រាជធានីភ្នំពេញ ៖ របាយការណ៍របស់ក្រសួងមហាផ្ទៃបានបង្ហាញថា គិតត្រឹមដំណាច់ឆ្នាំ២០១៧កន្លងមកនេះ មានក្រុមហ៊ុនបរទេសសរុបចំនួន២.១៥២ក្រុមហ៊ុន ដែលបាននិងកំពុងវិនិយោគនៅកម្ពុជា ។
យោងតាមរបាយការណ៍ដដែលបានបង្ហាញថា ក្នុងចំណោមក្រុមហ៊ុនទាំងនោះ ពួកគេបានវិនិយោគលើវិស័យសំខាន់ៗចំនួន៤ រួមមាន វិស័យទេសចរណ៍ មានចំនួន១៥៨ក្រុមហ៊ុន, វិស័យកសិកម្ម ចំនួន១៩៣ក្រុមហ៊ុន, វិស័យហេដ្ឋារចនាសម្ព័ន្ធ ចំនួន១៣១ក្រុមហ៊ុន និងវិស័យរោងចក្រ សហគ្រាសផ្សេងៗ ចំនួន១.៦៧០ក្រុមហ៊ុន ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍នាព្រឹកថ្ងៃទី២៣ មីនា ថា ការកើនឡើងនៃក្រុមហ៊ុនអន្តរជាតិទាំងនោះ ដោយសារបរិយាកាសវិនិយោគកាន់តែល្អប្រសើរ ជាពិសេស កំណើនសេដ្ឋកិច្ចរបស់កម្ពុជា បានធ្វើឲ្យកម្ពុជាក្លាយជាកន្លែងមួយទាក់ទាញវិនិយោគិនបរទេសយ៉ាងខ្លាំង ។ អ្នកនាងបន្តថា រហូតមកទល់ពេលនេះ មានក្រុមហ៊ុនយក្សចំនួន៧៦ក្រុមហ៊ុនហើយកំពុងវិនិយោគនៅកម្ពុជា ក្នុងចំណោមក្រុមហ៊ុនធំៗចំនួន៥០០ នៅក្នុងពិភពលោក ។
អ្នកនាងបន្តថា ៖« កម្ពុជាជាប់ចំណាត់ថ្នាក់លេខ១នៅអាស៊ាន ដែលមានកំណើនសេដ្ឋកិច្ចល្អជាងគេ និងមានការរីកចម្រើនលឿនជាងគេ » ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market consulting បានថ្លែងថា ក្នុងចំណោមក្រុមហ៊ុនទាំងនោះ ប្រហែលក្រុមហ៊ុនមកពីប្រទេសចិន កោះតៃវ៉ាន់ និងក្រុងហុងកុងបានមកវិនិយោគនៅកម្ពុជាច្រើនជាងគេលើវិស័យរោងចក្រ សហគ្រាស វិស័យសំណង់ និងអចលនទ្រព្យ ដោយសារកម្ពុជាស្ថិតនៅក្នុងគោលនយោបាយផ្លូវសូត្រ ខ្សែក្រវាត់មួយ ផ្លូវមួយ ។
លោកបន្តថា ៖« អ្វីជាការលើកឡើងពីស្ថាប័នអន្តរជាតិបានបង្ហាញថា បរិយាកាសវិនិយោគនៅកម្ពុជាកាន់តែមានភាពល្អប្រសើរ ប៉ុន្តែមិនទាន់ដល់កម្រិតដែលអ្នកវិនិយោគពីអឺរ៉ុបចង់បាននៅឡើយទេ » ។
លោក ង៉ែត ជូ បានបន្ថែមថា ប្រសិនជាគិតពីកំណើនសេដ្ឋកិច្ច វាជាផ្នែកមួយដែលជំរុញឲ្យមានការវិនិយោគ ប៉ុន្តែសក្តានុពលនៃវិស័យសំណង់ និងអចលនវត្ថុជាផ្នែកសំខាន់ជំរុញឲ្យមានការវិនិយោគពីក្រុមហ៊ុនចិនកាន់តែច្រើននៅកម្ពុជា ។ លោកបន្តថា ប្រសិនជាបរិយាកាសវិនិយោគនៅកម្ពុជាកាន់តែមានលក្ខខណ្ឌប្រសើរ នឹងទាក់ទាញក្រុមហ៊ុនថ្មីៗកាន់តែច្រើនទៀតចូលមកកាន់ទីផ្សារនេះ ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អុិន ចាន់នី បានថ្លែងថា មុននឹងទៅវិនិយោគនៅប្រទេសណាមួយ អ្នកវិនិយោគសម្លឹងមើលកត្តា៣ជាចម្បង ៖ ទី១ សន្តិភាព និងស្ថិរភាពនយោបាយរយៈពេលវែង ទី២ ស្ថិរភាពសង្គម និងទី៣ កំណើនសេដ្ឋកិច្ចរបស់ប្រទេសនោះ ។ លោកបន្តថា កម្ពុជាមានកត្តាសំខាន់ទាំង៣នេះ ទើបទាក់ទាញអ្នកវិនិយោគចូលមកកាន់តែច្រើន គួបផ្សំនឹងទិដ្ឋភាពច្បាប់របស់កម្ពុជាមានភាពប្រសើរទៀត ក៏ជាផ្នែកមួយយ៉ាងសំខាន់ក្នុងការទាក់ទាញអ្នកវិនិយោគ ។
លោកបន្តថា ៖« ការកើនឡើងនូវប្រាក់ចំណូលរបស់ប្រជាពលរដ្ឋ និងការផ្លាស់ប្តូរឋានៈចេញពីប្រទេសក្រីក្រ មកកាន់ប្រទេសមានប្រាក់ចំណូលមធ្យមកម្រិតទាប បានក្លាយជាផ្នែកសំខាន់មួយក្នុងការទាក់ទាញអ្នកវិនិយោគផងដែរ » ៕
ចែករំលែកព័តមាននេះ