រាជធានីភ្នំពេញ ៖ ក្នុងចំណោមខណ្ឌទាំង១២នៅរាជធានីភ្នំពេញ ខណ្ឌជាយក្រុងជាច្រើន ក្នុងនោះខណ្ឌពោធិ៍សែនជ័យ ត្រូវបានចាត់ទុកថា ជាខណ្ឌមានការអភិវឌ្ឍរីកចម្រើនលឿនផងដែរ ។
អគ្គនាយកក្រុមហ៊ុនCentury21 Mekongលោក ច្រឹក សុខនីម បានថ្លែងតាមទូរស័ព្ទនាថ្ងៃទី៣០ មីនា ថា ខណ្ឌពោធិ៍សែនជ័យជាតំបន់អភិវឌ្ឍន៍ថ្មី ដែលមានសក្តានុពលក្នុងការវិនិយោគ ដោយសារខណ្ឌនេះមានសណ្ឋានដីល្អ មានទីតាំងនៅជិតកណ្តាលក្រុង ហើយតម្លៃដីនៅធូរថ្លៃ ដែលងាយស្រួលក្នុងការអភិវឌ្ឍ និងរកប្រាក់ចំណេញបាន ។ លោកបន្តថា បច្ចុប្បន្ន គម្រោងលំនៅឋាន ខុនដូ និងមជ្ឈមណ្ឌលពាណិជ្ជកម្មជាច្រើន បានរីកចម្រើននៅតំបន់នេះ ហើយខណ្ឌនេះនឹងមានសក្តានុពលកាន់តែខ្លាំងនាពេលអនាគត ។
ដីនៅតំបន់ពាណិជ្ជកម្មមានតម្លៃចន្លោះពី៨០០ទៅ១.៥០០ដុល្លារ, ដីនៅតាមផ្លូវតូចៗ មានតម្លៃចន្លោះពី៤០០ទៅ៨០០ដុល្លារ និងតំបន់មិនទាន់សូវមានការអភិវឌ្ឍ មានតម្លៃក្រោម២០០ដុល្លារ ក្នុង១ម៉ែត្រការ៉េ ។
លោក ច្រឹក សុខនីម បានបន្តថា ៖«ខណ្ឌពោធិ៍សែនជ័យសមស្របសម្រាប់គម្រោងអភិវឌ្ឍន៍លំនៅឋាន និងមជ្ឈមណ្ឌលពាណិជ្ជកម្ម»។ លោកបន្តថា ៖« ការរីកចម្រើននៃខណ្ឌពោធិ៍សែនជ័យ ពិតជាលឿនបើធៀបនឹងបណ្តាខណ្ឌជាយក្រុងដទៃទៀត ដែលមានការរីកចម្រើនយ៉ាងលឿនផងដែរ » ។
អ្នកអភិវឌ្ឍន៍លំនៅឋានក្នុងខណ្ឌនេះ បានយល់ស្របនឹងការលើកឡើងខាងលើ ដោយលោក ភូ សម្បត្តិ ប្រធានផ្នែកទីផ្សារនៃបុរីភ្នំពេញថ្មី បានថ្លែងថា គម្រោងអភិវឌ្ឍន៍លំនៅឋាន និងការសាងសង់មានកំណើនគួរឲ្យកត់សម្គាល់នៅទូទាំងរាជធានីភ្នំពេញ ។
អ្នកជំនាញផ្នែកអចលនទ្រព្យបានចាត់ទុកខណ្ឌពោធិ៍សែនជ័យ គឺជាខណ្ឌដ៏មានសក្ដានុពលមួយសម្រាប់ការសាងសង់លំនៅឋានរស់នៅ និងធ្វើអាជីវកម្មផ្សេងៗ តួយ៉ាងដូចជា គម្រោងរបស់បុរីភ្នំពេញថ្មី ដែលកំពុងទទួលបានការចាប់អារម្មណ៍ពីប្រជាពលរដ្ឋ ជាដើម ។
លោកបន្តថា ខណ្ឌពោធិ៍សែនជ័យមានអំណោយផលច្រើន ព្រោះជាកន្លែងប្រជុំជន ហើយមានប្រជាពលរដ្ឋមានជីវភាពគ្រប់កម្រិតរស់នៅទីនោះ ជាពិសេស តម្លៃលំនៅឋាន បើធៀបនឹងបណ្ដាខណ្ឌផ្សេងៗ គឺមានតម្លៃទាបជាងខណ្ឌដទៃ ដែលនាំឲ្យប្រជាពលរដ្ឋអាចមានលទ្ធភាពគ្រប់គ្រាន់ដើម្បីទិញលំនៅឋានរស់នៅ និងធ្វើអាជីវកម្ម ៕
ចែករំលែកព័តមាននេះ