ខេត្តកំពង់ស្ពឺ ៖ តាមសេចក្តីរាយការណ៍បឋមបានឲ្យដឹងថា តាមការបញ្ជាក់ពីឪពុកនាងយុវតី ដែលជិតចូលរោងការ ហើយបានបាត់ខ្លួននោះ បានបញ្ជាក់ប្រាប់អ្នកសារព័ត៌មាននៅរសៀលថ្ងៃនេះថា បានដំណឹងពីកូនគាត់ហើយ គឺនាងបានទៅលេងនៅកំពង់សោម ។
សេចក្តីរាយការណ៍បានបន្តថា ឱពុកយុវតីមិនបានប្រាប់លម្អិតនោះទេ គ្រាន់តែប្រាប់ថា កូនស្រីតេតាមទូរស័ព្ទមកប្រាប់គាត់ និងម្តាយនាងថា គេសុខសប្បាយទេ សូមពុកម៉ែកុំបារម្ភ ។ នាងមិនបានបញ្ជាក់ថា នាងទៅជាមួយអ្នកណាឡើយ ពេលនេះគាត់ និងប្រពន្ធកំពុងរៀបចំចេញដំណើរទៅកំពង់សោម ដើម្បីទទួលនាងមកផ្ទះវិញផងដែរ ៕
រលឹកថា ៖ យុវតីមួយរូបបានបាត់ខ្លួនពីផ្ទះគ្មានដំណឹងសូន្យឈឹង ធ្វើឲ្យឱពុកម្តាយមានការបារម្ភយ៉ាងខ្លាំង ពីសុខទុក្ខរបស់នាង មិនដឹងថា នាងបានសុខ ឬក៏ទុក្ខនោះទេ ។ ជាពិសេសនោះ គឺជិតដល់ថ្ងៃចូលរោងការទៅហើយ ឪពុកម្តាយបងប្អូន ស្វែងរកគ្រប់ច្រកល្ហក តែរកមុនឃើញឡើយ ។
យុវតីដែលបាត់ខ្លួនដោយគ្នានដំណឹងនេះ ត្រូវបានស្គាល់ឈ្មោះ ពៅ ប៊ុនឡា អាយុ២០ឆ្នាំ រស់ជាមួយឱពុកម្តាយនៅភូមិតាំងរបង ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ។
បើតាមសាច់ញាតិរបស់យុវតីបានបង្ហើបប្រាប់ថា នាងបានបាត់ដំណឹងចាប់តាំងពី ថ្ងៃទី២០ ខែមិនា ឆ្នាំ២០១៨ ដែលនៅខ្វះតែ២០ថ្ងៃទៀត ត្រូវចូលរោងការ ។ សាច់ញាតិនាងលើកឡើងថា ប្រហែលជាមានជនអាក្រក់ខិលខូចអូសទាញក្នុងផ្លូវមិនល្អ ណាមួយ ហើយល្បួងយកទៅ ។
ក្នុងនោះផងដែរសាច់ញាតិរបស់នាងបានសំណូមពរដល់សមត្ថកិច្ច ឬបងប្អូនញាត្តិមិត្តណាបានឃើញ និងលឺដំណឹងសូមមេត្តាជួយ ផ្តល់ដំណឹងដល់សាច់ញាតិ និងក្រុមគ្រួសារផង ព្រោះឪពុកម្តាយ និងក្រុមគ្រួសារកំពុងមានទុក្ខជាខ្លាំង ។ ចាប់តាំងពីបាត់នាង ឪពុកក៏ធ្លាក់ខ្លួនឈឺ បារម្ភពីសុវត្ថិភាពរបស់កូន មិនដឹងថា តើកូនជួបបញ្ហាអ្វីខ្លះ ពេលធ្វើដំណើរ ។ ម្យ៉ាងនាងជិតដល់ថ្ងៃចូលរោងការផង បើរកនាងមិនឃើញឪពុកម្តាយត្រូវរ៉ាប់រងសងថ្លៃបណ្ណាការដល់ខាងកូនកម្លោះទៀតផង ។
សាច់ញាតិរបស់យុវតីដែលបាត់ខ្លួនដោយគ្មានដំណឹងនេះ បានលើកឡើងថា តាមឪពុករបស់នាងនិយាយទោះខុសត្រូវយ៉ាងណា ក៏ដោយក៏មិនប្រកាន់ទោសអូសដំណើរនោះទេ សូមឲ្យតែកូនវិលមកផ្ទះវិញ ដោយសុខសប្បាយឪពុកម្តាយត្រេកអរណាស់ទៅហើយ ៕
ចែករំលែកព័តមាននេះ