រាជធានីភ្នំពេញ ៖ មកទល់ពេលនេះ គេនៅមិនទាន់ឃើញកីឡាករល្បីឈ្មោះណាម្នាក់ ដែលនៅបន្តការប្រកួត ហើយមានលទ្ធភាពបើកក្លិបកីឡាផ្ទាល់ខ្លួននោះទេ ប៉ុន្តែក្រោយពេលពួកគេប្រកាសឈប់ប្រកួតទាំងស្រុង ទើបឃើញមានលទ្ធភាពបើកក្លិបផ្ទាល់ខ្លួន ដែលក្លិបទាំងនោះមួយចំនួនគឺជោគជ័យខ្លាំង ហើយមួយចំនួនក៏ត្រដាបត្រដួសណាស់ដែរ ។ កីឡាករល្បីឈ្មោះដែលមានមានសមត្ថភាពបើកក្លិបបង្ហាត់សិស្សទាំងនោះរួមមាន៖
+ ស៊ន អេលីត ៖ ដែលត្រូវគេស្គាល់ជាអតីតកីឡាករជម្រើសជាតិផ្នែកតេក្វាន់ដូ និងជាបងប្រុសរបស់កីឡាការិនីស៊ន សៀវម៉ី និងស៊ន ដាវីន ។ ក្លិបរបស់លោកគឺក្លិបតេក្វាន់ដូយីហោ«ស៊ន សៀវម៉ី»ស្ថិតនៅជាប់របងវិទ្យាល័យឫស្សីកែវ ដោយក្នុងក្លិបនេះ លោកជាអ្នកផ្ដើមបង្កើត ហើយក្រោយមកក៏បានដាក់បញ្ចូលប្អូនស្រីទាំងពីររបស់លោកឱ្យចូលរួមជាមួយ ។
មកទល់ពេលនេះ គេឃើញលោក និងស៊ន ដាវីនសកម្មជាងគេក្នុងការបង្វឹកសិស្ស ដោយក្លិបរបស់លោកក៏ទទួលបានប្រាក់ចំណូលមិនធម្មតាផងដែរពីការបង្វឹកសិស្សរាល់ថ្ងៃ ។ លោកបានទាំងអះអាងថា នេះជាប្រាក់ចំណូលដ៏ធំរបស់ខ្លួន និងប្អូនស្រីក្រោយពេលប្រកាសឈប់ពីកីឡាករ-កីឡាការិនីតេក្វាន់ដូទាំងស្រុង ។ យ៉ាងណាមិញ មនុស្សតិចណាស់មិនដឹងថា ក្លិបនេះជារបស់លោកទេ ដោយនឹកស្មានថានេះជាក្លិបរបស់កីឡាការិនី ស៊ន សៀវម៉ី ហើយលោកគ្រាន់តែជួយបង្ហាត់ក្មេងៗក្នុងនាមជាបងប្រុសប៉ុណ្ណោះ ។
លោកក៏មានគម្រោងបណ្ដុះក្មេងៗឱ្យក្លាយជាធនធានអ្នកប្រដាល់ល្អជំនួសលោកនិងប្អូនស្រីៗក្រោយពេលស៊ន សៀវម៉ី ប្រកាសឈប់ម្នាក់ទៀតក្នុងពេលខាងមុខផងដែរ។
+ អេ ភូថង ៖ លោកគឺជាអតីតកីឡាករល្បីឈ្មោះដែលមានក្លិបផ្ទាល់ខ្លួនជាយូរមកហើយ ប៉ុន្តែក្លិបលោកជួនកាលក៏ត្រូវបិទមួយរយៈ ជួនក៏ផ្អាកសកម្មភាព ដោយលោកត្រូវរកចំណូលពីការធ្វើគណៈកម្មការឱ្យគេផង បង្ហាត់គេផង និងធ្វើពិធីករកីឡាផង ដើម្បីទ្រទ្រង់ក្លិបទាំងមូល ។
ក្លិបរបស់លោកមានឈ្មោះ«អេភូថងកីឡា»ដោយបានបណ្ដុះកីឡាករច្រើននាក់ ឱ្យមានឈ្មោះបោះសំឡេង ប៉ុន្តែលោកអះអាងថា អត់មានអ្នកជ្រោមជ្រែងឱ្យរស់ស្រួលនោះទេ ទើបក្នុងពេលខ្លះគេឃើញអតីតកីឡាកររូបនេះស្រែករកជំនួយ ដើម្បីចិញ្ចឹមក្លិបដែលត្រដាបត្រដួស ។
លោកអះអាងថា ការងារបើកក្លិបមិនមែនដើម្បីផលចំណេញទេ ដោយសារតែកីឡាករភាគច្រើនគឺមិនតម្រូវឱ្យបង់ថ្លៃ ហើយមានតែផ្ដល់បាយទឹក និងរកការងារប្រដាល់ឱ្យ ប៉ុន្តែអ្វីដែលលោកតស៊ូ គឺចង់រួមចំណែកជួយដល់ការប្រដាល់ ។
+ នួន ភិរម្យ ៖ ក្រោយពីធ្លាក់ខ្លួនប្រដាល់លែងកើត លោកមិនត្រឹមតែប្រឡូកការងារជាគ្រូបង្វឹក និងជាគណៈកម្មការផ្ដល់ពិន្ទុនៅប៉ុស្ដិ៍បាយ័នប៉ុណ្ណោះទេ ក៏បានបើកក្លិបប្រដាល់មួយឈ្មោះ«ភារម្យគុនខ្មែរ»ទទួលការបណ្ដុះបណ្ដាលកីឡាករផងដែរ ដោយក្លិបរបស់លោកគឺតម្រូវឱ្យកីឡាករចង់ហាត់ផ្ដល់អង្ករ៥០គីឡូ ក្រាមនិងថវិកាមួយចំនួន ដើម្បីទ្រទ្រង់ការហូបចុករបស់កីឡាករដែលចង់ហាត់នោះក្នុងពេលហ្វឹកហាត់ ។
នេះជាក្លិបដែលលោកបានបើកនៅផ្ទះផ្ទាល់ខ្លួននៅម្ដុំតាខ្មៅ បន្ទាប់ពីលោកលក់ដីនៅស្រុកហើយទិញបានមួយកន្លែង ដោយសារភាពថា មានជាប់ជំពាក់បំណុលធនាគារដើម្បីបង្គ្រប់ថ្លៃផ្ទះនោះផង ។ លោកសារភាពថា មុខរបរបើកក្លិបគឺអត់ចំណេញទេ ប៉ុន្តែបណ្ដាលមកពីបិទទៅខ្មាសគេ ទើបប្រឹងតស៊ូ ។
+ នួន បូរ៉ា ៖ អតីតអ្នកប្រដាល់ល្បីឈ្មោះម្នាក់នេះ ក៏មានក្លិបប្រដាល់ផ្ទាល់ខ្លួនផងដែរ ប៉ុន្តែលោកមិនសូវថ្ងូរពីការលំបាកទេ ដែលអាចមកពីលោកមានការជ្រោមជ្រែងពីសប្បុរសជន និងមានលទ្ធភាពទ្រទ្រង់ក្លិបប្រដាល់របស់ខ្លួនឱ្យឈរជើងបាន ។ ក្លិបរបស់លោកគឺឈ្មោះ«កុលបុត្រគុនខ្មែរ»ហើយសន្ទុះនៃការបញ្ជូនកីឡាករឱ្យឡើងរេញ ក៏ច្រើនណាស់ដែរ ដោយលោកបានទាំងថ្ងូរថារកកីឡាករដើម្បីដាក់ឱ្យប្រកួតតាមប៉ុស្ដិ៍មិនបានផង ។
យ៉ាងណាមិញ លោកធ្លាប់ត្អូញត្អែរពីការលំបាករឿងកីឡាករមួយចំនួនមកហាត់បានតែលេងៗ ហើយដល់ពេលចេះស្ទាត់ក៏បាត់ខ្លួន។
+ បឺត សំខាន់ ៖ កីឡាករល្បីឈ្មោះរូបនេះ កាលពីដំបូងគ្រាន់តែជាគ្រូបង្វឹករបស់ក្លិប
«ហារ៉ាប់ស្វាយប៉ាក»ប៉ុណ្ណោះ ប៉ុន្តែដោយការព្យាយាម និងមានការជ្រោមជ្រែងពីប្រធានក្លិបចាស់ ក៏ប្រគល់ក្លិបមួយនេះឱ្យលោកទទួលខុសត្រូវតែម្ដង ដោយក្នុងពេលនេះ ក្លិបប្រដាល់របស់លោកបានសាងកេរ្តិ៍ឈ្មោះធ្វើឱ្យមានការទទួលស្គាល់យ៉ាងខ្លាំង ជាពិសេសពីសំណាក់អ្នកផ្គូផ្គងកីឡា ដោយសារតែសិស្សរបស់លោកគឺមិនថាក្មេងចាស់ សុទ្ធតែមានសមត្ថភាពមិនធម្មតា សូម្បីតែកីឡាករនោះទើបតែឡើងរេញបានម្ដងឬ២ដងក្ដី ។
លោកត្រូវបានគេស្គាល់ថា ជាអតីតអ្នកប្រដាល់ល្បីឈ្មោះប្រដំប្រសងជាមួយបឺត ខាំ តែបានទទួលជោគជ័យក្រោយពីមានក្លិបប្រដាល់ផ្ទាល់ខ្លួន។
+ ឈូក ច័ន្ទសុភ័ក្ដ្រ ៖ ក្រោយពីបោះបង់ការប្រដាល់ និងបានបញ្ចប់ការសិក្សានៅថ្នាក់មហាវិទ្យាល័យ លោកមិនត្រឹមតែបានក្លាយខ្លួនជាកងរាជអាវុធហត្ថប៉ុណ្ណោះទេ ប៉ុន្តែក៏បានបើកក្លិបប្រដាល់មួយផ្ទាល់ខ្លួនឈ្មោះ«ក្លិបឈូកវ៉ា» ដោយក្លិបរបស់លោកក៏ត្រូវគេអះអាងថាមានការជួយជ្រោមជ្រែងពីអ្នកស្រឡាញ់រាប់អាន និងពីអ្នកមានលុយ ដែលចង់លើកស្ទួយវិស័យកីឡាផងដែរ ទើបលោកមិនសូវខ្វល់រឿងអត់លុយអត់កាក់ដូចបណ្ដាម្ចាស់ក្លិបមួយចំនួន ។
មកទល់ពេលនេះ ក្លិបប្រដាល់របស់លោកមិនទាន់មានអាយុកាលចាស់វស្សាទេ ប៉ុន្តែចាប់ផ្ដើមមានកីឡាករឡើងប្រដាល់នឹងគេនឹងឯងហើយ ដោយគ្រាន់តែមិនសូវសកម្មខ្លាំងប៉ុណ្ណោះ។
+ ដួង បូរី ៖ លោកក៏ជាអតីតអ្នកប្រដាល់ដែលធ្លាប់សាងកេរ្តិ៍ឈ្មោះក្នុងជំនាន់លោក អេ
ភូថង ផងដែរ ប៉ុន្តែក្រោយមកក៏បាត់មុខឈឹង ហើយលេចមុខធ្វើជាគណៈកម្មការផ្ដល់ពិន្ទុនៅទូរទស្សន៍អាស៊ីអាគ្នេយ៍ ដោយមានក្លិបប្រដាល់ផ្ទាល់ខ្លួនមួយឈ្មោះក្លិប«អាណាចក្រខ្មែរ» ។
លោកអះអាងថា កីឡាកររបស់លោកឡើងរេញបានច្រើន ហើយក្លិបរបស់លោកក៏ស្ថិតក្នុងភាពខ្វះខាតច្រើនដែរ ដោយគ្រាន់តែលោកមិនហ៊ានបិទ និងមិនហ៊ានអំពាវនាវកុំឱ្យខ្មាសគេ ។
ក្រៅពីអតីតកីឡាករខាងលើ អតីតកីឡាករផ្សេងទៀត ក៏បានតស៊ូបើកក្លិបជារបស់ផ្ទាល់ខ្លួនបែបនេះផងដែរ ដោយគ្រាន់តែអតីតកីឡាករទាំងនោះមិនសូវល្បីក្នុងពេលនៅប្រដាល់ ហើយក្លិបដែលបានដំណើរការមានភាពលេចធ្លោក្នុងកម្រិតនៅឡើយ ។ ប៉ុន្តែគេឃើញអតីតកីឡាករច្រើនរូបបានប្រឡូកការងារជាគ្រូបង្វឹកឱ្យក្លិបផ្សេងៗផងដែរ៕
ចែករំលែកព័តមាននេះ