រាជធានីភ្នំពេញ ៖ មកទល់ពេលនេះ គណៈកម្មាធិការជាតិអូឡាំពិកកម្ពុជា បានបង្ហាញពីសកម្មភាពដុតដៃដុតជើងយ៉ាងខ្លាំង ដើម្បីដាក់កីឡា៣ប្រភេទចូលក្នុងបញ្ជីសម្បត្តិបេតិកភ័ណ្ឌពិភពលោកក្នុងពេលដ៏ខ្លី ។ យ៉ាងណាក៏ដោយលទ្ធផលជាក់ស្ដែងស្ថិតក្នុងការតាមដាននៅឡើយប៉ុណ្ណោះ ខណៈដែលក្នុងចំណោមកីឡាទាំង៣ប្រភេទនោះទើបតែមានកីឡាមួយប៉ុណ្ណោះដែលឯកសារទាំងស្រុងបានធ្លាក់ដល់ដៃអង្គការយូណេស្កូដែលជាអ្នកទទួលចុះបញ្ជី។
លោក វ៉ាត់ ចំរើន អគ្គលេខាធិការនៃគណៈកមា្មធិការជាតិអូឡាំពិកកម្ពុជា បានថ្លែងបញ្ជាក់ថា មកទល់ពេលនេះ កម្ពុជាទើបតែមានកីឡាល្បុក្កតោមួយប៉ុណ្ណោះដែលបានដាក់ឯកសារស្នើសុំចុះបញ្ជីជាសម្បត្តិបេតិកភ័ណ្ឌពិភពលោក ខណៈដែលឯកសារនោះក្រោយពីបានប្រគល់ហើយ គឺនឹងមានការប្រជុំឆ្លងនៅអំឡុងខែកញ្ញា ឆ្នាំ២០១៨នេះ ហើយបើមានការតម្រូវឱ្យកែសម្រួលណាមួយ គឺភាគីកម្ពុជា នឹងធ្វើការកែតម្រូវ រហូតដល់ចុងឆ្នាំនេះនឹងមានការប្រកាសទទួលឱ្យចុះបញ្ជីឬមិនឱ្យ។ លោកថា បើទោះជាការត្រួតពិនិត្យឯកសារមានភាពច្បាស់លាស់ និងមិនមានការកំណត់ឱ្យកែសម្រួលយ៉ាងណាក៏ដោយ ក៏ការសម្រេចប្រកាសទទួលស្គាល់នៅតែត្រូវធ្វើឡើងនៅអំឡុងចុងឆ្នាំ២០១៩ជាកំហិត ដោយសារតែក្នុងរយៈពេលនោះទើបជាពេលវេលាសម្រាប់ការប្រកាសជាផ្លូវការ ។
លោកថា មិនទាន់ច្បាស់កីឡាល្បុក្កតោកម្ពុជានឹងក្លាយជាសម្បត្តិបេតិកភ័ណ្ឌពិភពលោកនៅអំឡុងឆ្នាំ២០១៩ នោះទេ ខណៈលោកបញ្ជាក់ថា បើមិនអាចបញ្ចូលបានគឺរង់ចាំរហូតទាល់តែ២ឆ្នាំក្រោយទើបមានការសម្រេចជាថ្មី ។ លោកថា លក្ខខណ្ឌរបស់អង្គការយូណេស្កូ គឺមួយឆ្នាំទទួលឯកសារយកទៅឆ្លង និងពិភាក្សា ហើយមួយឆ្នាំក្រោយទើបសម្រេចប្រកាសទទួលស្គាល់ ឬមិនទទួលស្គាល់ ។ យ៉ាងណាមិញ លោកថា ល្បុក្កតោមិនអាចមិនត្រូវបានបញ្ជូលនោះទេ ដោយសារតែឯកសារក៏ត្រូវបានកែលម្អជាថ្មីតាមការចង់បានរបស់អង្គការយូណេស្កូ ហើយកីឡាមួយនេះ ក៏មិនមានរឿងចម្រូងចម្រាសជាមួយប្រទេសណាមួយ ដែលអាចនិយាយបានថាមានតែកម្ពុជាមានកីឡាមួយនេះ ហើយមិនសូវភ័យរឿងប្រទេសណាមួយជំទាស់ក្នុងពេលកំណត់ថា ជាសម្បត្តិបេតិកភ័ណ្ឌពិភពលោក។
លោកថា ទម្រាំតែបានឯកសារឱ្យយូណេស្កូ ពាក់ព័ន្ធនឹងកីឡាល្បុក្កតោ កម្ពុជាមានការរៀបចំក្រុមជំនាញស្រាវជ្រាវ និងចងក្រង ដោយចំណាយទាំងពេលវេលា និងប្រាក់កាសអស់ជាច្រើន ខណៈដែលនៅក្នុងនោះក៏បានពង្រឹងលើការបណ្ដុះបណ្ដាលអ្នកជំនាញដែលជាឯកសាររស់ហើយថតជាឯកសារជាច្រើនផងដែរ ទើបលោកជឿជាក់យ៉ាងខ្លាំងថា ក្នុងឆ្នាំ២០១៩ខាងមុខ គឺល្បុក្កតោកម្ពុជានឹងត្រូវបានដាក់បញ្ចូលជាសម្បត្តិបេតិកភ័ណ្ឌពិភពលោកដោយចៀសមិនផុត ។ លោកថា ជារៀងរាល់ឆ្នាំអង្គការពិភពលោកមួយនេះ តម្រូវឱ្យប្រទេសនីមួយៗដាក់សំណើបញ្ចូលអ្វីមួយជាបេតិកភ័ណ្ឌពិភពលោកតែមួយៗប៉ុណ្ណោះ ដោយមួយឆ្នាំជារយៈពេលសិក្សា ហើយមួយឆ្នាំក្រោយពីដាក់សំណើទើបប្រកាសជាផ្លូវការ ។ អ៊ីចឹងហើយទើបកម្ពុជា ក៏ដូចជាប្រទេសដទៃ មិនអាចដាក់សំណើបញ្ចូលអ្វីមួយក្នុងពេលតែមួយបានទេ ខណៈលក្ខខណ្ឌនៃការដាក់បញ្ចូលក្នុងរយៈពេលចុងក្រោយ ក៏តឹងតែងជាងមុន ជាពិសេសសម្រាប់ការដាក់បញ្ចូលប្រភេទសិល្បៈ ឬក្បាច់គុនដែលមានពេលខ្លះមានលក្ខណៈស្រដៀងនឹងរបស់ជាតិសាសន៍ដទៃ។
លោក វ៉ាត់ ចំរើន បន្តថា បន្ទាប់ពីឯកសារល្បុក្កតោត្រូវបានបញ្ជូនដល់ដៃយូណេស្កូហើយក្រុមការងារជំនាញរបស់កម្ពុជាក៏កំពុងដុតដៃដុតជើងចងក្រងឯកសារកីឡាអុកចត្រង្គនិងចំបាប់បុរាណ ដើម្បីត្រៀមដាក់បញ្ចូលជាសម្បត្តិបេតិកភ័ណ្ឌពិភពលោកផងដែរ ។ លោកអះអាងថា មកទល់ពេលនេះ ក្រុមជំនាញទាំងពីរក្រុមស្ថិតក្នុងភាពសកម្មមិនខុសគ្នាក្នុងការចងក្រង និងផលិតជាវីដេអូឯកសារ ដើម្បីធ្វើជាឯកសារយោង ។ យ៉ាងណាមិញ មិនទាន់ដឹងថា តើកីឡាណាមួយនឹងត្រូវបានដាក់បញ្ចូលមុននោះទេ ដោយរង់ចាំទាល់តែឯកសារត្រូវបានផលិតរួចរាល់ ហើយត្រូវចំណាយពេលត្រួតពិនិត្យមើលថាឯកសារណាមួយគ្រប់គ្រាន់ និងពេញលេញជាមុនសិន ។
លោកអះអាងថា មិនទាន់ប្រាកដថា ក្រុមការងារដែលរៀបឯកសារហើយមុន នឹងត្រូវបានដាក់បញ្ចូលមុនទេ ដោយសារតែឯកសារខ្លះក៏ត្រូវត្រួតពិនិត្យឡើងវិញ ហើយត្រូវការការធ្វើបន្ថែមដែលអាចចំណាយពេលច្រើន តែសម្រាប់ក្រុមខ្លះដែលសម្រេចផែនការ ទើបតែ៣០ភាគរយឬ៤០ភាគរយ ហើយឯកសារទាំងនោះពេញលេញ អាចនឹងយកជាការបានមុនក៏ថាបាន ។ លោក វ៉ាត់ ចំរើន បន្តថា រវាងអុកចត្រង្គ និងចំបាប់បុរាណ លោករំពឹងថា អុកចត្រង្គ នឹងត្រូវបានដាក់ទៅឱ្យអង្គការយូណេស្កូមុន ដោយសារតែកីឡាប្រភេទនេះ កម្ពុជាមានឯកសារយោងគ្រប់គ្រាន់ ហើយបើនិយាយពីភាពចំណាស់នៃកីឡា និងភាពខុសប្លែកពីកីឡាផ្សេងទៀតរបស់ប្រទេសដទៃ ក៏មានគ្រប់គ្រាន់ផងដែរ។ ម្យ៉ាងមកពីកម្ពុជាចង់ដាក់កីឡាមួយនេះឱ្យអន្តរជាតិបានស្គាល់កាន់តែច្បាស់ពីកម្ពុជាផង ទើបកីឡាអុកចត្រង្គអាចនឹងត្រូវបានដាក់បញ្ចូលជាសម្បត្តិបេតិកភ័ណ្ឌពិភពលោកបន្ទាប់ពីកីឡាល្បុក្កតោត្រូវបានប្រកាសជាផ្លូវការ ។
មកទល់ពេលនេះ លោកថា អុកចត្រង្គកាន់តែមានការស្គាល់ពីសំណាក់ជាតិ និងអន្តរជាតិ ជាពិសេសនៅក្នុងព្រឹត្តិការណ៍អង្គរសង្ក្រាន្ត ដែលការប្រកួតជារៀងរាល់ឆ្នាំកាន់តែបង្ហាញកាន់តែច្បាស់ពីភាពអស្ចារ្យរបស់កីឡាអុកចត្រង្គ ដែលនឹងងាយស្រួលក្នុងការដាក់សំណើទៅអង្គការយូណេស្កូ ។ លោកមិនទាន់សម្លឹងឃើញកីឡាណាផ្សេងដើម្បីចងក្រងឯកសារដូចគ្នានេះទេ បន្ទាប់ពីកីឡាទាំង៣ប្រភេទនៅមិនទាន់សម្រេចគោល
ដៅក្លាយជាសម្បត្តិបេតិកភ័ណ្ឌពិភពលោកនៅឡើយ ។ លោកនិយាយថា៖«ឥឡូវនេះ យើងកំពុងខ្វល់រឿងកីឡាទាំង៣(ល្បុក្កតោ អុកចត្រង្គនិងចំបាប់បុរាណ)អ៊ីចឹងយើងអត់ទាន់គិតឃើញថា កីឡាណាទៀតនឹងត្រូវគួរដាក់សំណើបន្តទេ ប៉ុន្តែបើកីឡាដែលយើងកំពុងស្នើហ្នឹងបានចូលសិនគឺទើបគិតបន្តទៀត»។ លោកថា បើគ្មានការប្រែប្រួល ល្បុក្កតោនឹងក្លាយជាសម្បត្តិបេតិកភ័ណ្ឌពិភពលោកនៅឆ្នាំ២០១៩ ហើយអុកចត្រង្គ
នឹងចូលក្នុងឆ្នាំ២០២១ និងចំបាប់បុរាណនឹងចូលឆ្នាំ២០២៣ ប៉ុន្តែភាពជាក់ស្ដែងគឺនៅរង់ចាំអ៊ុតមើលនៅឡើយទេ ៕
ចែករំលែកព័តមាននេះ