រាជធានីភ្នំពេញ ៖ ខណៈផលិតកម្ម ល្បីៗ ផលិតបទចម្រៀងវ៉ុលចូលឆ្នាំបែបញ័រញាក់តម្រូវតាមយុវវ័យ តារាចម្រៀងអ្នកនាងឈួន សុវណ្ណឆៃ តាំងជំហរផលិតបទថ្មីចេញលើទីផ្សារជាទម្រង់សិល្បៈខ្មែរ ។
នេះជាបទចម្រៀងទី២ហើយដែលឃើញ តារាចម្រៀងឈួន សុវណ្ណឆៃ និងខាត់ សុឃីម បានរួមគ្នាអភិរក្សមរតកបទចម្រៀង សម័យដើមបែបប្រពៃណីជាតិ ។ បទ«សារា វ៉ាន់ជុំញាតិ»ជាទម្រង់ភ្លេងខ្មែរត្រូវតារាចម្រៀង ឈួន សុវណ្ណឆៃ ច្រៀងផ្ទាល់ដើម្បីបម្រើប្រិយមិត្តអ្នកស្តាប់មិនថាទីក្រុង ឬទីជនបទបានជុំគ្នាលើកដៃឡើងរាំបទប្រពៃណីជាតិខ្មែរក្នុងឱកាសឆ្នាំថ្មីអំណរថ្មី ។
ឈួន សុវណ្ណឆៃ និយាយថា «បើទោះនាងមមាញឹកជាមួយការងារសិល្បៈ និងមើលថែទាំកូនក៏នាងបានចំណាយពេលវេលា និងប្រាក់ផ្ទាល់ខ្លួនផលិតចម្រៀងមួយបទ«សារាវ៉ាន់ជុំញាតិ»ក្រោមការសហការជាមួយគ្រូ ជំនាញៗ មួយចំនួន ក្នុងន័យបំពេញចំណូលចិត្តពុកម៉ែបងប្អូនយើងតាមភូមិស្រុកបានរាំលេងកម្សាន្ត។ ចង្វាក់បទប្រពៃណីខ្មែរយើងគឺ ល្អណាស់ បើយើងរាំគ្នាគាំទ្រ ហើយបទរបស់នាងខ្ញុំគ្រោងចេញជិតចូលឆ្នាំឯណោះ តែដល់ឃើញ ប្រទេសជិតខាងគេចង់ដាក់បទគេ ចង្វាក់គេជាសម្បត្តិពិភពលោកក៏សម្រេចចេញមុនឲ្យ ហើយក្នុងន័យឲ្យគេដឹង ។ លើសពីនាងខ្ញុំក៏ គ្រោងថតជាMV សម្រាប់ពង្រីកទីផ្សារបទ ចម្រៀងរបស់នាងខ្ញុំកាន់តែផុសផុលឡើង »។
ចំណែកការបង្ហាញវត្តមាននៅលើខ្សែភាពយន្តវិញ អ្នកនាងឈួន សុវណ្ណឆៃ ធ្លាប់សម្តែងរឿងភាគ២ទៅ៣រឿង ហើយយល់ថាអាជីពសម្តែងភាពយន្តមិនស្រួលនោះទេ គឺប្រមូលយកទេពកោសល្យខ្ពស់ណាស់ ។ នាងនៅតែព្យាយាមជាពិសេសស្នាដៃរឿង «ពស់កេងកង» ដឹកនាំដោយលោកហ្វៃ សំអាង នាងរំពឹងថា ក្រោយបញ្ចាំងនៅលើកញ្ចក់ទូរទស្សន៍ហង្សមាសពិតជាមានការគាំទ្រនូវស្នាដៃកូនខ្មែរ ក៏ដូចជាស្នាដៃរបស់នាងដែលជាតារាចម្រៀងមកសម្តែងជាតួភាពយន្ត ។ ក្នុងនាមអ្នកសិល្បៈយូរឆ្នាំនាងចេះតែប្រឹងប្រែងរកវិធី ប្លែកៗ ដូចជាក្រៅពីសម្តែងជាទម្រង់រឿងខ្មែរបុរាណ នាងឆ្លៀតយកពេលទំនេរហ្វឹកហាត់របាំជួលគ្រូចំណាយប្រាក់ហាត់រៀនដើម្បីសិល្បៈជាអត្តសញ្ញាណជាតិ ។ របាំដែលនាងហាត់មានរបាំជូនពរ នារីជាជួរ នាងទេពមច្ឆា ទាំងអស់នេះជាសមិទ្ឋផលថ្មីដែលនាងនឹងយករាំតាមឆាកតន្ត្រីនានាលើកញ្ចក់ទូរទស្សន៍ ៕
ចែករំលែកព័តមាននេះ