រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មអះអាងថា ទុនវិនិយោគរបស់ចិនចូលមកកម្ពុជា មានទឹកប្រាក់ប្រមាណជាង១៤ប៊ីលានដុល្លារ កើនឡើង២៧% បើធៀបនឹងឆ្នាំ២០១៦ ។ ថ្លែងក្នុងពិធីបើកសម្ពោធពិព័រណ៍ពាណិជ្ជកម្មកម្ពុជា ចិន-អាស៊ាន…
រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មអះអាងថា ទុនវិនិយោគរបស់ចិនចូលមកកម្ពុជា មានទឹកប្រាក់ប្រមាណជាង១៤ប៊ីលានដុល្លារ កើនឡើង២៧% បើធៀបនឹងឆ្នាំ២០១៦ ។
ថ្លែងក្នុងពិធីបើកសម្ពោធពិព័រណ៍ពាណិជ្ជកម្មកម្ពុជា ចិន-អាស៊ាន កាលពីថ្ងៃទី៣០ មីនា នៅមជ្ឈមណ្ឌលពិព័រណ៍កោះពេជ្រ លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា ៖« ប្រទេសចិនបានឈរលំដាប់លេខរៀងទី១ នៅកម្ពុជាកាលពីឆ្នាំ២០១៧ ជាមួយទំហំទឹកប្រាក់វិនិយោគមានចំនួនប្រមាណ១៤,៣ប៊ីលានដុល្លារ ឬស្មើ២៧%នៃទឹកប្រាក់វិនិយោគពីបរទេសសរុប ។
ចំនួននេះបានកើនឡើងស្ទើរពាក់កណ្ដាលបើធៀបនឹងឆ្នាំ២០១៦ ដែលមានត្រឹមតែ៧៤៨លានដុល្លារអាមេ រិកប៉ុណ្ណោះ » ។
លោករដ្ឋលេខាធិការបន្តថា ៖« កំណើនវិនិយោគរបស់ចិន បានសម្រួលដល់ការធ្វើពិពិធកម្មវិស័យការងារសម្រាប់ប្រជាជន និងកំណើនសេដ្ឋកិច្ច ដោយសារគម្រោងចិនភាគច្រើន ផ្តោតសំខាន់លើវិស័យសំណង់ កសិកម្ម ថាមពល ឧស្សាហកម្មកាត់ដេរ ធនាគារ និងហិរញ្ញវត្ថុ ទូរគមនាគមន៍ និងទេសចរណ៍ ដែលជាសសរស្តម្ភសំខាន់ៗនៃសេដ្ឋកិច្ច » ។
បើតាមលោករដ្ឋលេខាធិការ ក្រៅពីកំណើនទឹកប្រាក់វិនិយោគ ស្ថានភាពពាណិជ្ជកម្មទ្វេភាគីរវាងចិន និងកម្ពុជា នៅក្នុងឆ្នាំ២០១៧ មានវឌ្ឍនភាពល្អប្រសើរ ដែលពាណិជ្ជកម្មនៃប្រទេសទាំងពីរសម្រេចបានដល់៥.៧៩០លានដុល្លារ ពោលគឺបានកើនឡើង២១,៧% បើធៀបនឹងឆ្នាំ២០១៦ ។ ទន្ទឹមគ្នានេះ ភ្ញៀវទេសចរចិនដែលបានចូលមកកម្ពុជាកាលពីឆ្នាំ២០១៧ មានចំនួន១២១ម៉ឺននាក់ គឺបានកើនឡើងជិត៤៦% បើធៀបនឹងឆ្នាំ២០១៦ដូចគ្នា ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting មានប្រសាសន៍កាលពីថ្ងៃទី១ មេសា ម្សិលមិញថា ៖« ចិនជាប្រទេសដែលមានប្រជាជនច្រើន គាត់ត្រូវការផ្គត់ផ្គង់ផលិតផលច្រើនទៅលើវិស័យកសិកម្ម ។ អីចឹងកម្ពុជាក្លាយជាប្រទេសមានសក្តានុពលក្នុងការផ្គត់ផ្គង់កសិកម្មទាំងអស់ទៅប្រទេសចិន ជាហេតុធ្វើឱ្យវិនិយោគិនចិនច្រើនសម្លឹងឃើញកម្ពុជា » ។
បើតាមលោក ង៉ែត ជូ ប្រទេសចិនក្រៅពីមើលឃើញកម្ពុជាមានសក្តានុពលលើវិស័យកសិកម្ម គឺនៅមើលឃើញផលចំណេញពីវិស័យអចលនទ្រព្យ និងសំណង់ រួមជាមួយនឹងយុទ្ធសាស្ត្រផ្លូវ១ ខ្សែក្រវាត់១ ថែមទៀត ។
លោកបន្តថា ៖« អ្នកវិនិយោគរបស់ចិន គាត់នៅមើលឃើញការទទួលបានផលចំណេញខ្ពស់ក្នុងរយៈពេលខ្លីទៅលើផ្នែកអចលនទ្រព្យ និងសំណង់ រួមនឹងផ្នែកមួយនៃយុទ្ធសាស្ត្រ ផ្លូវ១ ខ្សែក្រវាត់១ ថែមទៀតផង » ។
លោកលើកឡើងថា ៖« ជាទូទៅ ការធ្វើជំនួញរបស់ចិន ហាក់មានលក្ខណៈផ្លូវកាត់ច្រើន មានន័យថា គាត់អត់សូវមានក្បួនខ្នាតអី ទាមទារមានភាពច្បាស់លាស់ ឬសិក្សាស៊ីជម្រៅនោះទេ ។ ចិនគេអាចធ្វើបាន គេធ្វើ អីចឹង ប្រទេសផ្សេងៗទៀតដូចជា ពួកអឺរ៉ុប ឬប្រទេសផ្សេងទៀតដែលវិនិយោគត្រូវការសិក្សាច្បាស់លាស់ ដែលពិបាកប្រកួតប្រជែងជាមួយចិន » ៕
ចែករំលែកព័តមាននេះ