ខេត្តមណ្ឌលគិរី ៖ សេចក្តីរាយការណ៍បឋមឱ្យដឹងថា មានករណីអគ្គិភ័យមួយ បានត្របាក់ផ្ទះរបស់មន្ត្រីយោធាម្នាក់ហ្មត់គ្មានសល់ កើតឡើងកាលពីវេលាម៉ោង០៨ និង១៥នាទីយប់ថ្ងៃទី២៧ មីនា ស្ថិតក្នុងភូមិខ្ទង់ ឃុំស្រែឈូក ស្រុកកែវសីមា របស់ប្រជាពលរដ្ឋអស់មួយខ្នង ដែលមានទំហំ៩ម៉ែត្រគុណ១១ម៉ែត្រ សង់ពីឈើប្រក់សង្ក័សី។
សេចក្តីរាយការណ៍បន្តថា ម្ចាស់ផ្ទះខាងលើ ឈ្មោះ ឡុង ប្រុស អាយុ៤៧ឆ្នាំ ជាមន្ត្រីយោធា មានប្រពន្ធឈ្មោះឡុង វណ្ណា អាយុ៤១ឆ្នាំ មានកូនពីរនាក់ក្នុងបន្ទុក ។ បើតាមលោកអធិការស្រុកកែវសីមាថា សម្ភារ
ខូតខាតមានផ្ទះ១ខ្នង, កង់គោយន្តកន្ត្រៃ២គូ , ម៉ូតូចាស់១គ្រឿង, ផ្ទាំងសឡា និងអាគុយ២គ្រឿង, ឈើគ្រឿងសម្រាប់ធ្វើផ្ទះចំនួនមួយគូប, គ្រឿងសង្ហារឹម តុ ទូ ចាន ឆ្នាំង ។ល។
សមត្ថកិច្ចបញ្ជាក់ថា ដំបូងភ្លើងបានឆេះចេញពីផ្ទះបាយ អស់ពាក់កណ្តាលហើយ ទើបមានអ្នកជិតខាងបានឃើញ ។ ដោយអំណាចភ្លើងឆេះពេញបន្ទុកខ្លាំងពេក មិនអាចជួយពន្លត់បាន ម្យ៉ាងដោយសារទីតាំងកើតហេតុមានចម្ងាយឆ្ងាយពីប្រជុំជនស្រុក (ភូមិនេះស្ថិតនៅក្នុងព្រៃដែនជម្រកសត្វ ពិបាកផ្លូវធ្វើដំណើរ)ទើបរថយន្តពន្លត់អគ្គិភ័យមិនអាចជួយបាន ។
លោកឡោក សុខា ស្នងការនគរបាលខេត្តមណ្ឌលគិរី បានផ្តាំផ្ញើរទៅដល់ប្រជាពលរដ្ឋទាំងអស់ ត្រូវតែមានស្មារតីប្រុងប្រយ័ត្នឱ្យបានខ្ពស់ ព្រោះរដូវនេះ ជារដូវរាំងស្ងួត ។ បើពេលណាមានភ្លើងឆេះ ពិតណាស់គឺពិបាកក្នុងការពន្លត់ឱ្យទាន់ពេលវេលា ។ ម្យ៉ាងទៀត លោកស្នងការបានផ្តាំផ្ញើរដល់ប្រជាពលរដ្ឋ មុនចាកចេញពីផ្ទះ សូម្បីពិនិត្យឱ្យបានគ្រប់ជ្រុងជ្រោយ តើមានពន្លត់ភ្លើងចង្ក្រាន ឬទាន ធូប អស់ឬនៅ ដើម្បីបង្ការគ្រោះអកុសលទាំងនេះ ។
ចែករំលែកព័តមាននេះ