រាជធានីភ្នំពេញ ៖ បន្ទាប់ពីទទទួលដំណឹងថា ត្រូវដកតំណែងពីអភិបាលខេត្តតាកែវទៅក្នងបម្រើការនៅក្រសួងមហាផ្ទៃវីញ ក្តីលោក ឡាយ វណ្ណៈអភិបាលខេត្តតាកែវបានអះអាងថា លោកនៅតែស្រឡាញ់ទឹកដីខេត្តតាកែវជានិច្ច ។ នេះបើតាមហ្វេសប៊ុកផ្លូវការរបស់លោក ។
លោកឡាយ វណ្ណៈបានសរសេនៅលើបណ្តាញសង្គមហ្វេសប៊ុកយ៉ាងដូច្នេះថា «ទោះបីខ្លួនខ្ញុំត្រូវបានផ្លាស់ទៅដល់ទីណាក៏ដោយ តែបេះដូងខ្ញុំនឹងនៅទីនេះក្នុងខេត្តតាកែវជាមួយបងប្អូនជានិច្ច ។ ខ្ញុំនៅតែនឹក និងគោរពស្រឡាញ់បងប្អូនមន្ត្រីរាជការសហការីកងកម្លាំងប្រដាប់អាវុធ និងប្រជាពលរដ្ឋទូទាំងខេត្តតាកែវយើងដដែល ខេត្តតាកែវជាទឹកដីដែលខ្ញុំស្រឡាញ់ស្មើជីវិត» ។
ជាមួយគ្នានោះដែរលោកក៏បានស្នើពលរដ្ឋដែលមានចិត្តគោរព ស្រឡាញ់ និងអាណិតដល់លោកសូមមេត្តាកុំភ្លេចទៅបោះឆ្នោតជូនគណបក្សប្រជាជនកម្ពុជាយើងនៅថ្ងៃទី២៩ ខែកក្កដា ២០១៨ ឲ្យបានឈ្នះភ្លូកទឹកភ្លូកដី ដើម្បីគាំទ្រសម្តេចតេជោ ហ៊ុន សែន បន្តធ្វើជានាយករដ្ឋមន្ត្រីរក្សាបានសន្តិភាពស្ថេរភាពនយោបាយ និងការអភិវឌ្ឍផងដែរ ។
លោកបន្តថា ខ្ញុំសូមគោរពថ្លែងអំណរគុណដល់រាជរដ្ឋាភិបាលដែលបានផ្តល់ឱកាសឲ្យខ្ញុំបាទ បានដឹកនាំខេត្តតាកែវ រយៈពេលជាង៤ឆ្នាំកន្លងមកនេះ និងសូមអរគុណចំពោះការគាំទ្រកន្លងមកពីសំណាក់បងប្អូនមន្ត្រីរាជការ សហការី កងកម្លាំងប្រដាប់អាវុធ និងប្រជាពលរដ្ឋទាំងអស់ចំពោះរូបខ្ញុំ ។
ជាមួយគ្នានោះដែរ លោកអភិបាលក៏បានជូនពរលោក អ៊ូច ភា ដែលត្រូវទទួលដំណែងអភិបាលខេត្តតាកែវថ្មីឲ្យទទួលបានជោគជ័យដ៏ត្រចះត្រចង់ក្នុងការដឹកនាំខេត្តតាកែវបន្តទៅមុខទៀត ។
សូមជម្រាបថា សម្តេចសាយ ឈុំ ប្រមុខរដ្ឋស្តីទី និងជាប្រធានព្រឹទ្ធសភាបានសម្រេចដកលោកឡាយ វណ្ណៈ ចេញពីអភិបាលខេត្តតាកែវទៅបម្រើការងារនៅទីស្តីការក្រសួងមហាផ្ទៃ ដោយដាក់ជំនួសលោក អ៊ូ ភា ធ្វើជាអភិបាលខេត្តតាកែវវិញ ។
យ៉ាងណាក្តីការដកតំណែងអភិបាលខេត្តតាកែវដោយស្ងាត់ៗនេះធ្វើឲ្យមានការភ្ញាក់ផ្អើលពីស្រទាប់អ្នកលេងហ្វេសប៊ុកពិសេសនោះអ្នកគាំទ្រការដឹកនាំរបស់លោកកន្លងមក ។
ជាកត់សម្គាល់ការដក់តំណែងនេះ ត្រូវបានគេសង្កេតឃើញថា បន្ទាប់ពីមានករណីបង្ក្រាបទីតាំងប្រជល់មាន់មួយយ៉ាងធំនៅក្នុងទឹកដីខេត្តតាកែវ កាលពីពេលកន្លងមក រហូតចាប់បានអ្នកលេងជាច្រើនរូបផងដែរ ៕
ចែករំលែកព័តមាននេះ