ខេត្តកំពង់ចាម ៖ ដោយមើលឃើញពីការលំបាកក្នុងការធ្វើដំណើររបស់ប្រជាពលរដ្ឋនោះលោក គួច ចំរើន អភិបាលខេត្តបានចាត់ឲ្យមន្ទីរអភិវឌ្ឍន៏ជនបទខេត្តយកគ្រឿងចក្រចុះទៅជួសជុលផ្លូវដែលរងការខូចខាតដោយរថយន្តធុនយក្សបើកឆ្លងកាត់ ដែលស្ថិតនៅភូមិរមូល ឃុំរអាង បន្តទៅកាត់ឃុំផ្សេងទៀតមានចម្ងាយជិត១០គីឡូម៉ែត្រជាមួយនោះអជ្ញាធរមូលដ្ឋានក៏ប្តេជ្ញាខិតខំថែរក្សាផ្លូវ និងទប់ស្កាត់មិនឲ្យមានរថយន្តធំបើកឆ្លងកាត់នោះទេ ។
លោក ឡឹង បូរិន អាយុ៥៦ឆ្នាំ នៅភូមិរមូល ប្រាប់ឲ្យដឹងនៅព្រឹកថ្ងៃទី២៧ ខែមីនា ឆ្នាំ២០១៨ ថាផ្លូវដីនៅមុខផ្ទះរបស់គាត់នេះដំបូងមានជង្ហុកដែលពិបាកនឹងធ្វើដំណើរជាច្រើនឆ្នាំហើយក្រោយមកទៀតត្រូវបានអាជ្ញាធរធ្វើការជួសជុល និងមានភាពល្អប្រសើរងាយស្រួលជិះម៉ូតូ និងរថយន្តធុនតូចបើកឆ្លងកាត់ទៅវិញទៅមកទាំងយប់ទាំងថ្ងៃ ។ កន្លងទៅផ្លូវនេះបានខូចត្រូវចាស់ៗនៅក្នុងភូមិបានចលនាបច្ច័យតាមផ្លូវពីអ្នកធ្វើដំណើរដើម្បីទៅទិញដីយកមកចាក់បំពេញផ្លូវតែមិនងាយស្រួលប៉ុន្មានទេ ។
លោក អ៊ិន គឹមហួន មេឃុំរអាងបញ្ជាក់ថា ផ្លូវចាក់ដីដារពេលដែលស្អាតហើយសូមមេត្តាកុំប្រើប្រាស់ល្បឿនលឿនពេក ដើម្បីបញ្ជៀសកុំឲ្យមានគ្រោះថ្នាក់ចរាចរណ៏កើតឡើងតាមដងផ្លូវហើយរូបលោកប្តេជ្ញានឹងថែរក្សាប្រើប្រាស់ផ្លូវនេះឲ្យបានយូរអង្វែងដោយមានរៀបចំដាក់បង្គោលបេតុងសងខាងផ្លូវការពារមិនឲ្យមានរថយន្តធុនយក្សបើកឆ្លងកាត់នោះទេ ៕
ចែករំលែកព័តមាននេះ