រាជធានីភ្នំពេញ៖ បុរសម្នាក់សង្ស័យស្រវឹងស្រា បានជិះម៉ូតូ១គ្រឿងក្នុងល្បឿនលឿន ជែងរថយន្តលាយបេតុងមួយគ្រឿងហើយពេលទៅដល់ត្រង់ចំណុចផ្លូវខ្វែងបានជ្រុលទៅបុកពីក្រោយរថយន្តដឹកជ្រូក១គ្រឿងចំកាងបណ្ដាលឲ្យទាក់ដៃចង្កូតជាមួយកាងរថយន្តនោះអូសជាច្រើមម៉ែត្ររងរបួសធ្ងន់ធ្ងរ។ បន្ទាប់មកត្រូវប្រជាពលរដ្ឋជួយហៅរថយន្តសង្គ្រោះដឹកបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ភ្លាមៗ ចំណែកអ្នកបើកបររថយន្តដឹកជ្រូកត្រូវបាននគរបាលឃាត់ខ្លួនចាត់ការតាមច្បាប់។ ឧប្បត្តិហេតុគ្រោះថ្នាក់ចរាចរណ៍មួយនេះបានកើតឡើង កាលពីវេលាម៉ោង៣ និង៥០នាទីរសៀល ថ្ងៃទី១ មេសា ឆ្នាំ២០១៨ នៅលើកំណាត់ផ្លូវព្រៃស ស្ថិតនៅក្នុងភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ។
នគរបាលបានឲ្យដឹងថាបុរសរងគ្រោះខាងលើមិនទាន់ត្រូវបានស្គាល់ឈ្មោះនៅឡើយទេ គាត់ជិះម៉ូតូ១គ្រឿងម៉ាកស៊ុយហ្ស៊ុយគីស្មាស់វី ១គ្រឿងពណ៌ខ្មៅ ពាក់ស្លាកលេខ ភ្នំពេញ1BN-7286។ ចំណែករថយន្តដឹកជ្រូក ពណ៌សលាយខៀវ ពាក់ស្លាកលេខ ភ្នំពេញ 3E-0012 បើកបរដោយបុរសម្នាក់ឈ្មោះ ឆន រាជ អាយុ២៨ឆ្នាំ មានទីលំនៅក្នុងភូមិកណ្ដាល ឃុំវល្លិ៍ស ស្រុកសំរោងទង ខេត្តកំពង់ស្ពឺ។ ប្រភពដដែលបានបន្តទៀតថា គ្រោះថ្នាក់នេះបានកើតឡើងព្រោះតែ ជនរងគ្រោះស្រវឹងស្រា ហើយភាគីទាំងសងខាងខ្វះការបប្រុងប្រយ័ត្ន មិនបានបន្ថយល្បឿន នៅចំណុចផ្លូវខ្វែង។
ដោយឡែកនៅមុនពេលកើតហេតុបុរសរងគ្រោះខាងលើ បានជិះម៉ូតូធ្វើដំណើរក្នុងទិសដៅពីលិចទៅកើតក្នុងល្បឿនលឿន និងស្ថិតក្នុងស្ថានភាពស្រវឹងផងបានជែងរថយន្តដឹកស៊ីម៉ង់ត៍១គ្រឿងដែលកំពុងបើបរនៅខាងមុខ ដោយមិនបានដឹងថាមើលមុខមើលក្រោយនោះឡើយ។ ប្រភពដដែលបានបន្តទៀតថា ខណៈនោះក៏បានជ្រុលទៅបុកពីក្រោយរថយន្តដឹកជ្រូកចំកាងក្នុងពេលដែលរថយន្តនេះកំពុងបើកបរក្នុងទិសដៅពីជើងទៅត្បូងក្នុងល្បឿនលឿនដែរ។ ដែលជាហេតុធ្វើឲ្យដៃចង្កូតម៉ូតូទាក់ជាមួយកាងរថយន្តអូសជាច្រើនម៉ែត្របណ្ដាលឲ្យបុរសនោះរងរបួសធ្ងន់តែម្ដងបន្ទាប់មកត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗ ចំណែកអ្នកបើកបររថយន្តត្រូវបានឃាត់ខ្លួននាំទៅសាកសួរ និងកសាងសំណុំរឿងចាត់ការតាមច្បាប់៕
https://youtu.be/RsampI_amt8
ចែករំលែកព័តមាននេះ