ប្រទេសម៉ាឡេស៊ី ៖ រដ្ឋាភិបាលម៉ាឡេស៊ីកាលពីថ្ងៃទី២៦ មីនា បានដាក់ជូនសភាគម្រោងច្បាប់មួយដែលហាមឃាត់ការផ្សាយព័ត៌មានក្លែងក្លាយទាំងឡាយដែលអាចមានទោសពិន័យធ្ងន់ក ព្រមទាំងអាចជាប់គុកដល់១០ឆ្នាំ ។
សភានីតិកាលទី១៤របស់ម៉ាឡេស៊ីត្រូវរួមប្រជុំនាខែសីហា ខណៈនាយករដ្ឋមន្ត្រីលោកណាជីប រ៉ាហ្សាក់ រងការរិះគន់ខ្លាំងលើរឿងពុករលួយទាក់ទិននឹងមូលនិធិម៉ាឡេស៊ី 1 MALAYSIA DEVELOPMENT BERHAD (1 MDB) ។
យោងតាមគម្រោងច្បាប់ប្រឆាំងព័ត៌មានក្លែងក្លាយ២០១៨ មនុស្សទាំងឡាយណាដែលប្រព្រឹត្តខុសនឹងទទួលការពិន័យរហូតដល់ទៅ៥០០.០០០រីងហ្គីត (១០០.០០០អឺរ៉ូ) ឬអាចជាប់គុកដល់១០ឆ្នាំ ឬជាប់ទោសទាំង២នេះ ។
គម្រោងច្បាប់នេះកំណត់និយមន័យនៃព័ត៌មានក្លែងក្លាយដូចជាបណ្តាព័ត៌មាន ដំណឹងនានា បណ្តាទិន្នន័យ ឬសេចក្តីរាយការណ៍ព័ត៌មានដែលខុសទាំងស្រុង ឬខុសមួយផ្នែកណា ។ បណ្តាព័ត៌មានផ្សាយតាមវិទ្យុ ឬទូរទស្សន៍ក៏ជាប់ទាក់ទិនដែរ ក៏ដូចជាបណ្តាព័ត៌មានផ្សាយតាមអនឡាញ ឬតាមបណ្តាញសង្គម ។
បណ្តាមនុស្សពុំមែនសញ្ជាតិម៉ាឡេស៊ីក៏អាចមានទោសក្នុងក្របខណ្ឌនៃច្បាប់នេះដែរ ។ ពួកប្រឆាំងបានបរិហារថា នេះជាការប៉ុនប៉ងសម្លុតបំភ័យប្រជាជន ។ តាម TWITTER សមាជិកសភាប្រឆាំងលោក ONG KIAN MING ថ្លែងថា នេះជាការវាយប្រហារប្រឆាំងសារព័ត៌មាន និងជាការប៉ុនប៉ងមួយដើម្បីបំភ័យប្រជាជន ៕
ចែករំលែកព័តមាននេះ