រាជធានីភ្នំពេញ ៖ ក្នុងចំណោមប្រភេទកីឡាទាំងអស់ដែលមានប្រជាប្រិយសម្រាប់ស្រទាប់មហាជន កីឡាប៊ូល និងប៉េតង់ត្រូវគេកត់សម្គាល់ថា មានការពេញនិយមកាន់
តែខ្លាំងនៅក្នុងចំណោមមនុស្សវ័យកណ្ដាលរហូតដល់វ័យចាស់ ដោយកីឡាប្រភេទនេះភាគច្រើនអ្នកលេងគឺជាអ្នករួមការងារជាមួយគ្នា និងលេងក្នុងលក្ខណៈមិត្តភាព សាមគ្គីភាព និកម្សាន្តផងដែរ ។ ប៉ុន្តែមួយចំនួនលេងដាក់ប្រាក់ជាលក្ខណៈល្បែងស៊ីសង បើទោះជាការលេងភ្នាល់នោះ គឺមានកម្រិតតិចតួចមិនធំដុំដូចគេលេងភ្នាល់បាល់ ឬប្រដាល់ក្តី ។
លោក វ៉ាត់ ចំរើន អគ្គលេខាធិការគណៈកមា្មធិការជាតិអូឡាំពិកកម្ពុជា ធ្លាប់បានបញ្ជាក់ហើយថា ក្នុងចំណោមប្រភេទកីឡាទាំងអស់ ដែលពេញនិយមក្នុងស្រទាប់មហាជនមានតែកីឡាមួយចំនួនប៉ុណ្ណោះដែលមានការគាំទ្រពេញទំហឹងនៅតាមសាលារៀន គ្រឹះស្ថានរបស់រដ្ឋ និងឯកជនមួយចំនួន ដោយកីឡាទាំងនោះរួមមាន បាល់ទាត់ បាល់ទះ និងបោះប៊ូលនេះឯង ។ នៅតាមបណ្ដាគ្រឹះស្ថានរបស់រដ្ឋ និងឯកជនទាំងនោះ លោកថាភាគតិចណាស់ ដែលមិនមានតារាងមួយក្នុងចំណោមកីឡាទាំង៣ ខណៈដែលបោះប៊ូល គឺពេញនិយមជាងគេ ដោយសារតែមិនត្រូវការទីលានធំ ហើយអាចលេងបានគ្នាច្រើន និងសប្បាយដូចគ្នា ដោយមិនប្រើកម្លាំងលេងច្រើនដូចគ្នានឹងកីឡាបាល់ទះ ឬបាល់ទាត់នោះផង ។ លោកថា កីឡាទាំង៣មិនចាំបាច់ទាល់តែកីឡាករទើបអាចលេងបាននោះទេ គឺសាមញ្ញជនដែលគ្រាន់តែមានចំណូលចិត្តលេងក៏អាចចូលរួមបានដែរ ទើបធ្វើឱ្យកីឡាទាំង៣នេះមានស្ទើរគ្រប់កន្លែង បើធៀបនឹងកីឡាផ្សេងទៀតដែលទាល់តែមានការបង្វឹកពីគ្រូបង្វឹក ទើបមានអ្នកលេង ហើយត្រូវបង់លុយទៀតផងនោះ ។
យ៉ាងណាមិញ លោកថា កីឡាទាំងនោះក៏មានផ្នែកៗរបស់វាផងដែរ ដោយលោកបានចាត់ទុកថា កីឡាបាល់ទះ និងបាល់ទាត់សម្រាប់ក្មេងៗដែលពេញកម្លាំង ហើយកីឡាបោះប៊ូលសម្រាប់ចាស់ៗដែលត្រូវការលំហែកាយ និងត្រូវការជួបជុំគ្នាលេងដើម្បីកម្សាន្ត និងមិត្តភាព ។
លោកថា អ្នកលេងកីឡានេះមិនគ្រាន់តែមានជំនាញខាងលេងមួយមុខគ្រប់គ្រាន់នោះទេ គឺត្រូវមានភាពឆ្លាតវៃ និងការគិតឱ្យល្អិតល្អន់ ជាក់ស្ដែងកីឡាបោះប៊ូលមិនមែនគ្រាន់តែបោះឱ្យអស់គ្រាប់ប៊ូលនោះទេ ប៉ុន្តែក៏ត្រូវវៃរឿងភ្នែក រហ័សរឿងគំនិត និងពូកែវិភាគទៀត ទើបអាចក្លាយជាអ្នកពូកែលេងកីឡានេះបាន។ អ៊ីចឹងហើយទើបកីឡាប្រភេទនេះ មិនសូវមានចំណូលចិត្តសម្រាប់ក្មេងៗនោះទេ ប៉ុន្តែគឺបានក្លាយជាកីឡាពេញនិយមសម្រាប់មនុស្សចាស់ៗ និងអ្នកដែលមិនសូវមានកម្លាំងហក់លោតខ្លាំង។
លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជាបានអះអាងថា កីឡាប៉េតង់កើតចេញពីការចង់លេងចង់ប្រកួតពីសំណាក់មហាជននេះហើយ ទើបធ្វើឱ្យសហព័ន្ធទាំងមូលជ្រើសរើសបានអ្នកលេងដែលមានសមត្ថភាពនៅពេលមានការបើកឱ្យប្រកួតម្ដងៗ ។ កាលពីមុន កីឡាមួយនេះលោកថា ស្ទើរមិនមានក្មេងៗចង់លេងនោះទេ ប៉ុន្តែសម្រាប់រយៈពេលចុងក្រោយគឺមានក្មេងចូលលេងខ្លះ ដែលមួយចំនួនចូលតាមការណែនាំ ហើយមួយចំនួនទៀតចូលដោយឃើញកីឡាករកីឡាការិនីប៉េតង់ច្រើននាក់បានចេញប្រកួតថ្នាក់ជាតិ និងក្រៅប្រទេស ។ យ៉ាងណាមិញ សម្រាប់កីឡាប៉េតង់នៅទីសាធារណៈ គឺនៅតែមិនសូវមានការចាប់អារម្មណ៍ពីសំណាក់ក្មេងៗនៅឡើយទេ ដោយសារតែអ្នកលេងកីឡាមួយនេះ ត្រូវការភាពអត់ធ្មត់ ហើយក៏ត្រូវមានកម្លាំងដៃ និងបោះត្រង់ឱ្យចំគោលដៅផងដែរ។
ផ្អែកតាមភាពជាក់ស្ដែង កីឡាប៊ូលដែលមានការពេញនិយមនៅតាមគ្រឹះស្ថានរដ្ឋ និងឯកជន ជាពិសេសនៅតាមសាលារៀននោះ មិនមែនបង្កើតលេងៗដើម្បីតែលេងជុំគ្នាប៉ុណ្ណោះទេ តែក៏មានការភ្នាល់តិចតួចអាស្រ័យតាមការចរចាផងដែរ ទើបគេឃើញមានការប្រមូលផ្ដុំគ្នាលេងមិនដែលខានរាល់ថ្ងៃ ដោយភាគច្រើនគឺអ្នកលេងជាមនុស្សវ័យកណ្ដាល និងវ័យចាស់។ នៅតាមវិទ្យាល័យធំៗស្ទើរតែទាំងអស់សុទ្ធតែមានទីលានបោះប៊ូលនៅក្នុងនោះដោយសារតែកីឡានេះមានការពេញនិយមសម្រាប់លោកគ្រូៗចាស់ដែលចង់បញ្ចេញញើស និងកម្លាំងនៅក្នុងកីឡា ហើយមិនអាចទៅលេងហក់លោតក្នុងប្រភេទកីឡាបាល់ទះនិងបាល់ទាត់ដូចគេបាន ។
លោកសាស្ត្រាចារ្យម្នាក់បង្រៀននៅវិទ្យាល័យឥន្ទ្រទេវី បានអះអាងថា លោកជុំគ្នាលេងប៊ូលមិនមែនលេងជាលក្ខណៈមិត្តភាពនោះទេ គឺមានការភ្នាល់ដាក់ប្រាក់តិចតួច ទើបជារៀងរាល់ល្ងាច ឬពេលឈប់សម្រាកមានការជួបជុំគ្នាលេងដោយមានច្រើនក្រុមឆ្លាស់គ្នាលេងដូចគ្នានឹងអ្នកលេងបាល់ដែរ ។ ពាក់ព័ន្ធនឹងការលេងភ្នាល់នេះលោកបញ្ជាក់ថា មិនមែនជាការលេងភ្នាល់ដាក់ប្រាក់ធំដុំនោះទេគឺដាក់តិចតួចដើម្បីបង្កើនការខំលេងទើបសប្បាយប៉ុណ្ណោះ ។
មកទល់ពេលនេះ កីឡាបោះប៊ូល មិនត្រូវគេឃើញបើកជាក្លិបដើម្បីបង្វឹកដល់សិស្សនោះទេ ដោយកន្លែងបង្វឹកមានតែនៅសហព័ន្ធក្រោមការគ្រប់គ្រងរបស់គណៈកមា្មធិការជាតិអូឡាំពិកប៉ុណ្ណោះ ទើបអ្នកលេងកីឡានេះគឺចេះតាមគ្នា លេងតាមគ្នាយ៉ាងពេញនិយម ជាពិសេសសម្រាប់មនុស្សចាស់ៗ ។ ក្នុងនោះអ្នកលេងទៀតសោត ក៏មិនសូវជានារីផងដែរ បើទោះជាកីឡាមួយនេះត្រូវគេឃើញនារីក្លាយជាតំណាងជម្រើសជាតិ ហើយរាល់ពេលចេញប្រកួតលើឆាកអន្តរជាតិរមែងទទួលបានមេដាយធ្វើឱ្យកម្ពុជាមានកិត្តិយសនិងមុខមាត់។
ទោះបីយ៉ាងណា មន្ត្រីសហព័ន្ធបានអះអាងថា ខ្លួនកំពុងស្វះស្វែងរកធនធានមនុស្សក្មេងៗឱ្យក្លាយជាអ្នកចូលចិត្តកីឡានេះកាន់តែច្រើន ដើម្បីផ្លាស់ប្ដូរបរិបទដែលថា កីឡាប៊ូល ពេញនិយមតែមនុស្សចាស់ឱ្យមកជាក្មេងៗវិញ។ ជាក់ស្ដែងនៅក្នុងសហព័ន្ធរាល់ថ្ងៃក៏មានក្មេងៗមកស្នងតំណែងច្រើនដែរ ដោយគ្រាន់តែពួកគេមិនទាន់មានសមត្ថភាពគ្រប់គ្រាន់សម្រាប់ឱ្យកម្ពុជាដាក់ជាតំណាងឱ្យទៅដណ្ដើមយកមេដាយលើឆាកអន្តរជាតិ៕
ចែករំលែកព័តមាននេះ