រាជធានីភ្នំពេញ ៖ កម្ពុជាបានរក្សានូវកំណើនសេដ្ឋកិច្ចថេរ និងគួរឲ្យមានមោទនភាព ក្នុងរយៈពេលជាង២០ឆ្នាំមកនេះ ក្នុងនោះបានរក្សាកំណើនសេដ្ឋកិច្ចជាមធ្យម៧%ក្នុង១ឆ្នាំ ។ នៅក្នុងរយៈពេលប៉ុន្មានឆ្នាំកន្លងទៅនេះ ការសម្រេចបាននូវកំណើនសេដ្ឋកិច្ចក្នុងរង្វង់៧% គឺវិស័យកាត់ដេរសម្លៀកបំពាក់ និងស្បែកជើងបានដើរតួនាទីសំខាន់ ។ ក៏ប៉ុន្តែក្នុងរយៈពេលចុងក្រោយ វិស័យមួយនេះកំពុងមានការប្រកួតប្រជែងជាមួយបណ្ដាប្រទេសជិតខាង និងក្នុងតំបន់ ក្រោយពេលប្រាក់ឈ្មួលកម្មករ-កម្មការិនី បានកើនឡើងជាបន្តបន្ទាប់ ។
ដោយសារតែមានការប្រកួតប្រជែងនៅក្នុងវិស័យកាត់ដេរនេះហើយ បច្ចុប្បន្ន កម្ពុជាកំពុងរិះរកវិធីសាស្ត្រយ៉ាងណា ងាកទៅរកការផលិតរបស់ណាដែលមានតម្លៃបន្ថែមខ្ពស់សម្រាប់នាំចេញទៅកាន់ទីផ្សារអន្តរជាតិ ស្របពេលប្រាក់ឈ្នួលកម្លាំងពលកម្មរបស់បុគ្គលិកកម្ពុជា បានកើនឡើងជាបន្តបន្ទាប់ ។ ជាក់ស្ដែង ក្នុងឆ្នាំ២០១៨នេះ រាជរដ្ឋាភិបាលបានសម្រេចដំឡើងប្រាក់អប្បបរមារបស់កម្មករក្នុងវិស័យវាយនភ័ណ្ឌ រហូតដល់១៧០ដុល្លារអាមេរិកក្នុង១ខែ ។
បើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ មានប្រសាសន៍នៅក្នុងវេទិកាស្ដីពី សេដ្ឋកិច្ចកម្ពុជា សមិទ្ធកម្ម និងទស្សនវិស័យ ថា វាជាការពិតណាស់ដែលកម្ពុជាត្រូវតែកែច្នៃ និងរិះរកការផលិតណាមានតម្លៃខ្ពស់សម្រាប់នាំចេញ ស្របពេលប្រាក់ឈ្មួលកម្មករកើនឡើង ។ លោកថា ៖« កាលពីមុន យើងផលិតសម្ភារសម្រាប់នាំចេញដែលមានតម្លៃទាប តែយើងអាចឲ្យវិនិយោគិនរកប្រាក់ចំណេញបាន ព្រោះកាលនោះ ប្រាក់ឈ្មួលកម្មករ-កម្មការិនីនៅមានកម្រិតទាប តែពេលនេះ យើងមិនអាចនៅតែផលិតរបស់របរដដែល និងក្នុងតម្លៃដដែលទៀតបានទេ ព្រោះវាមិនធ្វើឲ្យវិនិយោគិនរកប្រាក់ចំណេញបានឡើយ » ។
លោកបន្តថា បើតាមព័ត៌មានចេញផ្សាយកន្លងមក ប្រទេសចិននឹងបោះបង់ចោលការផលិតសម្រាប់នាំចេញទៅកាន់ទីផ្សារអន្តរជាតិ ១០% ហើយទំហំ១០%នេះ វាធំធេងណាស់។ ដូចនេះ កម្ពុជានឹងមានឱកាសចាប់យកទីផ្សារសម្រាប់ផលិតផលនោះ ដោយទាក់ទាញវិនិយោគិនមកបណ្ដាក់ទុនវិនិយោគលើរោងចក្រ សម្រាប់ផលិតនូវសម្ភារផ្សេងៗនាំចេញទៅកាន់ទីផ្សារអន្តរជាតិ ។
រាជរដ្ឋាភិបាលកម្ពុជា កាលពីចុងឆ្នាំ២០១៧កន្លងទៅ បានបើកវេទិកាមួយស្វាគមន៍វិនិយោគិនចិន និងបរទេសដទៃទៀតមកបណ្ដាក់ទុនបង្កើតរោងចក្រផលិតអាវរងាសម្រាប់នាំចេញទៅបណ្ដាប្រទេសអាស៊ី អឺរ៉ុប ដែលមានប្រទេស៥ សុទ្ធសឹងជាប្រទេសរីកចម្រើន និងមានតម្រូវការអាវរងា ។ បច្ចុប្បន្ន កម្ពុជាក៏បាននិងកំពុងចរចាជាមួយបណ្ដាប្រទេសទាំងនោះ លើការនាំចូលដោយមិនគិតពន្ធផងដែរ ។ បើសិនជាការចរចាបានសម្រេចនោះ វិនិយោគិននឹងមកបណ្ដាក់ទុនក្នុងប្រទេសកម្ពុជា ផលិតអាវរងាកាន់តែច្រើន ហើយវានឹងផ្ដល់ប្រយោជន៍ច្រើនទៀតដល់រាជរដ្ឋាភិបាលផងដែរ ។
បើតាមរបាយការណ៍ធនាគារពិភពលោក ប្រចាំកម្ពុជា ក៏បានបង្ហាញដែរថា កម្ពុជាគួរតែងាកទៅរកការផលិតសម្ភារណាដែលមានតម្លៃខ្ពស់ បើចង់ឲ្យសេដ្ឋកិច្ចរបស់ខ្លួននៅរក្សាបាននូវកំណើនខ្ពស់ដូចរយៈពេលកន្លងទៅ ។
គួរបញ្ជាក់ថា តាមការបញ្ជាក់របស់លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរកម្ពុជា នៅឆ្នាំ២០១៧កន្លងទៅ ការនាំចេញ ក៏ដូចជាការបញ្ជាទិញពីក្រៅប្រទេសលើផលិតផលវាយនភ័ណ្ឌ មានទំហំទឹកប្រាក់ប្រមាណ៧,៦ពាន់លានដុល្លារអាមេរិក មានកំណើនជាង៧% បើធៀបនឹងឆ្នាំ២០១៦ ។ ដោយឡែក សម្រាប់ការនាំចេញសរុបរបស់កម្ពុជាទៅកាន់ទីផ្សារអន្តរជាតិក្នុងឆ្នាំ២០១៧ មានទំហំទឹកប្រាក់ប្រមាណជាង១១ពាន់លានដុល្លារអាមេរិក ៕
ចែករំលែកព័តមាននេះ