រាជធានីភ្នំពេញ ៖ មន្ត្រីយោធាម្នាក់ ខណៈពេលកំពុងជិះម៉ូតូ១គ្រឿង ធ្វើដំណើរតាមផ្លូវសុខៗស្រាប់តែមានអាការមិនស្រួលខ្លួន ពេលនោះគាត់ក៏បានឈប់ម៉ូតូ ហើយបានទៅអង្គុយនៅតាមចិញ្ចើមផ្លូវមុខផ្ទះប្រជាពលរដ្ឋ ហើយក៏បានដួលសន្លប់បាត់ស្មារតីតែម្ដង ។
ដោយសង្ស័យត្រូវខ្យល់គ បន្ទាប់មកនគរបាលបានហៅរថយន្តសង្គ្រោះបន្ទាន់អង្គភាព៧១១ កងពលតូចលេខ៧០ យកទៅកាន់មន្ទីរពេទ្យបង្អែកពោធិ៍ចិនតុង ដើម្បីសង្គ្រោះបន្ទាន់ភ្លាមដែរ ទើបរួចផុតពីសេចក្ដីស្លាប់ ។ ហេតុការណ៍នោះបានកើតឡើងកាលពីវេលាម៉ោង១និង៣០នាទីរសៀល ថ្ងៃទី២៩ ខែមីនា ឆ្នាំ២០១៨ នៅតាមបណ្ដោយផ្លូវវេងស្រេង ត្រង់ចំណុចជិតភ្លើងស្តុបទួលពង្រ ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះខាងលើឈ្មោះ ឡុង សុផាត អាយុ៤៨ឆ្នាំ ជាមន្ត្រីយោធា ជិះម៉ូតូ១គ្រឿងម៉ាកស៊ីទីសេ១០០កូរ៉េ(អាសង់កូរ៉េ )ពណ៌ក្រហម ពាក់ស្លាកលេខ ដ-7062 ភព 1 ។
តាមប្រភពព័ត៌មានបានឲ្យដឹងថា នៅមុនពេលកើតហេតុបុរសរងគ្រោះបានជិះម៉ូតូធ្វើដំណើរក្នុងទិសដៅពីកើតទៅលិចតែម្នាក់ឯង ក្នុងទិសដៅបញ្ច្រាសទិសចរាចរណ៍ ។ លុះពេលទៅដល់ត្រង់ចំណុចកើតហេតុខាងលើគាត់មានអាការមិនស្រួលខ្លួន ក៏បានឈប់ម៉ូតូ ហើយបានអង្គុយនៅលើចិញ្ចើមផ្លូវមុខផ្ទះប្រជាពលរដ្ឋ ។ បន្តិចក្រោយមកក៏ស្រាប់តែដួលសន្លប់បាត់មាត់បាត់.កតែម្ដង ពេលនោះប្រជាពលរដ្ឋបាននាំគ្នាជួយធ្វើចលនាបេះដូង ជាការសង្គ្រោះបឋម តែនៅតែមិនដឹងខ្លួនទៀត រួចទើបរាយការណ៍ជូននគរបាលចុះទៅពិនិត្យមើល ។
ប្រភពដដែលបានបន្តទៀតថា ក្រោយពេលទៅដល់ឃើញបុរសនោះមានអាការធ្ងន់ធ្ងរអាចគ្រោះថ្នាក់ដល់ជីវិតទើបនគរបាលហៅ រថយន្តសង្គ្រោះអង្គភាព៧១១ ដឹកយកទៅសង្គ្រោះបន្ទាន់នៅមន្ទីរពេទ្យបង្អែកពោធិ៍ចិនតុងភ្លាមៗ ទើបបុរសនេះរួចផុតពីសេចក្ដីស្លាប់ ។
នគរបាលបានសន្និដ្ឋានថា មន្ត្រីយោធាខាងលើសន្លប់ដោយសារ ជំងឺខ្យល់គ និងសំណាងហើយដែលបានក្រុមសង្គ្រោះអង្គភាព៧១១ ដឹកបញ្ជូនទៅកាន់មន្ទីរពេទ្យទាន់ពេលវេលា ៕
ចែករំលែកព័តមាននេះ