ខេត្តបន្ទាយមានជ័យ ៖ មនុស្ស៣នាក់បានស្លាប់ និង៣នាក់ផ្សេងទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរកើតឡើងរវាងរថយន្តម៉ាកហាយឡែនឌ័របុកជាមួយរថយន្តម៉ាកកាម៉ារី ។ ហេតុការណ៍នេះបានកើតឡើងនៅវេលាម៉ោង១០និង១៥នាទីព្រឹក ថ្ងៃទី២៦ ខែមីនា ឆ្នាំ២០១៨…
ខេត្តបន្ទាយមានជ័យ ៖ មនុស្ស៣នាក់បានស្លាប់ និង៣នាក់ផ្សេងទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរកើតឡើងរវាងរថយន្តម៉ាកហាយឡែនឌ័របុកជាមួយរថយន្តម៉ាកកាម៉ារី ។ ហេតុការណ៍នេះបានកើតឡើងនៅវេលាម៉ោង១០និង១៥នាទីព្រឹក ថ្ងៃទី២៦ ខែមីនា ឆ្នាំ២០១៨ នៅលើផ្លូវជាតិលេខ៥៨ (ផ្លូវកៅស៊ូក្រវាត់ព្រំដែន) ចម្ងាយប្រហែល១៥០ម៉ែត្រ ចំណុចខាងកើតស្ពានអាងក្តិបថ្ម ស្ថិតក្នុងភូមិក្តិបថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ត្រី អ៊ុយ ផល្លី អធិការរង ទទួលផ្នែកសណ្តាប់ធ្នាប់ចរាចរណ៍ នៃអធិការដ្ឋាននគរបាលស្រុកថ្មពួក បានឲ្យដឹងថា អ្នកបើកបររថយន្ត Camry ឈ្មោះ ឆាយ សារិន ភេទប្រុស អាយុ៤២ឆ្នាំ របួសធ្ងន់ ត្រូវបានយកទៅសង្គ្រោះនៅប្រទេសថៃ បើកបរម្នាក់ឯង ។ ចំណែករថយន្ត Highlander មានដឹកមនុស្សសរុប៦នាក់ ក្នុងនោះរបួសធ្ងន់៣នាក់ និងស្លាប់៣នាក់ (ស្រី២នាក់ និងក្មេង១នាក់) ។ អ្នកស្លាប់ និងអ្នករងរបួសមានឈ្មោះ ១.ឈ្មោះ សៀង សារិន ភេទស្រី អាយុ៦០ឆ្នាំ (ស្លាប់), ២.ឈ្មោះ សៀន ដើង ភេទស្រី អាយុ៥៨ឆ្នាំ (ស្លាប់), ៣.ឈ្មោះ សន មករាពេជ្ររ៉ាក់ ភេទប្រុស អាយុ៧ឆ្នាំ (ស្លាប់), ៤.ឈ្មោះ សឿន សាម៉េត ភេទប្រុស អាយុ៥៣ឆ្នាំ អ្នកបើកបររបួសធ្ងន់នៅប៉ោយប៉ែត, ៥.ឈ្មោះ ហ៊ុយ ឈា ភេទប្រុស អាយុ៦០ឆ្នាំ របួសធ្ងន់ស្លាប់នៅមន្ទីពេទ្យថ្មពួក, ៦.ឈ្មោះ សន បញ្ញារិទ្ធ អាយុ៣ឆ្នាំ របួសធ្ងន់ ។ អ្នកស្លាប់ និងរបួសក្រៅពីអ្នកបើករថយន្តគឺមានទីលំនៅភូមិចំការលួង ឃុំចំការលួង ស្រុកកំពុងសិលា ខេត្តកំពង់សោម ។
លោកអធិការរងបានបញ្ជាក់ថា តាមការសាកសួរព័ត៌មានពីអ្នករងរបួស បានប្រាប់សមត្ថកិច្ចថា ពួកគាត់មានស្រុកកំណើតនៅភូមិចំការលួង ឃុំចំការលួង ស្រុកកំពុងសិលា ខេត្តកំពង់សោម នៅថ្ងៃជិតចូលឆ្នាំបាននាំក្រុមគ្រួសារ និងកូនចៅៗមកលេងប្អូនឈ្មោះ សឿន សាម៉េត អ្នកបើករថយន្ត នៅក្រុងប៉ោយប៉ែត ហើយប្អូនបាននាំគ្នាដើលេងតាមផ្លូវបន្ទាត់ព្រំដែនក៏ជួបបញ្ហាគ្រោះថ្នាក់នេះតែម្តង ។
លោកវរសេនីយ៍ត្រី អ៊ុយ ផល្លី បានបញ្ជាក់ទៀតថា យោងតាមសម្ដីអ្នកបានឃើញហេតុការណ៍នោះ ប្រាប់សមត្ថកិច្ចថា កត្តាបង្កឲ្យកើតមានគ្រោះថ្នាក់ចរាចរនេះ បណ្ដាលមកពីអ្នកបើកបររថយន្ត Highlander បានបើកក្នុងទិសដៅពីត្បូងទៅជើង មានល្បឿនលឿនចំណុចផ្លូវកោង ហើយបានជ្រុលចង្កូតទៅរក Camry ទើបបណ្ដាលឲ្យរថយន្ត Camry បុកចំពាក់កណ្ដាលរថយន្ត Highlander ធ្លាក់ក្រឡាប់ពីលើផ្លូវ មានអ្នកស្លាប់ និងរបួសតែម្តង ។ ចំពោះអ្នករបួសត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកថ្មពួក រថយន្តទាំង២គ្រឿងយកទៅរក្សាទុកនៅអធិការដ្ឋាននគរបាលស្រុក ចំណែកសពជនរងគ្រោះបានឲ្យក្រុមគ្រួសារយកទៅចាត់ចែងធ្វើបុណ្យតាមប្រណៃណី ៕
ចែករំលែកព័តមាននេះ