រាជធានីភ្នំពេញ ៖ សហព័ន្ធកីឡាល្បុក្កតោកម្ពុជា បានរៀបចំបើកវគ្គបណ្ដុះបណ្ដាលគ្រូ បង្វឹកលើកដំបូងដែលមានរយៈពេល៣ថ្ងៃ ចាប់ពីថ្ងៃទី២៧ដល់២៩ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយមានសិក្ខាកាមមកពីបណ្ដាខេត្ត-ក្រុងនានាចំនួន៣៧នាក់ចូលរួម ។…
រាជធានីភ្នំពេញ ៖ សហព័ន្ធកីឡាល្បុក្កតោកម្ពុជា បានរៀបចំបើកវគ្គបណ្ដុះបណ្ដាលគ្រូ
បង្វឹកលើកដំបូងដែលមានរយៈពេល៣ថ្ងៃ ចាប់ពីថ្ងៃទី២៧ដល់២៩ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយមានសិក្ខាកាមមកពីបណ្ដាខេត្ត-ក្រុងនានាចំនួន៣៧នាក់ចូលរួម ។
លោកគ្រូតាក្រមាមាស សាន គឹមស៊ាន ដែលជាគ្រូគុនល្បុក្កតោ និងជាស្ថាបនិកសហព័ន្ធកីឡាល្បុក្កតោមានប្រសាសន៍ថា វគ្គបណ្ដុះបណ្ដាលនេះពិតជាមានសារៈសំខាន់ខ្លាំងណាស់ ព្រោះវាជាក្ដីស្រមៃរបស់លោកជាយូរមកហើយ គឺលោកមានបំណងចង់បង្កើតឱ្យមានវគ្គបណ្ដុះបណ្ដាលគ្រូបង្វឹកមួយនេះតាំងពីឆ្នាំ២០០៥មកម៉្លេះ ។ ប៉ុន្តែដោយសារតែលោកគ្មានលទ្ធភាព ហើយកាលណោះវិស័យកីឡាល្បុក្កតោពុំទាន់មានការចាប់អារម្មណ៍ទើបធ្វើឱ្យមានការយឺតយ៉ាវ ចេះតែពន្យារពេលរហូតមកទល់នឹងសព្វថ្ងៃនេះ។
នៅក្នុងឆ្នាំ២០១៨នេះ សហព័ន្ធកីឡាល្បុក្កតោបានដាក់ចេញនូវផែនការយ៉ាងច្បាស់លាស់ជាពិសេសនៅក្នុងការប្រកួតកីឡាជាតិនាពេលឆាប់ៗខាងមុខនេះ ក្បាច់គុនល្បុក្កតោសង្ឃឹមថា កាន់តែទទួលបានការចាប់អារម្មណ៍ពីសំណាក់មហាជនខ្មែរ ។ ជាងនេះទៅទៀត លោកក៏មានបំណងចង់ជំរុញវិស័យកីឡាដែលជាកេរដំណែលវប្បធម៌ជាតិខ្មែរមួយនេះឱ្យកាន់តែមានភាពល្បីរន្ទឺនៅលើពិភពលោកនាពេលអនាគត ។
លោកគ្រូតាក្រមាមាស សាន គឹមស៊ាន ប្រធានបណ្ឌិតសភាក្បាច់គុនល្បុក្កតោកម្ពុជាបានមានប្រសាសន៍បន្តថា ក្បាច់គុនល្បុក្កតោរបស់ខ្មែរយើងមានរាប់ពាន់រាប់ម៉ឺនក្បាច់។ ប៉ុន្តែដើម្បីជំរុញវិស័យកីឡាមួយនេះឱ្យឈានជើងចូលឆាកអន្តរជាតិ និងមានភាពងាយស្រួលក្នុងការបង្ហាត់បង្ហាញ ជាដំបូងយើងត្រូវចងក្រងជាឯកសារហ្វឹកហាត់ឱ្យមានច្បាប់ទម្លាប់ត្រឹមត្រូវ មានផែនការហ្វឹកហាត់ច្បាស់លាស់មិនមែនចេះតែធ្វើតាមការនឹកឃើញនោះទេ ។ ដំបូងយើងធ្វើជាលក្ខណៈជាតិជាមុន ពេលទទួលបានជោគជ័យហើយទើបយើងបន្តឈានជើងចូលជាលក្ខណៈអន្តរជាតិ ផ្សព្វផ្សាយឱ្យបានទូលំទូលាយនៅលើពិភពលោកតែម្ដង ។
ក្នុងនាមរូបលោកជាប្រធានបណ្ឌិតសភាក្បាច់គុនល្បុក្កតោកម្ពុជា ដើម្បីជំរុញវិស័យកីឡាក្បាច់គុនល្បុក្កតោកម្ពុជាឱ្យមានភាពងាយស្រួលទាំងទៅប្រកួតនៅប្រទេសគេ ឬនាំគេមកប្រកួតនៅប្រទេសយើង គឺត្រូវធ្វើយ៉ាងណាកែសម្រួលឡើងវិញខ្លះៗនូវវិញ្ញាសាប្រកួតមួយចំនួន ។ តើក្បាច់គុនណាខ្លះត្រូវជ្រើសរើសយកមកដាក់បញ្ចូលនៅក្នុងបញ្ជីហ្វឹកហាត់ ព្រោះក្បាច់គុនមានរាប់រយរាប់ពាន់មិនអាចយកទៅទាំងអស់បានទេ ធ្វើយ៉ាងណាឱ្យគេទទួលបាននិងមានភាពងាយស្រួលក្នុងការហ្វឹលហាត់ ។ ដូច្នេះ វគ្គបណ្ដុះបណ្ដាលគ្រូបង្វឹកនាពេលនេះ គោលបំណងសំខាន់គឺចង់ឱ្យពួកគាត់ដែលជាសិកា្ខកាមទទួលបាននូវចំណេះដឹងថ្មីកម្មវិធីហ្វឹកហាត់ថ្មី និងដើម្បីក្លាយជាប្រភេទកីឡាថ្នាក់ជាតិមានកម្មវិធីប្រកួតថ្នាក់ជាតិដូចប្រភេទកីឡាដទៃទៀតដែរ។
លោកសង្កត់ធ្ងន់ថា ដើម្បីជំរុញក្បាច់គុនល្បុក្កតោមានឱកាសបង្ហាញខ្លួននៅលើឆាកអន្តរជាតិនៅថ្ងៃអនាគត ជាដំបូងយើងត្រូវរៀបចំពង្រឹងការហ្វឹកហាត់ មានផែនការច្បាស់លាស់ត្រឹមត្រូវតាមស្តង់ដារួចរាល់អស់ហើយទើបយើងបន្តផ្សព្វផ្សាយនៅលើឆាកអន្តរជាតិតែម្ដង ។ បានន័យថា បើយើងជាម្ចាស់ក្បាច់គុនខ្លួនឯងមិនទាន់រឹងមាំផងទៅបង្ហាត់គេក៏មិនកើតដែរ៕
ចែករំលែកព័តមាននេះ