ប្រទេសអង់គ្លេស-ប្រទេសរុស្ស៊ី ៖ នាយករដ្ឋមន្ត្រីអង់គ្លេស លោកស្រី THERESA MAY ឱ្យដឹងនាថ្ងៃទី២៧ មីនា ថា វិធានការថ្មីៗនឹងត្រូវចាត់ទៀតប្រឆាំងរុស្ស៊ីក្រោយការប៉ុនប៉ងធ្វើឃាតកាលពីដើមខែមីនា នៅចក្រភពអង់គ្លេសអតីតចារបុរសរុស្ស៊ីម្នាក់ និងកូនស្រីដែលគេទម្លាក់ការទទួលខុសត្រូវលើរុស្ស៊ី ។
ប្រទេសអៀរឡង់ ម៉ុលដាវី បែលហ្ស៊ិក និងអូតង់ទើបប្រកាសនាថ្ងៃទី២៧ មីនា ពីការបណ្តេញអ្នកការទូតរុស្ស៊ីក្រោយរលកនៃការបណ្តេញចេញប្រកាសនាថ្ងៃទី២៦ មីនា ដោយប្រទេសជាច្រើន ដើម្បីសម្តែងសាមគ្គីភាពជាមួយរដ្ឋាភិបាលអង់គ្លេស ។
ក្រុងឡុងដ៍ប្រកាសនាពាក់កណ្តាលខែមីនាពីការបណ្តេញអ្នកការទូតរុស្ស៊ី២៣នាក់ ចោទថា ជាចារបុរសក្រោមការបិទបាំងខាងការទូត ។ ប៉ុន្មានថ្ងៃក្រោយមក ក្រុងមូស្គូបានតបតវិញបណ្តេញអ្នកការទូតអង់គ្លេស ក្នុងចំនួនដូចគ្នាព្រមទាំងបិទស្ថានកុងស៊ុលអង់គ្លេសប្រចាំទីក្រុងសាំងប៉េទ័រស្បួរ ។
យោងតាមលោកស្រី May ថា ប្រទេស២៥ប្រកាសរួចហើយពីការបណ្តេញពួកអ្នកការទូតរុស្ស៊ី ។ ក្នុងចំណោមប្រទេសទាំងនោះរួមមានប្រទេសអឺរ៉ុប២២គិតទាំងអង់គ្លេស ព្រមទាំងសហរដ្ឋអាមេរិកដែលប្រកាសបណ្តេញអ្នកការទូតរុស្ស៊ី៦០នាក់ ប្រទេសកាណាដា និងអូស្ត្រាលី ។ បែលហ្ស៊ិកទើបប្រកាសពីការបណ្តេញអ្នកការទូតរុស្ស៊ីម្នាក់ ។ អគ្គលេខាធិការអូតង់ប្រកាសពីការបណ្តេញអ្នកការទូតរុស្ស៊ី៧នាក់ ។
អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា ហ្សាខារ៉ូវ៉ា ក្នុងសន្និសីទសារព័ត៌មាននាថ្ងៃទី២៧ មីនា លាតត្រដាងពីការមួលបង្កាច់មតិសាធារណៈយ៉ាងធំរបស់អង់គ្លេសលើរឿងបំពុលអតីតចារបុរសរុស្ស៊ី ដោយលោកស្រីលើកពីបរាជ័យយ៉ាងអាម៉ាស់របស់លោកស្រី THERESA MAY ។ ឯកសារនានាដែលលោកស្រីបង្ហាញពីការមួលបង្កាច់នោះត្រូវបានចុះផ្សាយដោយកាសែតរុស្ស៊ី KOMMERSANT ៕
ចែករំលែកព័តមាននេះ