ខេត្តព្រះសីហនុ ៖ មន្ទីរការងារ និងបណ្តុះបណ្តាលវិជ្ចាជីវៈខេត្តព្រះសីហនុ បានរៀបចំអបអរសាទរខួបអនុស្សាវរីយ៍លើកទី១៣២ នៃទិវាពលម្មអន្តរជាតិ១ឧសភា កម្មវិធីប្រកួតសម្រស់ឯកវាយនភណ្ឌឆ្នាំ២០១៨ វគ្គជម្រុះមណ្ឌលខេត្តព្រះសីហនុ ក្រោមអធិបតីភាពលោកយន្ត មីន អភិបាលខេត្តព្រះសីហនុ និងលោកជំទាវ នៅបរិវេណសាលាស្រុកព្រៃនប់ នារសៀលថ្ងៃទី២៥ ខែមីនា ឆ្នាំ២០១៨ ។
លោកយ៉ូវ ខេមរា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុមានប្រសាសន៍ថា ដើម្បីអបអរខួបអនុស្សាវរីយ៍លើកទី១៣២ ទិវាពលកម្មអន្តរជាតិ ១ឧសភា ក្រសួងការងារបណ្ដុះបណ្ដាលវិជ្ជាជីវៈ សហការជាមួយសមាគមរោងចក្រកាត់ដេរនៅកម្ពុជា GMAC សហភាពសហសហព័ន្ធយុវជនកម្ពុជា អង្គការសហជីព ប្រឡងជ្រើសរើសសម្រស់ឯកវាយនភណ្ឌឆ្នាំ២០១៨ ដើម្បីបង្កបរិយាកាសសប្បាយរីករាយជូនបងប្អូនកម្មករ និងការយល់ដឹងពាក់ព័ន្ធនឹងច្បាប់ស្តីពីការងារបង្កើនភាពសុខដុមរមនារវាងនិយោជកនិងកម្មករ និយោជិក ក្នុងនោះកំណត់យកទីតាំង៤មណ្ឌល ក្នុងការប្រឡងជ្រើសរើសសម្រស់ឯកវាយនភណ្ឌ គឺមណ្ឌលរាជធានីភ្នំពេញ ខេត្តព្រះសីហនុ ស្វាយរៀង និងខេត្តបន្ទាយមានជ័យ សម្រាប់ប្រលងជ្រើសរើសសម្រស់ឯកវាយនភណ្ឌប្រចាំឆ្នាំ២០១៨ ។
លោកយ៉ូវ ខែមរ៉ា ប្រធានមន្ទីការងារខេត្តព្រះសីហនុ បានឡើងអានរបាយការណ៍ថា មណ្ឌលខេត្តព្រះសីហនុ មានខេត្តព្រះសីហនុ កោះកុង កំពត និងខេត្តកែប មានបេក្ខជន បេក្ខនារី ដាក់ពាក្យប្រឡងជ្រើសរើសសម្រស់ឯកវាយនភណ្ឌប្រចាំឆ្នាំសរុប១៧៥នាក់ ស្រី១២៣នាក់ ក្នុងនោះបេក្ខជនខេត្តព្រះសីហនុ មានចំនួន ១០៧នាក់ ស្រី៧៣នាក់, ខេត្តកោះកុង៥០នាក់ ស្រី៣៥នាក់, ខេត្តកំពត១៨នាក់ ស្រី៣នាក់ ដោយឡែកខេត្តកែប មិនបានបញ្ជូនបេកជនចូលរួមប្រឡងសម្រស់ឯកវាយនភណ្ឌនោះទេ។ ការប្រឡងសម្រស់ឯកវាយនភណ្ឌ២០១៨ សម្រាប់មណ្ឌលខេត្តព្រះសីហនុនាពេលនេះ គឺជ្រើសរើសយកបេក្ខជន៣រូបនិងបេក្ខនារី៣រូបក្នុងចំណោមបេក្ខជន បេក្ខនារី ដែលបានដាក់ពាក្យចូលរួមប្រឡង ។ ការប្រឡងវគ្គផ្ដាច់ព្រ័ត្រនឹងប្រព្រឹត្តនៅថ្ងៃទី១ ខែឧសភា ឆ្នាំ២០១៨ នៅមជ្ឈមណ្ឌល់កោះពេជ្ររាជធានីភ្នំពេញ ។
លោកយន្ត មីន អភិបាលខេត្តព្រះសីហនុ បានថ្លែងថា ការប្រឡងជ្រើសរើសសម្រស់ឯកវាយនភណ្ឌនេះ គឺជាការប្រារព្ធជាលើកទី៤ហើយ នៅទូទាំងប្រទេស ប៉ុន្តែសម្រាប់មណ្ឌលខេត្តព្រះសីហនុ ការប្រឡងជ្រើសរើសសម្រស់ឯកវាយនភណ្ឌនេះជាលើកទី៣ ហើយកម្មវិធីនេះក្រោមការយកចិត្តទុកដាក់ផ្ដួចផ្ដើមរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ ជាមួយគ្នានេះក្រសួងការងារបានផ្ដល់ឱកាសដល់ បងប្អូនកម្មករ កម្មការិនីរោងចក្រកាត់ដេរ ចូលរួមប្រកួតប្រជែង ដើម្បីបញ្ចេញនូវសមត្ថភាពរបស់ខ្លួនម្នាក់ក្នុងកម្មវិធីសម្រស់ឯកវាយនភណ្ឌឆ្នាំ២០១៨ ឈានទៅប្រឡងជ្រើសរើសនៅថ្នាក់ជាតិ នេះជាកិត្តិយសសម្រាប់ខេត្តព្រះសីហនុរបស់យើង ដើម្បីអភិវឌ្ឍការរស់នៅប្រកបដោយសុខដុមរមនា តាមសមត្ថភាពជំនាញ រៀងៗខ្លួន ។
លោកអភិបាលខេត្តព្រះសីហនុសង្ឃឹមថា ពេលនេះយើងនឹងជ្រើសរើសបានសម្រស់ឯកវាយនភណ្ឌឆ្នាំ២០១៨ ប្រចាំមណ្ឌលខេត្តព្រះសីហនុ ដើម្បីឈានទៅការ្រឡងជ្រើសរើសជ័យលាភីថ្នាក់ជាតិនៅពេលខាងមុខ ហើយរដ្ឋបាលខេត្ត សូមជូនពរដល់សម្រស់ឯកវាយនភណ្ឌមណ្ឌលខេត្តព្រះសីហនុ ឲ្យទទួលបានជោគជ័យនៅថ្នាក់ជាតិបន្តទៀត។
ជ័យលាភីផ្នែកបុរស លេខ១បានទៅលើឈ្មោះជួប សុធារី អាយុ២៨ឆ្នាំ បម្រើការនៅកាស៊ីណូយ៉ាឌូលី កម្ពស់១,៨០ម៉ែត្រ មកពីព្រះសីហនុ ។
លេខ២បានទៅលើ ឈ្នោះទូច ហ៊ុនហួរអាយុ២១ឆ្នាំ បម្រើការនៅរោងចក្រkknកម្ពស់ស់១,៧៨ម៉ែត្រមកពីកោះកុង ។ លេខ៣ បានទៅលើឈ្មោះទីច ទិត្យា អាយុ២៤ឆ្នាំ កម្ពស់១,៨៣ ពីរោងចក្រសេដ្ឋកិច្ចពិសេសបិតត្រាំង ខេត្តព្រះសីហនុ ។
ចំណែកផ្នែកនារីលេខ១ បានទៅលើប៊ិន អ៊័ន អាយុ២០ឆ្នាំ រោងចក្រម៉ែនអ៊ូកម្ពស់១,៦០ម៉ែត្រ ស្នាក់នៅខេត្តព្រះសីហនុ ។ លេខ២បានទៅលើឈ្មោះលី ស្រីនិច អាយុ២២ឆ្នាំរោងចក្រYAZAKI កម្ពស់១,៧២ម៉ែត្រ ពីកោះកុង ។ លេខ៣ បានទៅលើឈ្មោះសេ រិទ្ឋា អាយុ២០ឆ្នាំ រោងចក្រស៊ីណូប្រៅដ៍ កម្ពស់១,៦២ ខេត្តព្រះសីហនុ ។
សម្រាប់បេក្ខជនបែក្ខនារីទាំង៦នាក់នោះ ទទួលបានទឹកប្រាក់ក្នុង ម្នាក់ៗ៦០ម៉ឺនរៀល និងបានចូលរួមប្រកួតវគ្គផ្តាច់ព្រ័តនៅមជ្ឈមណ្ឌលកោះពេជ្រ រាជធានីភ្នំពេញ ថ្ងៃទី១ ឧសភា ២០១៨ ។
ចំណែកបែក្ខនារីបេក្ខជនដែលមិនជាប់ ទទួលបានរង្វាន់លួងចិត្តក្នុង ម្នាក់ៗម្នាក់៤០ម៉ឺនរៀល ចំនួន១៨នាក់ និង១២នាក់ទៀត បានទទួលស្បែកជើងម្នាក់មួយគូ ។
ការប្រឡងជ្រើសរើសសម្រស់ឯកវាយនភណ្ឌទូទាំងប្រទេសឆ្នាំ២០១៧ ផ្នែកបុរស លេខ១បានទៅខេត្តព្រះសីហនុ ចំណែកបេក្ខនារីលេខ២ បានទៅខេត្តព្រះសីហនុដែរ ៕
ចែករំលែកព័តមាននេះ