ប្រទេសកូរ៉េខាងជើង-ប្រទេសចិន ៖ ទីភ្នាក់ងារព័ត៌មានជប៉ុន KYODO រាយការណ៍កាលពីថ្ងៃទី២៦ មីនា ថា មន្ត្រីជាន់ខ្ពស់កូរ៉េខាងជើងមួយរូបសង្ស័យមកកាន់ប្រទេសចិន ខណៈជិតដល់ការជួបគ្នាកំពូលជាមួយកូរ៉េខាងត្បូង និងសហរដ្ឋអាមេរិក…
ប្រទេសកូរ៉េខាងជើង-ប្រទេសចិន ៖ ទីភ្នាក់ងារព័ត៌មានជប៉ុន KYODO រាយការណ៍កាលពីថ្ងៃទី២៦ មីនា ថា មន្ត្រីជាន់ខ្ពស់កូរ៉េខាងជើងមួយរូបសង្ស័យមកកាន់ប្រទេសចិន ខណៈជិតដល់ការជួបគ្នាកំពូលជាមួយកូរ៉េខាងត្បូង និងសហរដ្ឋអាមេរិក ។
ទីភ្នាក់ងារព័ត៌មាននេះបន្តថា មន្ត្រីជាន់ខ្ពស់ពុំបង្ហាញអត្តសញ្ញាណនេះមកកាន់ប្រទេសចិន ក្នុងគោលបំណងកែលម្អទំនាក់ទំនងជាមួយក្រុងប៉េកាំងដែលជួបភាពទ័លច្រក ។
KYODO នៅពុំទាន់អះអាងថា តើឥស្សរជននេះគឺជាមេដឹកនាំកូរ៉េខាងជើងលោកគីម ជុងអ៊ុន ឬពុំមែនឡើយ ។
ទំនាក់ទំនងរវាងក្រុងព្យុងយ៉ាង និងក្រុងប៉េកាំងមានភាពតានតឹងដោយសារការបន្តរបស់កូរ៉េខាងជើងនូវកម្មវិធីនុយក្លេអ៊ែរ និងបាលីស្ទិករបស់ខ្លួន ។ ចិនចូលរួមជាមួយទណ្ឌកម្មអន្តរជាតិប្រឆាំងក្រុងព្យុងយ៉ាង ។
យោងតាមសេចក្តីថ្លែងការណ៍របស់ KYODO ថា រថភ្លើងពិសេសមួយគ្រឿងហាក់ដូចជាមន្ត្រីជាន់ខ្ពស់កូរ៉េខាងជើងមួយរូបជិះក្នុងនោះបានបើកឆ្លងកាត់នាថ្ងៃទី២៥ មីនា ទីក្រុងព្រំដែនចិន DANDONG ។
KYODO អះអាងទៀតថា រថយន្ត១គ្រឿងពាក់ស្លាកលេខការទូតកូរ៉េខាងជើងត្រូវគេប្រទះឃើញនាថ្ងៃទី២៦ មីនា នៅឯមហាវិមានប្រជាជនក្រុងប៉េកាំងជាមួយការពង្រឹងសន្តិសុខយ៉ាងខ្លាំង ។
ដកស្រង់ប្រភពព័ត៌មានអនាមិក៣វ៉េបសាយ BLOOMBERG អាមេរិករាយការណ៍ថា លោកគីម ជុងអ៊ុន កំពុងតែបំពេញទស្សនកិច្ចគួរឱ្យភ្ញាក់ផ្អើលនៅក្រុងប៉េកាំង ដែលនោះជាការធ្វើដំណើរចេញក្រៅប្រទេសលើកដំបូងរបស់លោកតាំងពីលោកឡើងកាន់អំណាចពីឆ្នាំ២០១១មក ។ BLOOMBERG បន្តថា ភាពលម្អិតឯទៀតៗនៃដំណើរទស្សនកិច្ចនេះ ព្រមទាំងរយៈពេលស្នាក់នៅរបស់លោកគីម ជុងអ៊ុន ព្រមទាំងការជួបគ្នានានាដែលគ្រោងធ្វើ គេពុំបានដឹងឡើយ ។
ទោះបីយ៉ាងណា លោកស្រី HUA CHUNYING អ្នកនាំពាក្យក្រសួងការបរទេសចិនថ្លែងក្នុងសន្និសីទសារព័ត៌មានមួយថា ពុំមានព័ត៌មានណាមួយពីសភាពការណ៍នេះឡើយ ៕
ចែករំលែកព័តមាននេះ