រាជធានីភ្នំពេញ ៖ ក្រុមហ៊ុនធានារ៉ាប់រង ហ្វតតេ (កម្ពុជា) ភីអិលស៊ី ដែលជាក្រុមហ៊ុនធានារ៉ាប់រងឈានមុខគេនៅកម្ពុជា បានបោះជំហានដំបូងក្នុងការពង្រីកការវិនិយោគក្នុងតំបន់របស់ខ្លួនតាមរយៈការទិញយកភាគហ៊ុនក្រុមហ៊ុនធានារ៉ាប់រង Tokojaya Assurance…
រាជធានីភ្នំពេញ ៖ ក្រុមហ៊ុនធានារ៉ាប់រង ហ្វតតេ (កម្ពុជា) ភីអិលស៊ី ដែលជាក្រុមហ៊ុនធានារ៉ាប់រងឈានមុខគេនៅកម្ពុជា បានបោះជំហានដំបូងក្នុងការពង្រីកការវិនិយោគក្នុងតំបន់របស់ខ្លួនតាមរយៈការទិញយកភាគហ៊ុនក្រុមហ៊ុនធានារ៉ាប់រង Tokojaya Assurance អិលធីឌី ដែលជាក្រុមហ៊ុនធានារ៉ាប់រងដ៏ធំមួយរបស់ប្រទេសឡាវ ក្នុងគោលបំណងបង្កើនទីផ្សារធានារ៉ាប់រងរបស់ប្រទេសនេះ។
ពិធីប្រកាសទិញភាគហ៊ុននេះ ត្រូវបានរៀបចំឡើងនៅថ្ងៃទី៩ ខែមីនា ឆ្នាំ២០១៨ នៅរដ្ឋធានីវៀងច័ន្ទ នៃប្រទេសឡាវ ដោយមានវត្តមានអគ្គនាយកក្រុមហ៊ុនធានារ៉ាប់រងទាំងពីរ គឺលោក Charles Cheo អគ្គនាយកក្រុមហ៊ុន ហ្វតតេ និងលោក Kong Hock Sian ស្ថាបនិកក្រុមហ៊ុនធានារ៉ាប់រង Toko Assurance។
ក្នុងពិធីនោះ លោក Cheo បានមានប្រសាសន៍ថា៖ «យើងពិតជាមានមោទនភាព និងមានកិត្តិយសក្នុងការវិនិយោគលើក្រុមហ៊ុនធានារ៉ាប់រង Toko Assurance ដែលជាក្រុមហ៊ុនធានារ៉ាប់រងទទួលបានការគោរព និងជឿជាក់នៅក្នុងប្រទេសឡាវ និងមានតួនាទីយ៉ាងសំខាន់ក្នុងការលើកកម្ពស់វិស័យធានារ៉ាប់រងរបស់ប្រទេសនេះ។ គោលបំណងនៃការវិនិយោគនេះ គឺសាមញ្ញណាស់។ ក្រុមហ៊ុនធានារ៉ាប់រង ហ្វតតេ សម្លឹងមើលលើការជំរុញវិស័យធានារ៉ាប់រងនៅក្នុងប្រទេសឡាវ ក៏ដូចជាបង្កើន និងពង្រឹងវត្តមានក្នុងទីផ្សារដែលមានលក្ខណៈស្រដៀងទៅនឹងជោគជ័យដែលយើងបាន ឆ្លងកាត់នៅកម្ពុជា»។ លោក Cheo បានបន្ថែមទៀតថា ក្រុមហ៊ុនធានារ៉ាប់រង ហ្វតតេ បានជ្រើសយកប្រទេសឡាវជាក្រុមហ៊ុនដំបូងរបស់គាត់នៅក្នុងតំបន់ ខណៈដែលប្រទេសទាំងពីរមានវប្បធម៌ស្រដៀងគ្នា និងស្ថិតនៅដំណាក់កាលអភិវឌ្ឍន៍ដូចគ្នា។
លោក Cheo ថ្លែងបន្ត ៖ «វិស័យធានារ៉ាប់រងនៅក្នុងប្រទេសទាំងពីរក៏ស្ថិតនៅក្នុងដំណាក់កាលដូចគ្នាដែរ ដែលមានទាំងការប្រកួតប្រជែង និងឱកាស។ ទោះយ៉ាងណាយើងមានទំនុកចិត្តថានឹងអាចបង្កើតភាពជោគជ័យថ្មីនៅក្នុងប្រទេសឡាវនេះ ក៏ដូចជាបង្កើនការយល់ដឹង និងការធានារ៉ាប់រងនៅក្នុងប្រទេសនេះ»។ នៅឆ្នាំ ២០១៧ ក្រុមហ៊ុនធានារ៉ាប់រង ហ្វតតេ បានរក្សាតំណែងរបស់ខ្លួន ១៥ឆ្នាំជាប់ៗគ្នា ក្នុងនាមជាក្រុមហ៊ុនធានារ៉ាប់រងឈានមុខគេនៅកម្ពុជា។ ក្រុមហ៊ុនធានារ៉ាប់រងដែលទទួលបានពានរង្វាន់នេះបានដំណើរការនៅកម្ពុជាឆ្នាំ១៩៩៨ ហើយបច្ចុប្បន្នគ្រប់គ្រងទីផ្សារធានារ៉ាប់រង ដល់ទៅ៤៦% ដោយសារការផ្តល់ជូនសេវាធានារ៉ាប់រងប្រកបដោយភាពច្នៃប្រឌិត និងគុណតម្លៃតាមតម្រូវការអតិថិជន ជាលក្ខណៈបុគ្គលនិងលក្ខណៈក្រុមហ៊ុន។
លោក Cheo បានបន្ថែមទៀតថា៖ «ការពង្រីកអាជីវកម្មរបស់យើងនៅក្នុងទីផ្សារដែលកំពុងមានសន្ទុះ ដូចជាប្រទេសឡាវ គឺស្ថិតនៅក្នុងយុទ្ធសាស្ត្រផែនការយូរអង្វែងរបស់ ហ្វតតេ ក្នុងការបង្កើត និងពង្រឹងការយកចិត្តទុកដាក់ក្នុងតំបន់របស់យើង»។
លោក Kong Hock Sian អគ្គនាយកក្រុមហ៊ុនធានារ៉ាប់រង Toko Assurance បាននិយាយថា៖ «ការទិញយកនេះ នឹងពង្រឹងកេរ្តិ៍ឈ្មោះរបស់ក្រុមហ៊ុនដែលបានទទួលស្គាល់ថា បានផ្តល់ជូនសេវាធានារ៉ាប់រងដែលមានគុណតម្លៃកំពូលសម្រាប់អតិថិជន និងមានទំនាក់ទំនងអន្តរជាតិ និងក្នុងតំបន់ ព្រមទាំងមានក្រុមអ្នកជំនាញដែលមានការប្តេជ្ញាខ្ពស់ក្នុងការផ្តល់ជូននូវផលិតផលដែលគាប់ប្រសើរ។
លោកក៏បន្ថែមទៀតថា៖ «ការទិញយកភាគហ៊ុននេះ នឹងបង្ហាញឲ្យឃើញថា ក្រុមហ៊ុនធានារ៉ាប់រង ហ្វតតេ និង Toko Assurance រួមបញ្ចូលគ្នាបង្កើតមរតករួមជាមួយនឹងចក្ខុវិស័យ ក៏ដូចជាបទពិសោធន៍ ការប្តេជ្ញាចិត្ត និងយុទ្ធសាស្ត្ររបស់យើង ដើម្បីនាំមកនូវភាពល្អប្រសើរថ្មី»។ យើងមានសុទិដ្ឋិនិយមថា មុខមាត់ថ្មីរបស់ក្រុមហ៊ុនធានារ៉ាប់រង Toko នឹងបន្តបំពេញតម្រូវការអតិថិជនរបស់យើង និងកំណត់ជំហរជាអ្នកដើរតួសំខាន់នៅក្នុងវិស័យធានារ៉ាប់រងក្នុងតំបន់។
ចូលរួមក្នុងពិធីនោះ លោកស្រី ហោ សុវឌ្ឍនា អនុប្រធាននាយកដ្ឋានធានារ៉ាប់រង និងសោធននៃក្រសួងសេដ្ឋកិច្ច និងហិរញ្ញវត្ថុកម្ពុជាបានចូលរួមអបអរសាទរដល់ក្រុមហ៊ុនធានារ៉ាប់រង ហ្វតតេ ចំពោះសមិទ្ធផលថ្មី ជំហានថ្មីលើទឹកដីប្រទេសឡាវ។ ហ្វតតេ គឺជាក្រុមហ៊ុនធានារ៉ាប់រងដំបូងបង្អស់នៅកម្ពុជា ដែលបានពង្រីកប្រតិបត្តិការរបស់ខ្លួននៅក្នុងប្រទេសជិតខាងរបស់យើង។
ឯកឧត្តមបណ្ឌិត Sonephet Inthavong អគ្គនាយករងនៃអគ្គនាយកដ្ឋានអភិវឌ្ឍន៍ក្រុមហ៊ុនរដ្ឋ និងធានារ៉ាប់រងនៃក្រសួងហិរញ្ញវត្ថុឡាវ បានសង្ខេបសុន្ទរកថារបស់លោកជាមួយនឹងការអបអរសាទរ និងការស្វាគមន៍ក្រុមហ៊ុន ហ្វតតេ ដែលមានវត្តមាននៅក្នុងប្រទេសឡាវ។ ជាមួយនឹងកំណើនក្រុមហ៊ុនធានារ៉ាប់រងជាច្រើន ការរីកចម្រើន និងការអភិវឌ្ឍថ្មីលើវិស័យនេះ គឺនៅចំពោះមុខយើង។ ប្រការសំខាន់គឺយើងត្រូវត្រៀមខ្លួនដើម្បីទទួលយកការផ្លាស់ប្តូរ ដើម្បីជម្នះលើឧបសគ្គដែលគំរាមកំហែងដល់វិស័យនេះ។
ក្រុមហ៊ុនធានារ៉ាប់រង Toko Assurance បានចាប់ផ្តើមអាជីវកម្មនៅក្នុងខែឧសភា ឆ្នាំ ២០០៧ ក្រោមអាជ្ញាប័ណ្ណដែលបានផ្តល់ដោយគណៈកម្មាធិការផែនការ និងវិនិយោគរបស់ឡាវ (CPI)។ ក្រុមហ៊ុនធានារ៉ាប់រងនេះផ្តល់សេវាធានារ៉ាប់រងម៉ូតូ ផ្ទះ សុខភាព គ្រោះថ្នាក់ និងទំនប់វារីអគ្គិសនី ដែលបច្ចុប្បន្នមានបណ្តាញភ្នាក់ងារនៅតាមខេត្តទាំង ១៧ ក្នុងប្រទេសឡាវ៕
ចែករំលែកព័តមាននេះ