រដ្ឋធានីវ៉ាស៊ីនតោន ៖ បើទោះជាប្រទេសចិនបានគំរាមកំហែង បន្ទាប់ពីសហរដ្ឋអាមេរិកមានគម្រោងដាក់ពន្ធលើផលិតផលចិនប្រមាណ៦០ប៊ីលានដុល្លារក្តី ប៉ុន្តែរដ្ឋមន្ត្រីពាណិជ្ជកម្មអាមេរិក លោក Steve Mnuchin បាននិយាយកាលពីថ្ងៃអាទិត្យថា លោកប្រធានាធិបតីអាមេរិក…
រដ្ឋធានីវ៉ាស៊ីនតោន ៖ បើទោះជាប្រទេសចិនបានគំរាមកំហែង បន្ទាប់ពីសហរដ្ឋអាមេរិកមានគម្រោងដាក់ពន្ធលើផលិតផលចិនប្រមាណ៦០ប៊ីលានដុល្លារក្តី ប៉ុន្តែរដ្ឋមន្ត្រីពាណិជ្ជកម្មអាមេរិក លោក Steve Mnuchin បាននិយាយកាលពីថ្ងៃអាទិត្យថា លោកប្រធានាធិបតីអាមេរិក ដូណាល់ ត្រាំ នឹងមិនដកថយទេ ហើយក៏មិនព្រួយបារម្ភពីសង្គ្រាមពាណិជ្ជកម្មដែរ ។
លោកបាននិយាយកាលពីថ្ងៃអាទិត្យថា ៖«យើងនឹងបន្តគម្រោងដាក់ពន្ធរបស់យើង ហើយកំពុងតែធ្វើការអនុម័តវា ។ ដូចដែលលោកប្រធានាធិបតីត្រាំ បាននិយាយហើយ គឺយើងមិនខ្លាចសង្គ្រាមពាណិជ្ជកម្មទេ ប៉ុន្តែវាក៏មិនមែនជាគោលដៅរបស់យើងដែរ » ។
ការភ័យខ្លាចថា នឹងមានសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិន បានទាញទម្លាក់តម្លៃភាគហ៊ុននៅសហរដ្ឋអាមេរិក ។
លោកត្រាំ បានចុះហត្ថលេខាលើអនុស្សរណៈកាលពីសប្តាហ៍មុន ដើម្បីដាក់ពន្ធលើផលិតផលនាំចូលពីប្រទេសចិនប្រមាណ៦០ប៊ីលានដុល្លារ ព្រោះលោកអះអាងថា ប្រទេសចិនបានល្មើសនឹងសិទ្ធិកម្មសិទ្ធិបញ្ញាអាមេរិក ។
លោកត្រាំ បានផ្តល់ពេលប្រមាណ៦០ថ្ងៃឲ្យក្រសួងពាណិជ្ជកម្មបង្កើតយុទ្ធសាស្ត្រទប់ស្កាត់ការវិនិយោគ គឺទប់ស្កាត់មិនឲ្យក្រុមហ៊ុន និងមូលនិធិចិនទិញក្រុមហ៊ុនមានបច្ចេកវិទ្យាសំខាន់ៗរបស់អាមេរិក ។
លោក Mnuchin បន្តថា លោកជឿជាក់ថា សហរដ្ឋអាមេរិកអាចសម្រេចបានកិច្ចព្រមព្រៀងជាមួយប្រទេសចិនលើបញ្ហាមួយចំនួន ប៉ុន្តែការដាក់ពន្ធនឹងមិនអាចផ្អាកឡើយ លុះត្រាតែយើងមានការព្រមព្រៀងដែលអាចទទួលយកបាន ។
ប្រទេសចិនបានជំរុញឲ្យសហរដ្ឋអាមេរិកដកថយ និងគំរាមថា ខ្លួននឹងសងសឹកវិញ ដោយដាក់ពន្ធលើផលិតផលនាំចេញពីអាមេរិកផងដែរ ។
ក្រសួងពាណិជ្ជកម្មចិននិយាយថា រដ្ឋាភិបាលបានពិចារណាដាក់ពន្ធប្រមាណ២៥%លើសាច់ជ្រូករបស់អាមេរិក ៕
ចែករំលែកព័តមាននេះ