មីស៊ីលជាច្រើនគ្រាប់បា.ញ់ទៅលើអារ៉ាប៊ី សាអ៊ូឌីត
ប្រទេសអារ៉ាប៊ី សាអ៊ូឌីត ៖ ទីភ្នាក់ងារព័ត៌មាន SPA រាយការណ៍នាថ្ងៃទី២៥ មីនា ថា ក្រុមចម្រុះនាំមុខដោយអារ៉ាប៊ី សាអ៊ូឌីត…
ប្រទេសអារ៉ាប៊ី សាអ៊ូឌីត ៖ ទីភ្នាក់ងារព័ត៌មាន SPA រាយការណ៍នាថ្ងៃទី២៥ មីនា ថា ក្រុមចម្រុះនាំមុខដោយអារ៉ាប៊ី សាអ៊ូឌីត អះអាងថា ពួកជីវពលហ៊ូធី យេម៉ែន បានបាញ់មីស៊ីលច្រើនគ្រាប់សំដៅអារ៉ាប៊ី សាអ៊ូឌីត បណ្តាលឱ្យស្លាប់មនុស្សម្នាក់មានសញ្ជាតិអេហ្ស៊ីប នៅរាជធានីរីយ៉ាដ ។
អ្នកនាំពាក្យម្នាក់របស់ក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត អះអាងថា ការបាញ់មីស៊ីលទាំងនេះធ្វើឡើងនាយប់ថ្ងៃទី២៥ មីនា ក៏បណ្តាលឱ្យមនុស្ស២នាក់ទៀតសញ្ជាតិអេហ្ស៊ីបរស់នៅក្នុងទីក្រុងរីយ៉ាដរងរបួសផងដែរ ។ អ្នកនាំពាក្យវរសេនីយ៍ឯក TURKI AL MALKI បញ្ជាក់ថា មនុស្ស៣នាក់រងគ្រោះដោយសារការធ្លាក់បំណែកនានា។
មុននេះបន្តិចទូរទស្សន៍រដ្ឋអារ៉ាប៊ី សាអ៊ូឌីត រាយការណ៍ថា កងការពារអាកាសអារ៉ាប៊ី សាអ៊ូឌីត បានស្ទាក់កម្ទេចមីស៊ីល១គ្រាប់ពីលើភាគឦសាននៃទីក្រុងរីយ៉ាដ ។ បណ្តាអ្នកកាសែតរបស់រ៉យទ័រមានវត្តមាននៅទីក្រុងរីយ៉ាដស្តាប់ឮការផ្ទុះជាច្រើន ហើយឃើញដុំផ្សែងនានានៅលើអាកាសមុនពាក់កណ្តាលយប់ ។ សាក្សីម្នាក់និយាយថា បានឃើញដុំភ្លើងយ៉ាងវែងមួយបន្ទាប់ឮស្នូរផ្ទុះ ។
ចំណែកទីភ្នាក់ងារព័ត៌មានយេម៉ែន SABA ស្ថិតក្រោមការត្រួតត្រារបស់ពួកឧទ្ទាមហ៊ូធីរាយការណ៍ថា មីស៊ីលធុន BURKAN H2 ត្រូវបានពួកហ៊ូធីបាញ់សំដៅព្រលានយន្តហោះអន្តរជាតិ ROI KHALED នៃទីក្រុងរីយ៉ាដ ។ SABA បន្តថា ពួកហ៊ូធីបានបាញ់មីស៊ីលប្រភេទផ្សេងៗទៀត ប្រឆាំងព្រលានយន្តហោះនៃទីក្រុង៣នាភាគខាងត្បូងអារ៉ាប៊ី សាអ៊ូឌីត គឺក្រុង ABHA ក្រុង DJIZAN និងក្រុង NAJRAN ។
អារ៉ាប៊ី សាអ៊ូឌីត ជាប្រមុខក្រុមចម្រុះអារ៉ាប់ ដែលកំពុងតែធ្វើអន្តរាគមន៍យោធាប្រឆាំងពួកហ៊ូធីជាពួកជីវពលស៊ីអ៊ីតស្និទ្ធអ៊ីរ៉ង់ ។ ពួកឧទ្ទាមនេះកាន់កាប់ត្រួតត្រារដ្ឋធានីសាណា និងមួយផ្នែកធំនៃប្រទេស ៕
ចែករំលែកព័តមាននេះ