រាជធានីភ្នំពេញ ៖ យុវជនម្នាក់បានជិះម៉ូតូធំ១គ្រឿងជ្រុលទៅបុកជាមួយរងយន្តម៉ាកឡិចស៊ីស RX-៤០០ មួយគ្រឿងទៀតកំពុងបើកបរបត់ចូលទៅក្នុងបុរី បណ្ដាលឲ្យដួលខ្ទាតចូលក្រោមកង់រថយន្តកិនរងរបួសយ៉ាងធ្ងន់ធ្ងរ ហើយត្រូវបានអ្នកជិតខាងបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗដែរ ។ ប៉ុន្តែជាអកុសលខណៈពេលទៅដល់មន្ទីរពេទ្យជនរងគ្រោះបានស្លាប់បាត់បង់ជីវិត ដោយឡែកអ្នកបើលបររថយន្តបានចុះរត់គេចខ្លួនបាត់ស្រមោល ។ ឧប្បត្តិហេតុគ្រោះថ្នាក់ចរាចរនេះបានកើតឡើងកាលពីវេលាម៉ោង១១និង១៥នាទីព្រឹក ថ្ងៃទី២៧ ខែមីនា ឆ្នាំ២០១៨ នៅលើកំណាត់ផ្លូវបេតុងស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេបានឃើញមានរថយន្ត១គ្រឿងម៉ាកឡិចស៊ី RX-៤០០ ពណ៌ស ពាក់ផ្លាកលេខ ភ្នំពេញ ២AT-៨៩៧៩ បើកបរដោយបុរសម្នាក់មិនស្គាល់ឈ្មោះ បានបើកបរធ្វើដំណើរក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុខាងលើរថយន្តនេះបានបត់ចូលទៅក្នុងបុរី បណ្ដាលឲ្យម៉ូតូម៉ាកយ៉ាម៉ាហាធុនធំ១គ្រឿង ពណ៌ខ្មៅ ពាក់ផ្លាកលេខ ភ្នំពេញ ១GQ-២១២១ បើកបរធ្វើដំណើរក្នុងទិសដៅពីកើតទៅលិចទៅដល់វាក់គេចចេញមិនទាន់ក៏បានបុកចំចំហៀងខ្លួនរថយន្តពេញទំហឹងតែម្ដង ។
ប្រភពដដែលបានបន្តទៀតថា ខណៈនោះបណ្ដាលឲ្យដួលហើយអ្នកបើកបរម៉ូតូបានខ្ទាតចូលក្រោមកង់រថយន្តត្រូវបានរថយន្តកិនរងរបួសយ៉ាងធ្ងន់ធ្ងរ ។ បន្ទាប់មកអ្នកបើកបររថយន្តបានចុះរត់គេចខ្លួនបាត់ស្រមោលចោលរថយន្ត ចំណែកជនរងគ្រោះត្រូវបានគេបញ្ជូនទៅសង្គ្រោះបន្ទាន់ភ្លាមៗនៅមន្ទីរពេទ្យ ហើយជាអកុសលក៏បានស្លាប់ ។ ក្រោយមកនគរបាលការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ ចុះទៅធ្វើការវាស់វែង និងនាំយករថយន្ត និងម៉ូតូទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ