រាជធានីភ្នំពេញ ៖ «ក្បាច់គុនល្បុក្កតោរបស់ខ្មែរយើងមានប្រវត្តិជាយូរលង់ណាស់
មកហើយគឺមានតាំងពីកំណើតមនុស្សម្ល៉េះ»។
លោកបណ្ឌិតរ័ត្ន សណ្ដាប់ អគ្គលេខាធិការសហព័ន្ធកីឡាល្បុក្កតោមានប្រសាសន៍បែបនេះនៅក្នុងពិធីបិទវគ្គបណ្ដុះបណ្ដាលចៅក្រម អាជ្ញាកណ្ដាល និងគ្រូបង្វឹកកីឡាក្បាច់គុនល្បុក្កតោ កាលពីរសៀលថ្ងៃទី២៩ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជាបន្ទាប់ពីវគ្គបណ្ដុះបណ្ដាលធ្វើឡើងរយៈពេល៣ថ្ងៃរួចមក។
លោក រ័ត្ន សណ្ដាប់ បានមានប្រសាសន៍បន្តថា ពេលជួបឧបសគ្គនាំឱ្យមនុស្សចេះប្រយុទ្ធទប់ទល់ និងបម្លាស់ទីយ៉ាងមានប្រសិទ្ធភាព ហើយក្រោយៗមកបានឈានទៅមានក្បួនខ្នាត ចងក្រងជាឯកសារចំណាំតាមលំដាប់លំដោយរហូតត្រូវបានដាក់ឈ្មោះថាក្បាច់គុនល្បុក្កតោតែម្ដង ។ តាមការស្រាវជ្រាវក្បាច់គុនល្បុក្កតោដែលដូនតាខ្មែរយើងបន្សល់ទុកឱ្យបង្ហាញឱ្យឃើញថា ក្បាច់គុនមួយនេះកកើតឡើងតាំងពីយូរលង់ណាស់មកហើយជាក់ស្ដែងការរកឃើញសពបុរាណដែលមានភ្ជាប់ជាមួយនឹងអាវុធដូចជា កាំបិត ដាវ លំពែង និងឧបករណ៍ជាច្រើនទៀតនៅភូមិស្នាយ ស្រុកព្រះនេត្រព្រះ ខេត្តបន្ទាយមានជ័យគឺជាភស្តុតាងស្រាប់ ។ នៅមានភស្តុតាងជាច្រើនទៀតដែលគាំទ្រអំណះអំណាងនេះដូចជាតាមរយៈរឿងរាមកេរ្តិ៍ ដែលមានក្បាច់គុនធ្វើតម្រាប់តាមសត្វ រហូតមានចម្លាក់នៅតាមជញ្ជាំងប្រាង្គប្រាសាទអង្គរវត្ត សម្បូរព្រៃគុក បាពូន បាយ័ន បន្ទាយឆ្មា និងទីតាំងប្រវត្តិសាស្ត្រជាច្រើនទៀតដែលអាចបញ្ជាក់យ៉ាងច្បាស់ថា ក្បាច់គុនល្បុក្កតោជារបស់ខ្មែរយើងយ៉ាងពិតប្រាកដនិងមានកំណើតជាយូរលង់ណាស់មកហើយ។
លោកអគ្គលេខាធិការសហព័ន្ធកីឡាល្បុក្កតោដែលមានជំនាញខាងវប្បធម៌រូបនេះបានលើកឡើងទៀតថា បើទោះជាយើងមានការអះអាងច្បាស់លាស់បែបណាក្ដី អ្វីដែលសំខាន់ គឺគ្រូគុននិយមត្រូវមានស្មារតីឯកភាពជាតិតែមួយ ដើម្បីផ្សព្វផ្សាយនិងបង្ហាញដល់ក្មេងជំនាន់ក្រោយ ទាំងក្នុងនិងក្រៅប្រទេសឱ្យបានដឹងក្នុងលក្ខណៈទិសដៅតែមួយប៉ុណ្ណោះ ។ លោកថា ប្រទេសណាក៏ដូចប្រទេសណាដែរគេមានអត្តសញ្ញាណក្បាច់គុនច្បាស់លាស់របស់គេ ដូចជាចិន កូរ៉េជាដើមសុទ្ធតែបានកំណត់ពីក្បាច់គុនបុរាណរបស់គេ ។ ចំណែកខ្មែរយើងមានក្បាច់គុនល្បុក្កតោឬក្បាច់គុនអ្វីផ្សេងត្រូវចាត់ទុកជាមរតកក្បាច់គុនបុរាណខ្មែរតែមួយ យើងត្រូវរួមគ្នាអភិរក្សនិងអភិឌ្ឍដើម្បីឱ្យក្បាច់គុនរបស់យើងរីកសុសសាយទៅកាន់ពិភពលោក។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ការបន្ថែមវាគ្មិនជំនាញផ្នែកវប្បធម៌សិល្បៈនេះពិតជាមានសារៈសំខាន់ខ្លាំងណាស់ ដើម្បីធ្វើឱ្យសិក្ខាកាមទាំងអស់កាន់តែយល់ច្បាស់ និងជ្រាបពីប្រវត្តិកំណើតក្បាច់គុនមរតកជាតិខ្មែរសម្រាប់យកទៅផ្សព្វផ្សាយឱ្យកាន់តែទូលំទូលាយដល់បងប្អូនប្រជាពលរដ្ឋខ្មែរយើង ។ លោកបន្ថែមទៀតថា តាមការស្រាវជ្រាវពីអ្នកជំនាញ ដែលមានលក្ខណៈផ្លូវការនិងការផ្សព្វផ្សាយតាមលំនាំដើម ធ្វើឱ្យគោលការណ៍បញ្ជ្រាបកីឡាល្បុក្កតោនៅតាមក្លិបនានា មានការស្វែងយល់កាន់តែច្បាស់និងមានការឯកភាពគ្នាទៅតាមគោលការណ៍ស្តង់ដារត្រឹមត្រូវ ជាពិសេសការផ្សព្វផ្សាយទៅកាន់ប្រទេសនានា
លើពិភពលោកតែម្ដង៕
ចែករំលែកព័តមាននេះ