រាជធានីភ្នំពេញ ៖ ប្រធានគណៈកម្មាធិការជាតិរៀបចំការបោះឆ្នោតបានប្តេជ្ញាចិត្តថានឹងបន្តរៀបចំការបោះឆ្នោតជ្រើសរើសតាំងអ្នកតំណាងរាស្ត្រនៅពេលខាងមុខនេះ ឲ្យបានល្អទៅទៀតក្នុងនាមជាខ្មែរ ។ ការលើកលើកឡើងប្រធាន គ.ជ.ប. លោកស៊ិក ប៊ុនហុក បន្ទាប់ពីជំនួបពិភាក្សាជាមួយ…
រាជធានីភ្នំពេញ ៖ ប្រធានគណៈកម្មាធិការជាតិរៀបចំការបោះឆ្នោតបានប្តេជ្ញាចិត្តថានឹងបន្តរៀបចំការបោះឆ្នោតជ្រើសរើសតាំងអ្នកតំណាងរាស្ត្រនៅពេលខាងមុខនេះ ឲ្យបានល្អទៅទៀតក្នុងនាមជាខ្មែរ ។ ការលើកលើកឡើងប្រធាន គ.ជ.ប. លោកស៊ិក ប៊ុនហុក បន្ទាប់ពីជំនួបពិភាក្សាជាមួយ លោក ហេង វ៉ាន់ដា ប្រធានក្រុមប្រឹក្សាភិបាលនៃសមាគមគ្រឹះស្ថានឧត្តមសិក្សាកម្ពុជាកាលពីថ្ងៃទី២៨ ខែមីនា ឆ្នាំ២០១៨ នៅទីស្តីការ គ.ជ.ប កន្លងមក ។
លោក ហេង វ៉ាន់ដា បានលើកឡើងថា សមាគមគ្រឹះស្ថានឧត្តមសិក្សាកម្ពុជាដែលបានចូលរួមសង្កេតការណ៍បោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី២៥ ខែកុម្ភៈ ឆ្នាំ២០១៨ កន្លងមកយល់ឃើញថា ការបោះឆ្នោតបានប្រព្រឹត្តិទៅដោយរលូន គ្មានហិង្សា ស្ងប់ស្ងាត់ មានសណ្តាប់ធ្នាប់ល្អនិងស្ថិតនៅក្នុងបរិយាកាសនយោបាយប្រជាធិបតេយ្យសេរីពហុបក្ស ដែលគួរជាទីមោទនៈសម្រាប់ប្រទេសជាតិ យើងព្រមទាំងស្គាល់លទ្ធផលនៃការបោះឆ្នោតដែលប្រកាសដោយ គ.ជ.ប ។
លោកបានបន្តថា គ្រឹះស្ថានឧត្តមសិក្សាកម្ពុជាដែលមានគ្រឹះស្ថានឯកជនចំនួន៩៥ បានចាត់តាំងសមាជិករបស់ខ្លួនចំនួន៤៣នាក់ គ្រប់ដណ្តប់ពេញកាលរិយាល័យបោះឆ្នោតទាំង៣៣ទូទាំងប្រទេស ដើម្បីធ្វើជាអ្នកសង្កេតការណ៍បោះឆ្នោតសម្រាប់សង្កេតមើលការបោះឆ្នោតជ្រើសតាំងសមាជិកព្រឹទ្ធសភា និងនីតិកាលទី៤ ឆ្នាំ២០១៨ ផងដែរ ។ ជាមួយគ្នានោះដែរ លោកហេង វ៉ាន់ដា បានឲ្យដឹងថា សមាគមបានត្រៀមក្រុមការងារពី២៥០ នាក់ ទៅ៥០០នាក់ ដែលជាសាស្ត្រចារ្យបញ្ញវន្ត គណៈគ្រប់គ្រងគ្រឹះស្ថានសិក្សា ដើម្បីចូលរួមសង្កេតការណ៍បោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៩ខាងមុខនេះ ។
ចំណែកលោកស៊ិក ប៊ុនហុកបានកោតសរសើរសមាគមនគ្រឹះស្ថានឧត្តមសិក្សាកម្ពុជាដែលមានបេសកម្មរបស់ខ្លួនមួយដ៏គួរឲ្យចាប់អារម្មណ៍ គឺជួយអភិវឌ្ឍន៍សេវាអប់រំឲ្យមានគុណភាព និងចូលរួមជួយសង្គមជាមួយរាជរដ្ឋាភិបាលដែលចំណុចនេះ សំខាន់ណាស់ ដើម្បីកសាងមនុស្សយុវជនបន្តវេន ។
លោកប្រធានក៏បានលើកឡើងថា គ.ជ.ប.នឹងត្រៀមក្រុមការងារ ដើម្បីបណ្តុះបណ្តាលនិស្សិតបញ្ញាវន្ត ជុំវិញការបោះឆ្នោត ពីព្រោះការងារបោះឆ្នោតគ្មានសាលាបង្រៀនទេ ។ ការបណ្តុះបណ្តាលនេះនឹងធ្វើឲ្យយុវជនប្រជាពលរដ្ឋយល់ដឹងកាន់តែច្បាស់អំពីសិទ្ធិក្នុងនាមជាពលរដ្ឋល្អទៀតផង ។
ក្នុងឱកាសនោះដែរលោក ហេង វ៉ាន់ដា ប្រធានគ្រឹះស្ថានឧត្តមសិក្សាកម្ពុជាក៏បានលើកឡើងដែរថា មូលហេតុចម្បងបំផុតដែលយើង ចូលរួមក្នុងការសង្កេតការណ៍នេះ យើងចង់ចូលរួមក្នុងនាមជា សង្គមមួយធ្វើម៉េចឲ្យប្រទេសយើងមានការបោះឆ្នោតមួយមានតម្លាភាព ត្រឹមត្រូវមានការបោះឆ្នោតដោយសុខសាន្ត ដោយរលូនមានលក្ខណៈជាប្រជាធិបតេយ្យ ។
អ្នកនាំពាក្យ គ.ជ.ប.លោកហង្ស ពុទ្ធាថា ការបោះឆ្នោតជ្រើសតាំងតំណាងរាស្ត្រអាណត្តិទី៦ នៅកម្ពុជា នឹងធ្វើឡើងតាមកាលកំណត់ ដោយគ្មានអ្វីប្រែប្រួលនោះទេ ទោះបីជាថ្នាក់ដឹកនាំអតីតគណបក្សប្រឆាំងបានអំពាវនាវឱ្យមានការពន្យារពេលយ៉ាងណាក៏ដោយ ។
អ្នកនាំពាក្យ គ.ជ.បបានអះអាងថា ការថ្លែងយោបល់យ៉ាងណារបស់អតីតសង្គ្រោះជាតិ នោះគ្រាន់តែជាការលើកជាយោបល់ទេ ប៉ុន្តែសម្រាប់ច្បាប់កម្ពុជាសេចក្តីថ្លែងការណ៍របស់ពួកគាត់មិនមានឥទ្ធិពលអ្វីប៉ះពាល់ដល់ការកំណត់កាលបរិច្ឆេទនៃការបោះឆ្នោតឡើយ ហើយក៏គ្មានឥទ្ធិពលអ្វីដែលនាំឱ្យ គ.ជ.ប យកមកពិចារណាដែរ ។
សូមរឮកថា កាលបរិច្ឆេទនៃការបោះឆ្នោតជ្រើសតាំងតំណាងរាស្ត្រអាណត្តិទី៦ ត្រូវបានប្រកាសដោយរាជរដ្ឋាភិបាលកម្ពុជាដែលកំណត់យកថ្ងៃអាទិត្យទី២៩ ខែកក្កដា ឆ្នាំ២០១៨ ខាងមុខនេះ ។
គ.ជ.បបានចេញសេចក្តីប្រកាសព័ត៌មានមួយដោយនឹងទុកពេល១៥ថ្ងៃសម្រាប់គណបក្សនយោបាយ ដើម្បីចុះឈ្មោះចូលរួមការបោះ ឆ្នោតជាតិមួយនេះ ។ រយៈពេលនៃការចុះឈ្មោះនេះ គឺចាប់ផ្តើមពីថ្ងៃទី៣០ ខែមេសា រហូតដល់ថ្ងៃទី១៤ ខែឧសភា ឆ្នាំ២០១៨ ។
សម្រាប់គណបក្សនយោបាយណាដែលមិនបានចុះឈ្មោះទាន់ពេលវេលា នៅអំឡុងពេលនោះ គ.ជ.ប នឹងមិនអនុញ្ញាតឱ្យចូលរួមក្នុងការបោះឆ្នោតឡើយ ។
ទាក់ទិននឹងគណបក្សនយោបាយវិញ បើតាមមន្ត្រីជាន់ខ្ពស់ក្រសួងមហាផ្ទៃបានឲ្យដឹងរហូតដល់ពេលនេះមានគណបក្សនយោបាយចំនួន៣៧ហើយ ដែលត្រូវបានទទួលស្គាល់ជាផ្លូវការថា ស្របច្បាប់ ។ ប៉ុន្តែទោះជាយ៉ាងណានៅដំណាក់កាលនេះគេមិនទាន់ដឹងថា នឹងមានគណបក្សនយោបាយចំនួនប៉ុន្មានចូលរួមក្នុងការបោះឆ្នោតខាងមុខនេះនៅឡើយ ខណៈគណបក្សជាច្រើនក្នុងចំណោមនោះទាំងថ្មី និងចាស់បានប្រកាសត្រៀមខ្លួនចូលរួមក្នុងការបោះឆ្នោតខាងមុខនេះ ៕
ចែករំលែកព័តមាននេះ