បណ្តាប្រទេសលោកខាងលិច-ប្រទេសរុស្ស៊ី ៖ បណ្តាប្រទេសលោកខាងលិច និងអូតង់ បានបណ្តេញអ្នកការទូតរុស្ស៊ី១៥០នាក់ ជាការសងសឹកវិញ រុស្ស៊ីក៏បណ្តេញអ្នកការទូតរបស់ពួកគេក្នុងចំនួនប្រហាក់ប្រហែលគ្នា ។ គឺអង់គ្លេសជាអ្នកនាំអាទិ៍មុនដោយនាថ្ងៃទី១៤ មីនា…
បណ្តាប្រទេសលោកខាងលិច-ប្រទេសរុស្ស៊ី ៖ បណ្តាប្រទេសលោកខាងលិច និងអូតង់ បានបណ្តេញអ្នកការទូតរុស្ស៊ី១៥០នាក់ ជាការសងសឹកវិញ រុស្ស៊ីក៏បណ្តេញអ្នកការទូតរបស់ពួកគេក្នុងចំនួនប្រហាក់ប្រហែលគ្នា ។
គឺអង់គ្លេសជាអ្នកនាំអាទិ៍មុនដោយនាថ្ងៃទី១៤ មីនា បានសម្រេចបណ្តេញអ្នកការទូតរុស្ស៊ីចេញ២៣នាក់ ក្រោយការបំពុលក្នុងប្រទេសនេះអតីតចារបុរសរុស្ស៊ីលោក SERGUEI SKRIPAL និងកូនស្រីគេនៅប្រទេសរបស់ខ្លួន ។ នាចុងខែមីនាប្រទេសលោកខាងលិចឯទៀតៗ រួមទាំងអ៊ុយក្រែន និងអូតង់បានប្រកាសបណ្តេញពួកអ្នកការទូតរុស្ស៊ីជាការសម្តែងសាមគ្គីភាពជាមួយក្រុងឡុងដ៍ ។ មកទល់ពេលនេះអ្នកការទូតរុស្ស្ស៊ីជាង១៥០នាក់ ត្រូវបណ្តេញចេញ ។ ជាការសងសឹកវិញក្រុងមូស្គូបានចាត់វិធានការប្រហាក់ប្រហែលគ្នាចំពោះពួកអ្នកការទូតលោកខាងលិច ។ សរុបអ្នកការទូតជិត៣០០នាក់ទាំងសងខាងត្រូវបណ្តេញចេញ ។
នៅសហរដ្ឋអាមេរិកសេតវិមានប្រកាសថា «ចារបុរស» រុស្ស៊ី៦០នាក់ត្រូវចាកចេញពីដែនដីអាមេរិក ។ នាថ្ងៃទី៣១ មីនា បុរសនារី និងកុមារប្រមាណ៥០នាក់គេឃើញចាកចេញពីស្ថានទូតរុស្ស៊ីប្រចាំក្រុងវ៉ាស៊ីនតោនតាមរថយន្តបឺសមួយគ្រឿងទៅព្រលានយន្តហោះ។ សរុបមនុស្ស១៧១នាក់ត្រូវចាកចេញពីអាមេរិក ។ យោងតាមអ្នកទទួលខុសត្រូវជាន់ខ្ពស់អាមេរិកមួយរូបថា ក្នុងចំណោមអ្នកការទូតទាំងនេះ៤៨នាក់ជាភ្នាក់ងារស៊ើបការណ៍ក្នុងស្ថានបេសកកម្មរុស្ស៊ីផ្សេងៗនៅសហរដ្ឋអាមេរិក ហើយ១២នាក់ជាសមាជិកនៃស្ថានបេសកកម្មរុស្ស៊ីប្រចាំ អ.ស.ប ។ អ្នកទទួលខុសត្រូវអាមេរិកមួយរូបទៀតនិយាយថា នេះជាការចាប់បណ្តេញពួកភ្នាក់ងារស៊ើបការណ៍រុស្ស៊ីក្នុងចំនួនយ៉ាងច្រើនជាប្រវត្តិសាស្ត្រ ។
ម្យ៉ាងទៀត ស្ថានកុងស៊ុលរុស្ស៊ីនៅក្រុង SEATTLE ត្រូវបិទទ្វារ ។ រុស្ស៊ីបន្ទាប់ពីចំណាត់ការអាមេរិកបានបណ្តេញអ្នកការទូតអាមេរិក៦០នាក់វិញដែរ ព្រមទាំងបិទស្ថានកុង
ស៊ុលអាមេរិកនៅក្រុងសាំងប៉េទ័រស្បួរ ។ សហរដ្ឋអាមេរិកនិយាយថា រក្សាសិទ្ធិតបតវិញ ដោយពិនិត្យលើការជ្រើសរើសជាច្រើន ។
បន្ទាប់ពីអង់គ្លេស ប្រទេសអឺរ៉ុប១៨បានចេញបញ្ជាឱ្យបណ្តេញអ្នកការទូតរុស្ស៊ីជាង៣០នាក់គឺអាល្លឺម៉ង់បណ្តេញ៤នាក់ បារាំង៤នាក់ ប៉ូឡូញ៤នាក់ លីទុយអានី៣នាក់ សាធារណរដ្ឋឆេក៣នាក់ អេស្ប៉ាញ២នាក់ អ៊ីតាលី២នាក់ ហូឡង់២នាក់ ដាណឺម៉ាក់២នាក់ ស៊ុយអែតម្នាក់ ឡេតូនីម្នាក់ រូម៉ានីម្នាក់ ក្រូអាស៊ីម្នាក់ ហ្វាំងឡង់ម្នាក់ អេស្តូនីម្នាក់ ហុងគ្រីម្នាក់ អៀរឡង់ម្នាក់ បែលហ្ស៊ិកម្នាក់ ។
ប្រធានក្រុមប្រឹក្សាអឺរ៉ុបលោក DONALD TUSK គូសបញ្ជាក់ថា បណ្តាវិធានការបន្ថែមទៀតក្នុងនោះមានការបណ្តេញថ្មីៗពុំបដិសេធឡើយនាប៉ុន្មានថ្ងៃ ឬប៉ុន្មានសប្តាហ៍ខាងមុខ ។
អង្គការអូតង់ប្រកាសដេញអ្នកការទូតចេញ៧នាក់ ហើយបដិសេធសំណើបញ្ជូនអ្នកការទូតថ្មីមក៣នាក់ ។ ជនជាតិរុស្ស៊ី៧នាក់ ត្រូវបណ្តេញចេញពីបែលហ្ស៊ិក ។
អ៊ុយក្រែនប្រកាសពីការបណ្តេញអ្នកការទូតរុស្ស៊ី១៣នាក់ កាណាដា សម្រេចបណ្តេញអ្នកការទូតរុស្ស៊ី៤នាក់ ហើយអូស្ត្រាលី បញ្ជាឱ្យអ្នកការទូតរុស្ស៊ី២នាក់ចាកចេញ ។
ប្រទេសន័រវែស ម៉ុងតេណេហ្គ្រោ និងម៉ាសេដ្ឋានប្រកាសបណ្តេញចេញពីប្រទេសនីមួយៗអ្នកការទូតរុស្ស៊ីម្នាក់ ។ អាល់បានីប្រកាសដេញ២នាក់ ហើយម៉ុលដាវីប្រកាសដេញ៣នាក់ ៕
ចែករំលែកព័តមាននេះ