រាជធានីភ្នំពេញ ៖ ប្រទេសកម្ពុជានឹងចូលរួមសន្និសីទតំបន់អាស៊ីប៉ាស៊ីហ្វិក ដើម្បីផ្សព្វផ្សាយពីកាលានុវត្តភាព និងសក្តានុពលវិនិយោគនៅកម្ពុជា ដែលសន្និសីទនេះនឹងរៀបចំធ្វើនៅប្រទេសឥណ្ឌូណេស៊ី នាចុងឆ្នាំនេះ ។ ឯកអគ្គរដ្ឋទូតអាល្លឺម៉ង់ប្រចាំកម្ពុជា លោក…
រាជធានីភ្នំពេញ ៖ ប្រទេសកម្ពុជានឹងចូលរួមសន្និសីទតំបន់អាស៊ីប៉ាស៊ីហ្វិក ដើម្បីផ្សព្វផ្សាយពីកាលានុវត្តភាព និងសក្តានុពលវិនិយោគនៅកម្ពុជា ដែលសន្និសីទនេះនឹងរៀបចំធ្វើនៅប្រទេសឥណ្ឌូណេស៊ី នាចុងឆ្នាំនេះ ។
ឯកអគ្គរដ្ឋទូតអាល្លឺម៉ង់ប្រចាំកម្ពុជា លោក Ingo Karsten នាថ្ងៃទី២៩ មីនា ម្សិលមិញ បានជម្រាបជូនលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មថា កម្មវត្ថុនៃការសុំជួបនេះ គឺដើម្បីអញ្ជើញលោករដ្ឋមន្ត្រីចូលរួមសន្និសីទថ្នាក់តំបន់ប្រចាំអាស៊ី-ប៉ាស៊ីហ្វិក (Asia-Pacific Regional Conference) នៅទីក្រុងហ្សាការតា ប្រទេសឥណ្ឌូណេស៊ី នៅខែវិច្ឆិកា ឆ្នាំ២០១៨ ខាងមុខនេះ ។
លោកទូតបានបន្ដថា នេះជាកិច្ចប្រជុំដ៏ធំមួយដែលមានការចូលរួមពីធុរជនកំពូលៗ និងក្រុមហ៊ុនធំៗរបស់អាល្លឺម៉ង់ ហើយក៏ជាឱកាសមួយដ៏ល្អសម្រាប់កម្ពុជាផ្សព្វផ្សាយពីសក្ដានុពលវិនិយោគរបស់ខ្លួន ជាពិសេសភាពអនុគ្រោះពិសេសៗនៃបរិយាកាសវិនិយោគនៅកម្ពុជា ដែលក្រុមហ៊ុនអាល្លឺម៉ង់ជាច្រើនមិនទាន់យល់ច្បាស់ ។ លើសពីនេះទៀត សន្និសីទនេះក៏អាចជាវេទិកាមួយ សម្រាប់រដ្ឋមន្ត្រីពាណិជ្ជកម្មនៃប្រទេសទាំងពីរបានជួបប្រជុំទ្វេភាគី ដើម្បីពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំងពីរផងដែរ ។
ជាកិច្ចឆ្លើយតបទៅនឹងការអញ្ជើញ លោករដ្ឋមន្ត្រីក្រសួងពាណិជ្ជកម្មកម្ពុជា ប៉ាន សូរស័ក្ដិ បានទទួលយកការអញ្ជើញនេះ ។ លោកយល់ថា សន្និសីទនេះមានសក្ដានុពលច្រើន ក្នុងការទាក់ទាញការវិនិយោគអាល្លឺម៉ង់មកកម្ពុជា ។
លោកបន្តទៀតថា ៖« អាល្លឺម៉ង់ជាប្រទេសឧស្សាហកម្មធំមួយក្នុងពិភពលោក និងមានក្រុមហ៊ុនដែលមានបច្ចេកទេសខ្ពស់ជាច្រើនផងដែរ»។
លោករដ្ឋមន្ត្រីរំពឹងថា នឹងបានជួបធុរជនកំពូលនៃក្រុមហ៊ុនទាំងនោះដើម្បីពិភាក្សាលើការវិនិយោគនៅកម្ពុជា ជាពិសេសនៅក្នុងវិស័យអាទិភាពមួយចំនួន ដែលក្រុមហ៊ុនអាល្លឺម៉ង់អាចចាប់អារម្មណ៍ ដូចជា វារីអគ្គិសនី ព្រោះក្រុមហ៊ុនអាល្លឺម៉ង់មានជំនាញផលិតម៉ាស៊ីន Hydro-Turbine គ្រឿងផ្សំរថយន្ត និងកង់រថយន្ត ។ល។
ប្រទេសកម្ពុជាត្រូវបានគេមើលឃើញថា កំពុងមានសក្តានុពលវិនិយោគ ដោយសារតែកត្តាសុខសន្តិភាព ស្ថិរភាពនយោបាយ ជាពិសេសកំណើនសេដ្ឋកិច្ច ដែលប្រទេសនេះ សម្រេចបានកំណើនជាមធ្យម៧,៧% ក្នុងរយៈពេល២ទសវត្សរ៍ចុងក្រោយនេះ ។ លើសពីនេះ កម្ពុជាមានច្បាប់វិនិយោគដ៏ល្អ ដោយសារកម្ពុជាអនុញ្ញាតឲ្យជនបរទេសមានសិទ្ធិគ្រប់គ្រងក្រុមហ៊ុនរបស់ខ្លួន១០០% ជាពិសេសច្បាប់ពន្ធរបស់កម្ពុជាគ្មានភាពស្មុគ្រស្មាញ ៕
ចែករំលែកព័តមាននេះ