ខេត្តកំពត ៖ បើតាមការថ្លែងឲ្យដឹងពីឯកឧត្តម ជាវ តាយ អភិបាលនៃគណអភិបាលខេត្តកំពត កាលពីរសៀលថ្ងៃទី២៦ ខែមីនា ឆ្នាំ២០១៨ ក្នុងពិធីក្រុងពាលីបួងសួងសុំសេចក្តីសុខ…
ខេត្តកំពត ៖ បើតាមការថ្លែងឲ្យដឹងពីឯកឧត្តម ជាវ តាយ អភិបាលនៃគណអភិបាលខេត្តកំពត កាលពីរសៀលថ្ងៃទី២៦ ខែមីនា ឆ្នាំ២០១៨ ក្នុងពិធីក្រុងពាលីបួងសួងសុំសេចក្តីសុខ អបអរសាទរកំពតសង្ក្រាន្ត ដែលធ្វើឡើងនៅលើបរិវេណឆ្នេរព្រែកកំពត បានឲ្យដឹងថា កំពតសង្ក្រានដែលរៀបចំឡើងរយៈពេលបីថ្ងៃ គឺចាប់ពីថ្ងៃទី១៤ ,១៥ ,១៦ ខែមេសា ឆ្នាំ២០១៨ខាងមុខនេះ ។
រដ្ឋបាលខេត្តគ្រោង នឹងចំណាយថវិកាប្រមាណ១០ម៉ឺនដុល្លារ ដើម្បីផ្តល់ភាពសប្បាយរីករាយជូនប្រជាពលរដ្ឋក្នុងខេត្តកំពតរយៈពេលសង្ក្រាន្តបីថ្ងៃ និងដើម្បីបង្កើនការទាក់ទាញភ្ញៀវទេសចរឲ្យចូលមកលេងកម្សាន្តកាន់តែច្រើនថែមទៀតនាឱកាសសង្ក្រាន្តបីថ្ងៃនេះ ។
លោកអភិបាលខេត្តបានបញ្ជាក់នាពេលនេះផងដែរថា រដ្ឋបាលខេត្តបានគ្រោងឲ្យមានការប្រគុំតន្ត្រីរបស់ក្រុមសិល្បៈស្ថានីយទូរទស្សន៍បាយ័នបីថ្ងៃពេញ ដែលក្នុងនោះលោកជំទាវ ហ៊ុន ម៉ាណា អគ្គនាយិការបស់ស្ថានីយទូរទស្សន៍បាយ័នបានចូលរួមបដិភាគមួយចំនួនផងដែរ ។ លោកអភិបាលខេត្តបានថ្លែងឲ្យដឹងទៀតថា ដើម្បីធ្វើឲ្យកម្មវិធីសង្ក្រាន្តនៅកំពតឆ្នាំនេះ មានភាពទាក់ទាញភ្ញៀវឲ្យបានច្រើន លោកសង្ឃឹមថា មន្ត្រីរាជការ កងកម្លាំង លោកយាយ លោកតា ប្រជាពលរដ្ឋ យុវជន សិស្ស និស្សិត ចូលរួមទាំងអស់គ្នា ដើម្បីធ្វើឲ្យកម្មវិធីសង្ក្រាន្តរបស់យើង ប្រព្រឹត្តទៅដោយជោគជ័យមានផ្លែផ្កា ជាវិជ្ជមានដូចតាមការរំពឹងទុក ។
លោកបន្តថា ផ្តើមចេញពីរបបពលពតដែរគួរឲ្យសង្វែក រហូតដល់សព្វថ្ងៃនេះ យើងទាំងអស់គ្នាទទួលបានភាពសប្បាយរីករាយ និងមានការអភិវឌ្ឍលើគ្រប់វិស័យដោយសារ ប្រទេសមានសុខសន្តិភាពពេញបរិបូណ៍ ដូច្នេះយើងត្រូវតែខំការពារ និងថែរក្សាបន្តទៀតទាំងអស់គ្នា ។
ជាក់ស្តែងដោយមានការឯកភាព និងរួមគ្នាជាធ្លុងមួយ រដ្ឋបាលខេត្តបានសម្រេចរៀបចំកំពតសង្ក្រាន្ត ២០១៨ នេះឡើង ដោយគ្រោងនឹងចំណាយថវិការប្រមាណ១០ម៉ឺនដុល្លារ ដើម្បីរៀបចំកម្មវិធី ជាពិសេសទាក់ទាញភ្ញៀវទេសចរឲ្យមកកម្សាន្តខេត្តកំពតកាន់តែច្រើនឡើង ។
ឯកឧត្តមអភិបាលខេត្តបានបញ្ជាក់ថា ការប្រគុំតន្ត្រី របស់ក្រុមសិល្បៈទូរទស្សន៍បាយ័ន រយៈពេលបីថ្ងៃ គឺថ្ងៃទី ១៤, ១៥,១៦ ខែមេសានោះ ក្រុមតន្ត្រីត្រូវចាយថវិកាមួយថ្ងៃ ១ម៉ឺន៥ពាន់ដុល្លារ ប៉ុន្តែក្នុងនោះក៏មានការចូលរួម ចំណែកបដិភាគមួយចំនួនផងដែរ ពីលោកជំទាវ ហ៊ុន ម៉ាណា អគ្គនាយិការបស់ស្ថានីយ៍ទូរទ័ស្សបាយ័ន ។ លោកថា ការចំណាយនៅមានច្រើនទៀត ទៅលើយុវជនដែលបានចូលរួមក្នុងកម្មវិធីកំពតសង្ក្រាន្ត ដោយរដ្ឋបាលខេត្តជួយឧបត្ថម្ភ ទាំងការហូបចុក ការស្នាក់នៅ និងចំណាយផ្សេងៗទៀត ។
លោកអភិបាលខេត្តជឿជាក់ថា អ្វីដែលរដ្ឋបាលខេត្ត មន្ទីរ និងអង្គភាពជុំវិញខេត្តបាននឹងកំពុងធ្វើ ដើម្បីសាមគ្គីភាពផ្ទៃក្នុងល្អ បង្កឲ្យមានការរីកចម្រើន និងអភិវឌ្ឍន៍ខេត្តកំពតនោះ នៅពេលខាងមុខដ៏ខ្លីខេត្តកំពតនឹងមិនមានអ្វីដែលធ្វើឲ្យយើងមានការព្រួយបារម្ភនូវបញ្ហាអ្វីទៀតនោះឡើយ ពោល គឺមានសុខសន្តិភាព និងការអភិវឌ្ឍន៍កាន់តែរីកចម្រើនទៅមុខជាលំដាប់ ៕
ចែករំលែកព័តមាននេះ