ខេត្តមណ្ឌលគិរី ៖ ទិវាទីក្រុងស្អាតលើកទី៦ ក្រោមប្រធានបទ «ទីក្រុងស្អាត ដើម្បីទាំងអស់គ្នា» និងពិធីប្រកាសជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ត្រូវបានអាជ្ញាធរខេត្តមណ្ឌលគិរី រៀបចំប្រារព្ធពិធីនៅក្បែររង្វង់មូលគោព្រៃ…
ខេត្តមណ្ឌលគិរី ៖ ទិវាទីក្រុងស្អាតលើកទី៦ ក្រោមប្រធានបទ «ទីក្រុងស្អាត ដើម្បីទាំងអស់គ្នា» និងពិធីប្រកាសជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ត្រូវបានអាជ្ញាធរខេត្តមណ្ឌលគិរី រៀបចំប្រារព្ធពិធីនៅក្បែររង្វង់មូលគោព្រៃ ក្រុងសែនមនោរម្យ ខេត្តមណ្ឌលគិរី ថ្ងៃទី២៧ ខែមីនា ឆ្នាំ២០១៨ ។
លោក ស្វាយ សំអ៊ាង អភិបាលខេត្ត បានសម្តែងនូវការអបអរសាទរ ជាមួយនឹងការទទួលបានពាន់រង្វាន់ផ្ការំដួល២ទង របស់បេក្ខភាពក្រុងសែនមនោរម្យ ជាមួយនឹងចលនាប្រឡងប្រណាំងទីក្រុងស្អាតលើកទី២ ឆ្នាំ២០១៨-២០២១ ។ លោកបានគូសបញ្ជាក់ថា ទាំងនេះគឺការការរួមចំណែកដែលមិនអាចខ្វះបានពីប្រជាពលរដ្ឋ និងអាជីវករ ព្រោះការរស់នៅប្រកបដោយសេចក្តីថ្លៃថ្នូរ អនាម័យ តាមរយៈការទុកដាក់សម្រាមឲ្យបានត្រឹមត្រូវ គឺជាចលករដ៏ចម្បងនៅក្នុងការទទួលបានពាន់នេះ រួមជាមួយនឹងការខិតខំប្រឹងប្រែងរបស់អាជ្ញាធរពាក់ព័ន្ធផងដែរ ។ ជាងនេះទៅទៀត អភិបាលខេត្តបានជំរុញដល់មន្ទីរអង្គភាពជំនាញ ត្រូវខិតខំរៀបចំហេដ្ឋារចនាសម្ព័ន្ធនានា និងស្នើដល់ពលរដ្ឋនៅទូទាំងខេត្ត ត្រូវទុកដាក់សំរាមឲ្យបានត្រឹមត្រូវ នឹងចូលរួមទទួលខុសសម្អាតអនាម័យតាមគេហដ្ឋានរៀងៗខ្លួន និងតាមដងផ្លូវបន្តទៀត ជាពិសេសត្រូវរក្សាឲ្យបាននូវសុខសុវត្ថិភាពជូនប្រជាពលរដ្ឋឲ្យកាន់តែល្អប្រសើរ ។
អភិបាលក្រុងសែនមនោរម្យ លោក ឡុង វិបុល បានបញ្ជាក់ថា នៅក្នុងឆ្នាំ២០១៥ ក្រុងសែនមនោរម្យ ទទួលបានជ័យលាភី ចំណាត់ថ្នាក់ទីក្រុងស្អាតផ្ការំដួល១ទង (២០១៥-២០១៨) របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ ក្នុងឆ្នាំ២០១៧ ទទួលបានវិញ្ញាបនបត្រទទូលស្គាល់ថា បានបំពេញតាមលក្ខខណ្ឌតម្រូវក្នុងការទទូលស្គាលបានជ័យលាភី ជាក្រុងបដិសណ្ឋារកិច្ចល្អ ក្នុងសេវាសាធារណៈ របស់លោក ថោង ខុន រដ្ឋមន្ត្រី និងជាប្រធានគណៈកម្មាធិការជាតិ វាយតម្លៃរៀបចំទីក្រុងស្អាត នៃក្រសួងទេសចរណ៍ ។ ដោយឡែក ក្នុងឆ្នាំ២០១៨ នេះ ក្រុងសែនមនោរម្យ ទទួលបានជ័យលាភីចំណាត់ថ្នាក់ទីក្រុងស្អាត ផ្ការំដួល២ទង (២០១៨-២០២១ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕
ចែករំលែកព័តមាននេះ