ខេត្តសៀមរាប ៖ បុគ្គលិកហាង តាលាភ អូរឫស្សី២ ក្រោយស្តាតចាស់ម្នាក់ យកដៃប៉ះបង្គោលភ្លើងសសរដែក ដែលខ្លួនមានសំណើម ទើបបណ្តាលឱ្យឆ្លងចរន្តអគ្គិសនី ឆក់ដួលស្លាប់មួយរំពេច យ៉ាងអាណោចអាធ័ម ខណៈកំពុងដើរចេញពីធ្វើការ បម្រុងទៅផ្ទះជួលវិញ បង្កឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ច ភ្លាមៗផងដែរ។ ហេតុការណ៍ចរន្តអគ្គិសនីឆក់បុគ្គលិកហាងនោះ បានកើតឡើងថ្ងៃទី២៩ ខែមីនា ឆ្នាំ២០១៨ ស្ថិតនៅ ចំណុចបង្គោលភ្លើងលេខ៥៥៩ តាមបណ្តោយផ្លូវបេតុង ក្រោយធនាគាអេស៊ីលីដា ជិតហាងម្លិះអង្គរថ្មី ក្នុងភូមិសាលាកន្សែង សង្កាត់ស្វាយដង្គំ ក្រុង/ខេត្តសៀមរាប។
បើតាមប្រភពពីសាក្សីបានដឹងស្គាល់ នៅកន្លែងកើតហេតុបានប្រាប់ថា មុនពេលកើតហេតុ ជនរងគ្រោះកំពុងដើរតាមផ្លូវ ហើយទៅប៉ះបង្គោលភ្លើងដែកសាធារណៈ ត្រូវឆ្លងចរន្តអគ្គិសនីឆក់បណ្តាលឲ្យស្លាប់ ផ្អើលដល់សមត្ថកិច្ច ចុះទៅពិនិត្យ។ ប្រភពបានបន្តថា ជនរងគ្រោះឮគេហៅឈ្មោះ ភា មិនស្គាល់ត្រកូល ភេទស្រី អាយុ២២ឆ្នាំ មុខរបរ ជាបុគ្គលិក ហាងយីហោ តាលាភ អូរឫស្សី២ ក្រោយស្តាតចាស់ ស្នាក់នៅបណ្តោះអាសន្ន បន្ទប់ជួលភូមិ សាលាកន្សែង សង្កាត់ស្វាយដង្គំ ក្រុង/ខេត្តសៀមរាប។ លោកវរៈសេនីយ៍ត្រី ឆឹង សុភា អធិការរងនៃអធិការក្រុងសៀមរាបបានប្រាប់នៅរសៀលថ្ងៃទី២៩ ខែមិនា ឆ្នាំ២០១៨នេះថា ក្រោយពេលកើតហេតុបានប្រជាពលរដ្ឋរាយការណ៍មកសមត្ថកិច្ចមូលដ្ឋាន ឱ្យចុះមកជួយពិនិត្យសាកសពនារីរងគ្រោះ។
លោកបានបញ្ជាក់ថា ជនរងគ្រោះ ដែលស្លាប់នោះមាន ឈ្មោះ ភា មិនស្គាល់ត្រកូល ភេទស្រី អាយុ២២ឆ្នាំ មុខរបរជាបុគ្គលិក ហាងយីហោ តាលាភ អូរឫស្សី២ ក្រោយស្តាតចាស់ ស្នាក់នៅបណ្តោះអាសន្ន បន្ទប់ជួលភូមិ សាលាកន្សែង សង្កាត់ស្វាយដង្គំ ក្រុង/ខេត្តសៀមរាប និងមិនស្គាល់អត្តសញ្ញាណ។ បន្ទាប់ពីធ្វើកោសល្យវិនិច្ឆ័យរួច កម្លាំងជំនាញរបស់ស្នងការនគរបាលខេត្ត បានសន្និដ្ឋានថា ជនរងគ្រោះពិតជាស្លាប់ដោយសារឆក់ខ្សែរភ្លើងស្លាប់មែន មិនមែនជាករណីឃាតកម្មអ្វីឡើយ។ សពនារីរងគ្រោះ ត្រូវបានសមត្ថកិច្ចយកទៅតម្កល់ទុកនៅវត្តគោកចក រង់ចាំក្រុមគ្រួសារមកយកទទួលទៅធ្វើបុណ្យតាមប្រពៃណីខ្មែរផងដែរ៕
ចែករំលែកព័តមាននេះ