ចិន ៖ តាមប្រភពព័ត៌មាន Oddity Central បានឲ្យដឹងថា ស្ត្រីអាយុខ្ទង់៥០ឆ្នាំម្នាក់ ត្រូវបានគ្រូពេទ្យរកឃើញថា មានជំងឺក្រិនថ្លើមដោយសារតែទម្លាប់លាបថ្នាំសក់ជារៀងរាល់ខែអស់រយៈពេលជាង១០ឆ្នាំ។
អ្នកស្រី Chen ចាប់ផ្តើមលាបសក់តាំងពីគាត់ឡើងស្កូវក្បាលនៅអាយុ៤០ឆ្នាំ។ សក់របស់គាត់ចេះតែឆាប់ឡើងសពេក ទើបគាត់ចេះតែទៅឲ្យគេលាបសក់ជារៀងរាល់ខែ។ ការធ្វើបែបនេះ គឺអស់រយៈពេលជាង១០ឆ្នាំហើយ។
កាលពី២ខែមុន គាត់ក៏ចាប់ផ្តើមមានអារម្មណ៍ហត់ខុសប្លែកពីធម្មតា។ ប្តីគាត់ឃើញស្បែកឡើងលឿង ទើបបញ្ជូនគាត់មកមន្ទីរពេទ្យខាងផ្នែកជំងឺឆ្លងនៅ Harbin។ គ្រូពេទ្យរកឃើញថាសារធាតុប៊ីលីរូប៊ីន ដែលមាននៅក្នុងថ្លើម មានការកើនឡើងក្នុងឈាមគុណនឹង១០។ ក្រោយពីបានដឹងថា អ្នកស្រី Chen មិនដែលផឹកស្រា ឬញ៉ាំថ្នាំអ្វីផ្តេសផ្តាសទេនោះ ក្រៅពីលាបសក់ពណ៌ជារៀងរាល់ខែ គ្រូពេទ្យក៏សន្និដ្ឋានថា វាមកពីសារធាតុគីមីនៅក្នុងថ្នាំលាបសក់។ ក្រោយពីឲ្យថ្នាំបាន២០ថ្ងៃរួចមក អ្នកស្រី Chen ក៏បានធូរ។ តែសារធាតុគីមីនៅក្នុងខ្លួនមិនទាន់អស់នៅឡើយទេ ហើយសាច់ថ្លើមក៏មិនអាចដូចដើមដែរ។
សារធាតុគីមីទាំងនោះមានដូចជា Nitrobenzene និង Aniline។ គ្រូពេទ្យបានណែនាំថា ប្រសិនបើចង់លាបសក់ យើងគួរតែប្រើប្រាស់ថ្នាំដែលចម្រាញ់យកពីដើមឈើធម្មជាតិ។ តែប្រសិនបើរកមិនបានទេ យើងអាចលាបថ្នាំគីមីបាន តែសូមលាបយ៉ាងច្រើន៦ខែម្តង៕
ចែករំលែកព័តមាននេះ