ខេត្តស្វាយរៀង ៖ កម្មករកម្មការិនីចេញពីធ្វើការម្នាក់ៗភ័យស្លន់ស្លោ ខណៈកំពុងដោយជិះលើរថយន្ត និងធ្វើដំណើរតាមម៉ូតូនៅលើដងផ្លូវស្រាប់តែមានរថយន្តដឹកប្រេងឥន្ធនៈរបស់ក្រុមហ៊ុនសាវីម៉ិចមួយគ្រឿង បើកជែងរថយន្ត និងគេចពីរម៉ូតូ បណ្ដាលឲ្យជ្រុលចង្កូតក្រឡាប់ពីបីត្រឡប់ធ្លាក់ស្រះទឹកជាប់ថ្នល់ជាតិលេខ១ ដូចវីដេអូក្នុងភាពយន្តភ័យញាក់សាច់ តែសំណាងល្អមិនផ្ទុះ ។
ករណីនេះបានកើតឡើងកាលពីវេលាម៉ោង០៦និង៤០នាទីល្ងាច ថ្ងៃទី២៦ ខែមីនា ឆ្នាំ២០១៨ នេះ នៅលើកំណាត់ផ្លូវជាតិលេខ១ ស្ថិតក្នុងភូមិតាពៅ សង្កាត់បាវិត ក្រុងបាវិត ។ បើតាមប្រភពពីកន្លែងកើតហេតុ បានឲ្យដឹងថា នៅមុនពេលមានគ្រោះថ្នាក់ គេឃើញរថយន្តដឹកស៊ីទែនប្រេងឥន្ធនៈរបស់ក្រុមហ៊ុនសាវីម៉ិច១គ្រឿង ពណ៌ស ពាក់ផ្លាកលេខ ភ្នំពេញ ៣B-៣០១៥ បើកបរដោយបុរសម្នាក់ មិនស្គាល់អត្តសញ្ញាណ ដោយធ្វើដំណើរក្នុងទិសដៅពីលិចទៅកើតក្នុងល្បឿនមធ្យម ។ លុះមកដល់ចំណុចកើតហេតុខាងលើ រថយន្តក៏បានគេចម៉ូតូជាច្រើនគ្រឿងនៅពីខាងមុខជាន់ហ្វ្រាំងមិនជាប់ បួងចង្កូតក្រឡាប់ពីបីត្រលប់ធ្លាក់ចូលស្រះអត់ទឹកបោក ធ្លាយប្រេងចេញមកក្រៅស៊ីទែន តែសំណាងល្អពុំមានឆាបឆេះ ឬបង្កគ្រោះថ្នាក់ដល់អាយុជីវិតមនុស្សឡើយ ។ ក្រោយគ្រោះថ្នាក់ភ្លាមៗ សមត្ថកិច្ចបានចុះមកជួយសម្រួលចរាចរណ៍ និងមិនឲ្យពលរដ្ឋចោមរោមមើលនោះទេ ដោយខ្លាចមានអ្នកជក់បារីអាចបង្កជាអគ្គិភ័យ ។
សូមបញ្ជាក់ផងដែរថា នៅតំបន់ខាងលើស្ថានភាពផ្លូវតូចចង្អៀតហើយជារឿយៗនៅពេលព្រឹក និងល្ងាច គឺស្ទះចរាចរស្ទើររាល់ថ្ងៃ ដូច្នេះហើយសូមឲ្យបងប្អូនដែលធ្វើដំណើរដល់ចំណុចខាងលើនេះ មានការប្រុងប្រយ័ត្នផង ពីព្រោះសម្បូររថយន្តដឹកកម្មករកម្មការិនីធ្វើដំណើរឆ្លងកាត់ ៕
ចែករំលែកព័តមាននេះ