រាជធានីភ្នំពេញ ៖ ក្រសួងសាធារណការ និងដឹកជញ្ជូនបានឲ្យដឹងថា សំណង់ការដ្ឋានស្ថាបនាស្ពានអាកាស ស្តុបផ្សារដីហុយសម្រេចបាន៩០%ហើយ ហើយគ្រោងបើកឱ្យដំណើរការជាបណ្តោះអាសន្ន នៅថ្ងៃទី១២ ខែមេសាខាងមុខ ។…
រាជធានីភ្នំពេញ ៖ ក្រសួងសាធារណការ និងដឹកជញ្ជូនបានឲ្យដឹងថា សំណង់ការដ្ឋានស្ថាបនាស្ពានអាកាស
ស្តុបផ្សារដីហុយសម្រេចបាន៩០%ហើយ ហើយគ្រោងបើកឱ្យដំណើរការជាបណ្តោះអាសន្ន នៅថ្ងៃទី១២ ខែមេសាខាងមុខ ។ ការបើកជាបណ្តោះអាសន្ននេះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋក្នុងឱកាសបុណ្យចូលឆ្នាំប្រពៃណីជាតិ តែមិនទាន់អនុញ្ញាតឱ្យរថយន្តធំឆ្លងកាត់នៅឡើយទេ ព្រោះរថយន្តធុនធំធ្ងន់ នៅមិនទាន់គ្រប់លក្ខណៈបច្ចេកទេសបេតុង ។
លោក នូ វឌ្ឍនៈ អគ្គនាយកបច្ចេកទេសនិងជាអ្នកនាំពាក្យក្រសួងសាធារណការនិងដឹកជញ្ជូនបានឱ្យដឹងថា ការដ្ឋានស្ថាបនាស្ពានអាកាសស្តុបផ្សារដីហុយ រហូតមកដល់ពេលនេះសម្រេចបាន៩០%ហើយ ខណៈគ្រឿងផ្គុំសំណង់ខាងក្រោមសម្រេចបាន១០០% គឺនៅសល់ការងារខ្លះដែលក្រុមជំនាញកំពុងជំរុញឱ្យរួចរាល់ក្នុងពេលឆាប់ៗខាងមុខនេះ ។
លោកបន្តថា ដើម្បីលើកកម្ពស់សកម្មភាពសុវត្ថិភាពចរាចរណ៍ផ្លូវគោក ក្រសួងសាធារណការកំពុងពន្លឿនការដ្ឋានស្ថាបនាស្ពានអាកាសផ្សារដីហុយឱ្យបានរួចរាល់ សម្រាប់ប្រជាពលរដ្ឋបានធ្វើដំណើរ និងចូលរួមកាត់បន្ថយការកកស្ទះចរាចរណ៍ឱ្យមានភាពល្អប្រសើរឡើង ។ យ៉ាងណាក៏ដោយ ពេលចូលឆ្នាំខ្មែររួចអាចនឹងបិទទៅវិញដើម្បីអនុវត្តការងារបញ្ចប់ ។ គួររំឭកថា ស្ពានអាកាសស្តុបផ្សារដីហុយចាប់ផ្តើមបើកការដ្ឋានស្ថាបនាកាលពីចុងខែសីហា ឆ្នាំ២០១៦ ដែលតាមគម្រោងត្រូវបញ្ចប់នៅដំណាច់ខែធ្នូ ឆ្នាំ២០១៧ ។ ប៉ុន្តែដោយមានបញ្ហាខ្លះ ក្រុមការងារបានបន្តពន្យាររហូតមកដល់ពេលនេះ ហើយមូលហេតុដែលយឺតយ៉ាវនោះដោយសារមានផលប៉ះពាល់ គឺខ្សែក្រោមដីនិងបង្គោលតង់ស្យុងអគ្គិសនីកម្ពុជាមិនទាន់ដកចេញ ។
ស្ពានអាកាសស្តុបផ្សារដីហុយមានបណ្តោយ៩០៥ម៉ែត្រ ទទឹង១៦,៥ម៉ែត្រ ស្ថិតនៅចំណុចប្រសព្វរវាងមហាវិថីសហព័ន្ធរុស្ស៊ី និងផ្លូវហាណូយ ជាគម្រោងហិរញ្ញប្បទានរបស់សាធារណរដ្ឋប្រជាមានិតចិន និងទទួលបានសិទ្ធិស្ថាបនាដោយក្រុមហ៊ុនសៀងហៃ និងត្រួតពិនិត្យបច្ចេកទេសដោយក្រសួងសាធារណការនិងដឹកជញ្ជូន ។សូមបញ្ជាក់ថា បច្ចុប្បន្នរាជធានីភ្នំពេញមានស្ពានអាកាសចំនួន៥កន្លែងគឺ ទី១-ស្ពានអាកាសក្បាលថ្នល់ ទី២-ស្ពានអាកាសស្ទឹងមានជ័យ ទី៣-ស្ពានអាកាស៧មករា ស្តុបពេទ្យលោកសង្ឃ ទី៤-ស្ពានអាកាសស្ដុបតិចណូ និងទី៥-ស្ពានអាកាសស្តុបផ្សារដីហុយ ៕
ចែករំលែកព័តមាននេះ