ទីក្រុងសេអ៊ូល ៖ កាលពីថ្ងៃចន្ទ សហរដ្ឋអាមេរិកបានអនុញ្ញាតឲ្យកូរ៉េខាងត្បូងរួចផុតពីការដាក់ពន្ធលើដែកថែប និងដាក់តែកូតាប៉ុណ្ណោះ ខណៈប្រទេសទាំងពីរព្រមព្រៀងលើការកែទម្រង់កិច្ចព្រមព្រៀងពាណិជ្ជកម្ម ដែលលោកប្រធានាធិបតីអាមេរិក ដូណាល់ ត្រាំ រិះគន់យ៉ាងខ្លាំង ។
តាមក្រសួងពាណិជ្ជកម្ម ប្រទេសកូរ៉េខាងត្បូងនឹងអនុញ្ញាតឲ្យក្រុមហ៊ុនផលិតយានយន្តអាមេរិកកាន់តែងាយស្រួលចូលក្នុងទីផ្សារ ក្រោមកិច្ចព្រមព្រៀងពាណិជ្ជកម្មសេរីទ្វេភាគីដែលមានឈ្មោះថា KORUS ។
កាលពីខែមេសា លោកត្រាំ និយាយថា លោកអាចនឹងចរចា ឬបញ្ចប់កិច្ចព្រមព្រៀងពាណិជ្ជកម្មមិនល្អនេះ ដែលវាបង្កឲ្យឱនភាពពាណិជ្ជកម្មរបស់អាមេរិកជាមួយកូរ៉េខាងត្បូងកើនឡើងទ្វេដង តាំងពីឆ្នាំ២០១២មក ។
ប៉ុន្តែកិច្ចព្រមព្រៀងកាលពីថ្ងៃចន្ទ មានន័យថា ប្រទេសកូរ៉េខាងត្បូង គឺជាសម្ព័ន្ធមិត្តទី១របស់អាមេរិក ដែលអាចរួចផុតពីការដាក់ពន្ធលើដែកថែប ។
រដ្ឋមន្ត្រីពាណិជ្ជកម្មកូរ៉េខាងត្បូង លោក Kim Hyun-Chong បានថ្លែងថា ៖« ពួកយើងបានចរចាយ៉ាងក្តៅគគុកមួយ ។ កិច្ចព្រមព្រៀងថ្មីៗនេះបានដករាល់ភាពមិនប្រាកដប្រជាទាំងឡាយ » ។
កាលពីសប្តាហ៍មុន លោកត្រាំ បានអនុញ្ញាតឲ្យដៃគូពាណិជ្ជកម្មចំនួន៦ប្រទេសរួចផុតពីការដាក់ពន្ធជាបណ្តោះអាសន្ន ដូចជា ប្រទេសកាណាដា, ម៉ិកស៊ិក, អូស្ត្រាលី និងសហភាពអឺរ៉ុប ជាដើម ។
ប៉ុន្តែប្រទេសជប៉ុនមិនទាន់រួចផុតទេ ។ ក្រុមហ៊ុនរបស់ជប៉ុនបានចាប់ផ្តើមដំណើរការស្នើឲ្យរួចផុតពីការដាក់ពន្ធលើដែកថែប និងអាលុយមីញ៉ូមនាំចូលនេះផងដែរ ។
រដ្ឋាភិបាលអាមេរិកត្រូវការរយៈពេលប្រមាណ៩០ថ្ងៃក្នុងការសម្រេចថា តើត្រូវដកចេញនូវផលិតផលណាមួយពីពន្ធគយ ។
រដ្ឋមន្ត្រីពាណិជ្ជកម្មប្រទេសជប៉ុន លោក Hiroshige Seko បានថ្លែងកាលពីថ្ងៃសុក្រថា លោកគិតថា សហរដ្ឋអាមេរិកនឹងអនុញ្ញាតឲ្យផលិតផលមួយចំនួនរួចផុតពីការដាក់ពន្ធនេះ ៕
ចែករំលែកព័តមាននេះ