ប្រទេសអារ៉ាប៊ី សាអ៊ូឌីត ៖ ប្រទេសអារ៉ាប៊ី សាអ៊ូឌីត កាលពីថ្ងៃទី២៦ មីនា បានគំរាមអ៊ីរ៉ង់ពីការសងសឹកក្រោយពីចោទប្រទេសនេះក្នុងរឿងបាញ់មីស៊ីលជាច្រើនគ្រាប់របស់ពួកឧទ្ទាមយេម៉ែនប្រឆាំងដែនដីខ្លួន ។ នេះជាការបំពុលបរិយាកាសថ្មីរវាងគូប្រជែងធំ២នៅតំបន់មជ្ឈិមបូព៌ា ។
ចាប់តាំងពីថ្ងៃទី២៦ មីនា ឆ្នាំ២០១៥ មកអារ៉ាប៊ី សាអ៊ូឌីត បានដឹកនាំក្រុមចម្រុះយោធាមួយរបស់បណ្តាប្រទេសអារ៉ាប់ ស៊ុននីត ធ្វើអន្តរាគមន៍យោធានៅយេម៉ែនជួយដល់រដ្ឋាភិបាលរបស់ប្រធានាធិបតី លោក ABD RABBO MANSOUR HADI ប្រឈមមុខនឹងពួកឧទ្ទាមហ៊ូធីដែលកាន់កាប់រដ្ឋធានីសាណា និងតំបន់យ៉ាងធំរបស់ប្រទេស ។
អារ៉ាប៊ី សាអ៊ូឌីត និងលោក HADI បានចោទប្រកាន់អ៊ីរ៉ង់ថាបំពាក់អាវុធឱ្យពួកហ៊ូធី ។ ក្រុងតេហេរ៉ង់អះអាងថា ជួយទ្រទ្រង់ពួកឧទ្ទាមនេះ ប៉ុន្តែបដិសេធពីការផ្តល់អាវុធដល់ពួកគេ ហើយចោទទីក្រុងរីយ៉ាដថា ប្រព្រឹត្តឧក្រិដ្ឋកម្មសង្គ្រាមនៅយេម៉ែន ។ មនុស្សជិត១០.០០០នាក់ស្លាប់ក្នុងជម្លោះនេះ ហើយការអត់ឃ្លានគំរាមកំហែងដល់ប្រជាជន ។
ពុំមែនជាលើកដំបូងទេ ដែលអារ៉ាប៊ី សាអ៊ូឌីត គំរាមអ៊ីរ៉ង់ក្នុងក្របខណ្ឌនៃសង្គ្រាមនៅយេ
ម៉ែន ដែលនាំឱ្យមានការកើនខ្ពស់នៃភាពតានតឹងរវាងប្រទេសទាំង២ ដែលកាត់ផ្តាច់ទំនាក់ទំនងការទូតជាមួយគ្នាចាប់តាំងពីឆ្នាំ២០១៦មក ។
ភាពតានតឹងថ្មីផ្ទុះឡើង ក្រោយការបាញ់កាលពីថ្ងៃទី២៥ មីនា ដោយពួកឧទ្ទាមហ៊ូធី
នូវមីស៊ីល៧គ្រាប់ ប្រឆាំងដែនដីអារ៉ាប៊ី សាអ៊ូឌីត ។ មីស៊ីលទាំងនោះត្រូវស្ទាក់កម្ទេចដោយកងកម្លាំងការពារអាកាស ក៏ប៉ុន្តែពលករអេហ្ស៊ីបម្នាក់ស្លាប់ ហើយ៣នាក់ទៀតរងរបួស ដោយការធ្លាក់បំណែកលើផ្ទះមួយនៅទីក្រុងរីយ៉ាដ ។
លោក TURKI AL MALIKI អ្នកនាំពាក្យម្នាក់នៃក្រុមចម្រុះអារ៉ាប់ប្រឆាំងពួកហ៊ូធីក្នុងសន្និសីទសារព័ត៌មានមួយបានព្រមានថា យើងរក្សាសិទ្ធិតបតវិញប្រឆាំងអ៊ីរ៉ង់ក្នុងពេលណាមួយ ឬកន្លែងណាមួយ ។ ក្រុមចម្រុះនឹងចាត់រាល់វិធានការដើម្បីធានាសន្តិសុខរបស់អារ៉ាប៊ី សាអ៊ូឌីត ៕
ចែករំលែកព័តមាននេះ