ខេត្តប៉ៃលិន ៖ មានសេចក្តីរាយការណ៍បានឱ្យដឹងថា មានរថយន្តមួយគ្រឿង ពណ៌ស ច្នៃ១គ្រឿងដឹកកម្មករបេះផ្លែតាង៉ែន មានក្មេងចាស់ប្រុសស្រីប្រហែល៥០នាក់ បានដាច់ចង្កូត និងហ្វ្រាំង បណ្តាលឱ្យរេចង្កូតពេញផ្លូវ…
ខេត្តប៉ៃលិន ៖ មានសេចក្តីរាយការណ៍បានឱ្យដឹងថា មានរថយន្តមួយគ្រឿង ពណ៌ស ច្នៃ១គ្រឿងដឹកកម្មករបេះផ្លែតាង៉ែន មានក្មេងចាស់ប្រុសស្រីប្រហែល៥០នាក់ បានដាច់ចង្កូត និងហ្វ្រាំង បណ្តាលឱ្យរេចង្កូតពេញផ្លូវ រួចក៏ធ្លាក់ក្នុងប្រឡាយអត់ទឹក បណ្តាលឱ្យចាក់មនុស្សទាំងអស់ចេញពីរថយន្តរងរបួសធ្ងន់ស្រាល តែម្តង ។ ហេតុការណ៍ខាងលើកើតឡើងកាលពីវេលាម៉ោង៧ និង៣០នាទីព្រឹក ថ្ងៃទី៣០ ខែមីនា ឆ្នាំ២០១៨ ស្ថិតនៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង ជាប់នឹងភូមិកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីកម្មករម្នាក់ឈ្មោះ រ៉េត ភេទប្រុស អាយុ៤០ឆ្នាំ បានឱ្យដឹងថា មុនពេលកើតហេតុ ថៅកែបានឱ្យកម្មករម្នាក់ បើកបររថយន្តហ៊ីយ៉ាន់ដាយច្នៃ១គ្រឿង ដឹកកម្មករក្មេងចាស់ប្រុសស្រីប្រហែល៥០នាក់ បើកបរក្នុងទិសដៅពីជើងទៅត្បូង លុះចេញដំណើរមួយសន្ទុះក្រោយមក ស្រាប់តែរថយន្តដាច់ចង្កូត ពេលនោះអ្នកបើកបរខំប្រឹងជាន់ហ្វ្រាំង ដើម្បីឱ្យឈប់ក៏ដាច់ហ្វ្រាំងបន្តទៀត បណ្តាលឱ្យរេចង្កូតពេញផ្លូវ ទើបចាក់កម្មករទាំងអស់ពេញចិញ្ចើមផ្លូវ បណ្តាលឱ្យរងរបួសធ្ងន់ស្រាលទាំងអស់តែម្តង ។
ក្រោយពេលកើតហេតុជនរងគ្រោះទាំងអស់ត្រូវបានគេដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិន លុះមានអ្នករងរបួសមួយចំនួនធ្ងន់ធ្ងរ ត្រូវគេបញ្ជូនតាមរថយន្តសង្គ្រោះទៅមន្ទីរពេទ្យខេត្តបាត់ដំបង ។ ប្រភពបន្តទៀតថា ការរងរបួសនេះគេអាណិតតែកូនក្មេងតូចៗ អាយុប្រហែល១ខួបទៅ២ខួប ដែលម្តាយយកទៅតាមខ្លួន ដើម្បីធ្វើការបេះផ្លែតាង៉ែនឱ្យថៅកែខ្មែរ និងថៃនៅក្នុងទឹកដីខេត្តប៉ៃលិន និងខេត្តបាត់ដំបង ។
សូមបញ្ជាក់ផងដែរថា ចំណែកជនរងគ្រោះមួយចំនួនទៀតដែលកំពុងដេកសម្រាកនៅក្នុងមន្ទីរពេទ្យខេត្តប៉ៃលិន ក៏មានក្មេងចាស់ប្រុសស្រីជាច្រើននាក់ផងដែរ ដោយពួកគេកំពុងតែដេកស្រែកដោយក្តីឈឺចាប់ យ៉ាងខ្លាំង ។ បន្ទាប់មក គេឃើញអភិបាលខេត្តប៉ៃលិន បានដឹកនាំក្រុមការងារចុះទៅសួរសុខទុ ក្ខជនរងគ្រោះទាំងនោះផងដែរ ៕
ចែករំលែកព័តមាននេះ