងដែរ សម្រាប់ការប្រកួតទាំងមូល ដោយអ្នកទស្សនាក៏មើលឃើញដូចគ្នាថានោះជារឿងសំណាងដោយសារតែភ្លាត់វាយត្រូវភាគីម្ខាងទៀត បណ្ដាលឱ្យគេបាក់ជំហរហើយទើបជាហេតុធ្វើឱ្យកីឡាកររូបនេះ កាន់តែមានឱកាសបន្ថែមទៀត។
កីឡាករ សង គង់ និយាយថា លោកមិននឹកស្មានថាការប្រកួតនៅក្នុងថ្ងៃនោះ ទទួលបានជោគជ័យសម្រាប់ខ្លួនទេ ដោយសារតែលោកក្នុងពេលឡើងប្រកួតគឺមិនមានទំនុកចិត្តតែម្ដង នៅពេលប៉ះជាមួយកីឡាករ ផាន់ ពិសិដ្ឋ ជាជើងខ្លាំង ។ លោកថា ក្នុងពេលបើកប្រកួតនោះ លោកគ្រាន់តែមានអារម្មណ៍ថាចេះតែវាយៗទៅ ហើយអត់ដឹងថាខ្លួននឹងឈ្នះនោះទេ ដោយសារតែលោកមិនចេះមើលពីការផ្ដល់ពិន្ទុ ហើយការប្រកួតទៀតសោត ក៏វាយឱ្យតែបានច្រើន ដោយគ្រាន់តែចងចាំត្រូវវាយឱ្យបានច្រើន គឺទោះជាត្រូវចំកន្លែងណាក៏មិនសំខាន់ សំខាន់គឺវាយបានច្រើន ហើយកុំឱ្យគូប្រកួតវាយត្រូវមកវិញធ្វើឱ្យខ្លួនពិបាក ។ លោកថា សប្បាយចិត្តដែលបានទទួលជ័យជម្នះ ហើយលោកនឹងប្រឹងហ្វឹកហាត់ឱ្យបានច្រើនទៀត ដោយមិនបណ្ដោយឱ្យឱកាសដែលបានឈានឡើងនឹងបរាជ័យដោយភាពអាម៉ាស់នោះទេ បើទោះជាលោកមិនទាន់ច្បាស់នឹងអាចឆ្លងផុតក្នុងវគ្គថ្មីទៀត គឺជម្រុះយក៤នាក់នោះ។
លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥ និយាយថា ការប្រកួតទាំងមូលមិនអាចកំណត់ថាអ្នកធ្លាប់ខ្លាំងធ្លាប់ល្បី នឹងឈ្នះនោះទេ ដោយសារទ្រឹស្ដីកីឡាគឺអ្នកណាលឿនជាង រហ័សជាង និងខ្ពស់ជាងគឺឈ្នះ ។ បើទោះជាកីឡាករ សង គង់ បានអះអាងថាខ្លួនបានឈ្នះដោយមិនមានទំនុកចិត្ត ប៉ុន្តែលោកនៅតែអះអាងថា គេប្រកួតដោយសមត្ថភាពហើយមានបច្ចេកទេសល្អនៅក្នុងថ្ងៃនោះ ។ លោកថា កីឡាករទាំងអស់នឹងកាន់តែបញ្ចេញសមត្ថភាពបានល្អខ្លាំងឡើងចាប់ពីវគ្គនេះទៅ ដោយសារតែការប្រកួតសុទ្ធតែមិនមានអ្នកចង់ចាញ់ អ៊ីចឹងហើយទើបលោកប្រកាសឱ្យកីឡាករល្បី
ឈ្មោះដែលមើលស្រាលការប្រកួតត្រូវប្រឹងប្រែងហ្វឹកហាត់ជាថ្មី ដើម្បីកុំឱ្យធ្លាក់ហាលអាវខ្មាសគេ ៕
ចែករំលែកព័តមាននេះ