រាជធានីភ្នំពេញ ៖ សហគ្រាសខ្នាតតូច និងមធ្យមនៅកម្ពុជា បាននិងកំពុងរួមចំណែកដល់ការរីកលូតលាស់នៃសេដ្ឋកិច្ចរបស់ប្រទេស។ ហេតុដូច្នេះហើយបានជាថ្នាក់ដឹកនាំក្រុមហ៊ុនផ្សារមូលបត្រកម្ពុជា ហៅកាត់ថា (CSX) បង្ហាញការយល់ឃើញថា ម្ចាស់សហគ្រាសខ្នាតតូច…
រាជធានីភ្នំពេញ ៖ សហគ្រាសខ្នាតតូច និងមធ្យមនៅកម្ពុជា បាននិងកំពុងរួមចំណែកដល់ការរីកលូតលាស់នៃសេដ្ឋកិច្ចរបស់ប្រទេស។ ហេតុដូច្នេះហើយបានជាថ្នាក់ដឹកនាំក្រុមហ៊ុនផ្សារមូលបត្រកម្ពុជា ហៅកាត់ថា (CSX) បង្ហាញការយល់ឃើញថា ម្ចាស់សហគ្រាសខ្នាតតូច និងមធ្យមនៅកម្ពុជា គួររៀន ឬចេះប្រើប្រាស់លុយរបស់អ្នកដទៃ ដើម្បីយកមកពង្រីកអាជីវកម្មរបស់ខ្លួន ចៀសវាងបាត់បង់ឱកាសក្នុងការជំរុញមុខជំនួញទៅមុខឲ្យបានជោគជ័យ ។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា មានប្រសាសន៍ថា ៖«ពេលខ្ញុំមានឱកាសធ្វើបទបង្ហាញ ឬថ្លែងសុន្ទរកថាផ្សេងៗ គឺថាសហគ្រាសទាំងអស់ ពិសេសសហគ្រាសខ្នាតតូចនិងមធ្យម គួរតែរៀន ឬចេះប្រើប្រាស់លុយរបស់អ្នកដទៃដើម្បីពង្រីកអាជីវកម្មរបស់ខ្លួន កុំរង់ចាំដល់ពេលយើងសន្សំបានប្រាក់ចំណេញបានម្តងបន្តិចៗយកទៅពង្រីកអាជីវកម្ម ព្រោះវាយឺតណាស់ ហើយក៏បាត់បង់ឱកាសច្រើនណាស់ដែរ » ។
លោកអគ្គនាយកបន្តថា ៖« ទម្រាំយើងសន្សំបានប្រាក់ចំណេញម្តងបន្តិចៗយកទៅពង្រីកអាជីវកម្មរបស់យើងបាន ពេលនោះ គេចម្លងធ្វើតាមគ្រប់គ្នា ។ អីចឹង កុំទុកឱកាសឱ្យគេចម្លងតាមទាន់ យើងបង្កើតអាជីវកម្មដែលមានកំណើនលឿន មានចំណូលច្រើន ហើយត្រូវចេះកៀរគរលុយរបស់អ្នកដទៃយកទៅពង្រីកអាជីវកម្ម ។ លុយរបស់អ្នកដទៃនោះ អាចជាលុយមុនពេលចូលផ្សារហ៊ុន និងពេលចូលផ្សារហ៊ុន » ។
លោក ហុង សុហួរ លើកឡើងទៀតថា៖ « សហគ្រិនកុំចង់តែបានប្រាក់ចំណេញ ធ្វើយ៉ាងម៉េច ឱ្យភាគហ៊ុនរបស់យើងមានតម្លៃកើនឡើង ។ ក្រុមហ៊ុនធំៗនៅលើពិភពលោក អត់រង់ចាំប្រាក់ចំណេញទេ ប្រាក់ចំណេញ គាត់ស្ទើរតែមិនទទួលតែម្តង គាត់ធ្វើយ៉ាងម៉េច ឱ្យថ្លៃភាគហ៊ុនគាត់កើនឡើងជាអតិបរមា តាមរយៈការពង្រីកអាជីវកម្មលឿន និងការប្រើប្រាស់លុយរបស់អ្នកដទៃ » ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានឱ្យដឹងថា ដើម្បីជ្រៀតចូលទីផ្សារ CSX សម្ព័ន្ធសមាគមបាននិងកំពុងជំរុញឱ្យសមាជិកចូលរួមឈ្វេងយល់ និងរៀបចំហេដ្ឋារចនាសម្ព័ន្ធក្រុមហ៊ុនឱ្យត្រូវតាមស្តង់ដា ដែលខាងគណៈកម្មការមូលបត្រកម្ពុជា ក៏ដូចជាក្រុមហ៊ុនផ្សារមូលបត្រកម្ពុជាតម្រូវ ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា មានប្រសាសន៍កាលពីថ្ងៃទី២៦ មីនា ម្សិលមិញថា ៖« កន្លងមក សម្ព័ន្ធសមាគមបានធ្វើការសហការជាមួយខាងគណៈកម្មការមូលបត្រកម្ពុជា ហើយបានកំពុងសិក្សាជាមួយគ្នាថា តើសហគ្រាសប្រភេទណាដែលយើងអាចចូលរួមនៅក្នុងចង្កោមផ្សារហ៊ុនបាន ។ សព្វថ្ងៃនេះ យើងកំពុងធ្វើការជាមួយគ្នា » ។
ប្រធានសម្ព័ន្ធសមាគមបន្តថា បច្ចុប្បន្នសមាជិកកំពុងរៀបចំកែប្រែហេដ្ឋារចនាសម្ព័ន្ធគ្រប់គ្រង និងការវេចខ្ចប់ផលិតផលឱ្យបានល្អ ដើម្បីអាចមានឱកាសចូលក្នុងផ្សារហ៊ុន ។ កាលណាសមាជិកបានចូលរួមបោះផ្សាយលក់ភាគហ៊ុនបាន គឺជារឿងល្អសម្រាប់ SMEs ព្រោះសព្វថ្ងៃ SMEs ត្រូវការទុនពង្រីកអាជីវកម្ម ។ លោកបន្ថែមថា មកដល់សព្វថ្ងៃ សម្ព័ន្ធសមាគមមានសមាជិកនៅរាជធានីភ្នំពេញ ជាង៣០០ និង២៩សមាគមនៅទូទាំងប្រទេស ៕
ចែករំលែកព័តមាននេះ