រាជធានីភ្នំពេញ ៖ តារាភាពយន្តមួយគូកំពុងលេចធ្លោលោកខាត់ វ៉ៃហាំង និងកញ្ញាស៊ីន យូប៊ីន ដែលទស្សនិកជនលើកឡើងជាគូសម្តែងសក្តិសមនោះតែងតែមានព័ត៌មានលេចឮថាពួកគេស្រឡាញ់គ្នានៅក្រៅឆាក ។
តារាសម្តែងដែលស៊ីសង្វាក់គ្នាស៊ីន យូប៊ីននិងលោកខាត់ វ៉ៃហាំង មិនត្រឹមតែទទួលបានឱកាសការងារសម្តែងក្នុងផលិតកម្មក្នុងស្រុកនោះទេ ផលិតកម្មក្រៅស្រុកមួយចំនួនក៏បានទាក់ទងពួកគេយកទៅសម្តែងដែរ នេះជាមោទនភាពមួយរបស់តារាកម្ពុជា ។ ប្រទេសទាំងនោះថៃ ឡាវ និងសិង្ហបុរីបានទាក់ទងពួកគេទៅថត ។
លោកខាត់ វ៉ៃហាំង ឱ្យដឹងថា បន្ទាប់ពីទីផ្សារភាពយន្តខ្មែរយើងលូតលាស់ ស្រាប់តែលោក និងស៊ីន យូប៊ីន ទទួលបានការសម្លឹងមើលឃើញពីផលិតករក្រៅស្រុកស្ទើរស្មានមិនដល់ ។ នេះប្រហែលជាដៃគូសម្តែងរវាងលោក និងស៊ីន យូប៊ីន ចេះភាសាមានថៃ ចិន ឡាវ ។ មូលហេតុមួយទៀត ដោយសារតែផលិតករក្រៅស្រុកយល់ថាប្រទេសយើងជាទីផ្សារថតភាពយន្តមិនអាចមើលរំលងបាន ដូចជាមានប្រាសាទ មានតំបន់ព្រៃឈើ ភ្នំ ទឹកសមុទ្រស្រស់ស្អាត និងក្រុងក៏ទំនើប ទើបពួកគេដាក់ទិសដៅថតនៅស្រុកយើងឱ្យច្រើន នេះជាសញ្ញាវិជ្ជមានរបស់សិល្បៈខ្មែរយើង ។
លោកខាត់ វ៉ៃហាំង និយាយថា «ចំណែកយើងទាំង២មានគេឱ្យតម្លៃថាសមគ្នាពេលសម្តែងពិតជារីករាយ ហើយសប្បាយចិត្តដែលការសម្តែងរបស់យើងទាញបានការចូលចិត្តច្រើនពីទស្សនិកជន ។ ដោយឡែករឿងស្រឡាញ់គ្នាអ្វីនោះនៅមិនទាន់ថាវិវឌ្ឍបែបណាឡើយគ្រាន់តែពេលនេះដល់ចំណុចត្រឹមមិត្តភាពល្អប៉ុណ្ណោះ »។
ស៊ីន យូប៊ីន បញ្ជាក់ថា ថ្មីៗកន្លងមកនាង និងលោកវ៉ៃហាំង ទទួលបានការងារច្រើនពីផលិតករក្នុង និងក្រៅស្រុក ហើយសម្រាប់ឆ្នាំនេះនាងនៅតែទទួលបានឱកាសជាច្រើនបន្តទៀត ប៉ុន្តែនាងស្នើសុំមិនទាន់បញ្ជាក់ ។ នាង និងលោកវ៉ៃហាំង ទើបនឹងបញ្ចប់ការសម្តែងភាពយន្តភាគថ្មីមួយដែលសហការដោយទូរទស្សន៍ PNN និងទូរទស្សន៍ប៉ុស្តិ៍លេខ៣ថៃ គឺរឿង «អាថ៌កំបាំងត្រីសូល» ។
លោកខាត់ វ៉ៃហាំង លើកឡើងថា លោកនិងយូប៊ីន ក៏ទទួលចូលរួមថតភាពយន្តជាមួយផលិតករពីតំបន់បស្ចិមប្រទេសផងដែរឲ្យតែមានការទាក់ទង ៕
ចែករំលែកព័តមាននេះ