ខេត្តក្រចេះ ៖ គ្រាប់យុទ្ឋភ័ណមិនផ្ទុះមួយគ្រាប់ដែលសមត្ថកិច្ចសន្និដ្ឋានថា ជាគ្រាប់ ប្រភេទ M79 សេសសល់យូរឆ្នាំមកហើយបានផ្ទុះលាន់កក្រើកដីក្នុងព្រៃចម្ការមួយកន្លែង និង បានបង្កឲ្យបុរសជាអ្នកចម្ការម្នាក់រងរបួសធ្ងន់ ។
ការផ្ទុះគ្រាប់នេះត្រូវបាននរបាលស្រុកស្នួលប្រាប់ឲ្យដឹងថា បានបង្កឡើងកាលពីរសៀល ថ្ងៃទី១ ខែមេសា ឆ្នាំ២០១៨ នៅក្នុងព្រៃចម្ការមួយកន្លែង ក្នុងឃុំឃ្សឹម ស្រុកស្នួល នៅពេលដែលជនរងគ្រោះឈ្មោះ ផល្លា ធឿន អាយុ២៧ឆ្នាំ កំពុងតែកាត់ស្មៅ ។ ជនរងគ្រោះត្រូវបានរងរបួសធ្ងន់ធ្ងរចំក្បាល និងជើងសុះសាច់ដោយសារអំបែកគ្រាប់ខ្ទាតត្រូវ ។ ហើយក៏ត្រូវបាននគរបាល និងក្រុមគ្រួសារចាត់បញ្ជូនទៅសង្គ្រោះ ។
នគរបាលបានឲ្យដឹងថា ទំនងជាជនរងគ្រោះបានប្រើម៉ាស៊ីនកាត់ស្មៅចម្ការ ប៉ះចំពីលើ គ្រាប់មិនទាន់ផ្ទុះដែលកប់ក្នុងដីក៏បណ្តាលឲ្យផ្ទុះតែម្តង ។ ករណីផ្ទុះគ្រាប់យុទ្ឋភ័ណមិនទាន់ផ្ទុះ ត្រូវគេមើលឃើញថាបានកើតមានជាញឹកញាប់នាពេលថ្មីៗនេះ និងបង្កឲ្យពលរដ្ឋនៅស្រុកស្នួលជាច្រើននាក់ខ្លះស្លាប់ ខ្លះរងរបួសពិការ ដោយសារតែរងការផ្ទុះ ខណៈដែលស្រុកនៅតំបន់ប៉ែកឥសាន្តមួយនេះក៏ប្រឈមនឹងរបប សង្គ្រាមធ្ងន់ធ្ងរកាលសម័យរបបខ្មែរក្រហម ។ ហើយរហូតមកទល់និងសព្វថ្ងៃនេះ ការផ្ទុះគ្រាប់ យុទ្ឋភ័ណ គឺនៅតែគំរាមកំហែងអាយុជីវិតពលរដ្ឋនៅស្រុកស្នួលជាហូរហែរ បើទោះបីជាមាន ការរុករកពីក្រុមមន្ត្រីជំនាញតែការរុករកក៏នៅមិនទាន់អស់នៅឡើយទេ ៕
ចែករំលែកព័តមាននេះ