ខេត្តកំពង់ចាម ៖ ដើម្បីអបអរសាទរក្នុងពិធីបុណ្យចូលឆ្នាំប្រពៃណីជាតិខ្មែរនាពេលខាងមុខឲ្យកាន់តែ
សប្បាយនោះនៅវត្តនគរបាជ័យក្រៅ ក្នុងឃុំអំពិល ស្រុកកំពង់សៀម បានរៀបចំតុបតែងជាបណ្តើរៗ។
ហើយការធ្វើនេះប្រយោជន៍ថែរក្សានូវប្រពៃណីរបស់ដូនខ្មែរ ឲ្យនៅគង់វង្សយូរអង្វែងតាមរយៈយុវជន យុវនារី ដែល ជាទំពាំងស្នងឫស្សី ដ៏មានសារៈសំខាន់ក្នុងការថែរក្សាប្រពៃណីខ្មែរ។ព្រះភិក្ខុរតនប្បញ្ញោ សេង រដ្ឋា ចៅអធិការវត្តនគរបាជ័យក្រៅ មានថេរដីកាឲ្យដឹងនៅព្រឹកថ្ងៃទី២៨ មីនា ២០១៨ថា ដោយមានការស្រុះស្រួលពីគណៈកម្មការអាចាវត្យ ព្រមទាំងពុទ្ធបរិស័ទចំណុះជើងវត្តបានរៀបចំនៅបរិវេណវត្តក្នុងនោះមានដូចជា លម្អខ្លោងទ្វារ រូបសំណាក់ឆ្កែយក្ស កន្សែងឡើងសសរខ្លាញ់ រួមនឹងល្បែងប្រជាប្រិយជាច្រើនទៀត ចោលឈូង ទាញព្រ័ត្រ ប្រយោជបង្កើតនូវភាពសប្បាយរីករាយដល់ប្រជាពលរដ្ឋនៅគ្រប់ទិសទី ដែលបាននាំគ្នាមកលេងវត្តនេះ។
ចៅអធិការវត្តនគរបាជ័យក្រៅ មានថេរដីកាបន្តថា ចាប់តាំងពីពេលដែលព្រះអង្គបានឡើងកាន់តំណែងជាចៅអធិការវត្ត ក្នុងរយៈពេល៤ឆ្នាំជាប់ៗគ្នា គឺបានរៀបចំនូវកម្មវិធីរាល់ឆ្នាំ មានល្បែងប្រជាប្រិយនៅក្នុងវត្ត ហើយការតាមកត់សម្គាល់ឃើញថា ពីមួយឆ្នាំទៅមួយឆ្នាំពលរដ្ឋក្មេងចាស់ប្រុសស្រីមកលេងកាន់តែ មានការកើនឡើងជាលំដាប់ផងដែរ។ កម្មវិធីដំណើរការទៅបាននោះ អាស្រ័យដោយមានការជួយឧបត្ថម្ភជ្រោមជ្រែងពីសំណាក់អាជ្ញាធរខេត្ត អាជ្ញាធរស្រុក ព្រមទាំងមន្ទីរធម្មការ និងសាសនាខេត្តទើបធ្វើឲ្យពីធីសប្បាយៗកកើតឡើងជាបន្តបន្ទាប់។ ហើយក្នុងឱកាសបុណ្យចូលឆ្នាំប្រពៃណីជាតិខ្មែរនៅឆ្នាំ២០១៨ ដែលប្រព្រឹត្តក្នុងពេលដ៏ឆាប់ខាងមុខនេះនឹងមានល្បែងប្រជាប្រិយជាច្រើនលេងដើម្បីឲ្យមានការចូលរួមពីស្រទាប់យុវជនយុវនារី និងជាការថែរក្សានូវវប្បធម៌របស់ខ្មែរយើងឲ្យនៅបានគង់វង្សទៅថ្ងៃអនាគត ហើយនឹងគ្រោងធ្វើធំជាងឆ្នាំកន្លងទៅ។
ចៅអធិការវត្តនគរបាជ័យក្រៅបញ្ជាក់ថា ប្រសិនណាបើគណៈកម្មការវត្តមិនបានស្រុះស្រួលគ្នាទេនោះកម្មវិធីក៏មិនអាចដំណើរការទៅរួចដែរ។ រាល់ថ្ងៃនេះមានដូនជី តាជី និងព្រះសង្ឃបានខិតខំរៀបចំធ្វើ ខ្លោងទ្វារដើម្បីលម្អបរិវេណវត្ត ឲ្យកាន់តែមានភាពស្រស់ស្អាត ប្រយោជន៍ទាក់ទាញពលរដ្ឋទាំងទីជិតទីឆ្ងាយឲ្យមកកម្សាន្តលេងច្រើន ពោលគឺកាត់បន្ថយទៅលេងនៅទីឆ្ងាយផងដែរ។ មួយវិញទៀតបានលោក ប៉េង ឈុន ម្ចាស់អាហារដ្ឋានស្មៅទន្លេ នៅក្រុងកំពង់ចាម ក៏បានចំណាយកម្លាំងកាយ កម្លាំងចិត្តមកជួយតុបតែង រួមទាំងថវិការថែមទៀតផង។ គិតរហូតមកដល់ព្រឹកថ្ងៃទី២៨ មីនា ការតុបតែងបានប្រហែលជាង៤០ភាគរយ ហើយគ្រោងនឹងបញ្ចប់ឲ្យបានឆាប់ៗក្នុងពេលខាងមុខនេះ ហើយក៏មានដាក់តន្ត្រីសម័យច្រៀងរាំកម្សាន្តលេងសប្បាយថែមទៀត៕
ចែករំលែកព័តមាននេះ