ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបាត់ពី១០ថ្ងៃមកហើយ ស្រាប់តែត្រូវគេប្រទះឃើញស្លាប់ក្នុងព្រៃ ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង៨និង៣១នាទីយប់ ថ្ងៃទី៣០ មីនា ស្ថិតនៅភូមិសានគរ(ខ) ឃុំសានគរ ស្រុកកំពង់ស្វាយ ខេត្តកំពង់ធំ ។
បើតាមសមត្ថកិច្ចបានឲ្យដឹងថា ជនរងគ្រោះឈ្មោះ សែម រិន ភេទប្រុស អាយុ៥១ឆ្នាំ នៅភូមិខ្មាក់ ឃុំចំណាលើ ស្រុកស្ទោង ។
សមត្ថកិច្ចឱ្យដឹងទៀតថា មុនកើតហេតុ មានក្មេងៗ៣នាក់ដើរដាក់អង្គប់កណ្តុរនៅតាមវាលស្រែខាងជើងវត្តព្រះក្រសាំងចម្ងាយប្រហែល៧០០ម៉ែត្រពេលយប់ ស្រាប់តែប្រទះឃើញសពមនុស្សម្នាក់នៅក្នុងព្រៃគុម្ពោធល្ពាក់ ក្នុងភូមិ-ឃុំខាងលើ ហើយក៏យករឿងនេះប្រាប់សមត្ថកិច្ច ។ បន្ទាប់ពីទទួលព័ត៌មានភ្លាមអធិការស្រុកកំពង់ស្វាយដឹកនាំកម្លាំងជំនាញ និងប្រជាការពារចុះដល់កន្លែងកើតហេតុដោយសហការជាមួយការរិយាល័យជំនាញពិនិត្យឃើញថា ពិតជាមានសាកសពមនុស្សដេកស្លាប់ពិតប្រាកដមែន ហើយសពជនរងគ្រោះគឺបានស្លាប់ជាច្រើនថ្ងៃមកហើយ ថែមទាំងមានក្លិនស្អុយ និងដង្កូវចោះស៊ីគ្រាប់ភ្នែកអស់ទាំងសងខាងទៀតផង ហើយសពជនរងគ្រោះនៅលើក្បាល ដងខ្លួន គឺមិនមានស្លាកស្នាមអ្វីទេ និងនៅជាប់នឹងខ្លួនសពគឺរកឃើញអត្តសញ្ញាណបណ្ណ័១សន្លឹក ។
ចំណែកសាច់ញាតិបញ្ជាក់ថា ជនរងគ្រោះបានចេញបាត់ពីផ្ទះតាំងពីថ្ងៃទី២០ មីនាទៀបភ្លឺមកម្ល៉េះ ហើយប្រពន្ធ និងកូនខំប្រឹងដើររកជាច្រើនកន្លែងដែរតែរកមិនឃើញ ។ ហើយជនរងគ្រោះចូលចិត្តផឹកស្រាស្រវឹងជាប្រចាំរហូតក្លាយជាមនុស្សមានជំងឺសរសៃប្រសាទប្រហែលជា៣ឆ្នាំមកហើយ ហើយថ្មីៗកន្លងទៅនេះចេះតែផ្អើលៗរត់ចេញពីផ្ទះបាត់ៗដោយមិនដឹងថា មកស្លាប់នៅទីនេះយ៉ាងដូច្នេះសោះ ។
សមត្ថកិច្ចសន្និដ្ឋានថា ជនរងគ្រោះពិតជាស្លាប់ដោយសារហេវហត់ អត់ចំណីអាហារ បណ្តាលឱ្យកើតជាខ្យល់ និងគាំងបេះដូងស្លាប់ ហើយសពត្រូវបានប្រគល់ជូនប្រពន្ធដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ