រាជធានីភ្នំពេញ ៖ សមត្ថកិច្ចចំរុះរាជធានីភ្នំពេញដឹកនាំដោយលោកព្រះរាជអាជ្ញារងសាលាដំបូងរាជធានីនាវេលាម៉ោង១២ និង២០នាទីរំលងអធ្រាត្រថ្ងៃទី១៦ មីនា បានឆ្មក់ចូលបន្ទប់ផ្ទះសំណាក់យីហោ សម្បត្តិទិព្វ ក្នុងភូមិដើមអំពិល សង្កាត់ច្បារអំពៅទី១ ខណ្ឌមានជ័យបង្ក្រាបក្រុមអ្នកជួញដូរគ្រឿងញៀនដែលជួលទីតាំងនោះធ្វើសកម្មភាពចែកចាយ ។
ប្រតិបត្តិការនេះ សមត្ថកិច្ចឃាត់ខ្លួនមេខ្លោងជួញដូរថ្នាំញៀន២នាក់ ព្រមទាំងដកហូតថ្នាំញៀនមួយចំនួនធំ (ជាង១គីឡូក្រាម) និងប្រាក់ជាង២ម៉ឺនដុល្លារ។ ជនទាំងពីរនាក់នោះឈ្មោះលឹម ចន្ថា អាយុ៤២ឆ្នាំ និងម្នាក់ទៀតឈ្មោះទូច វាសនា អាយុ២៨ឆ្នាំ ពួកគេស្នាក់នៅចល័តតាមសណ្ឋាគារ ឬផ្ទះសំណាក់។ វត្ថុតាងពាក់ព័ន្ធបទល្មើសជួញដូរថ្នាំញៀន រួមមានប្រាក់ចំនួន២៤.០៩៤ដុល្លារ និង១.៨១៧.០០០រៀល ម៉ាទឹកកកចំនួន១២កញ្ចប់ ថ្នាំគ្រាប់ពណ៌ផ្កាឈូកចំនួន៨កញ្ចប់ ស្មើនិង១.៦០០គ្រាប់ អាវុធខ្លីម៉ាកប្រាហា១ដើម និងឧបករណ៍ប្រើប្រាស់ និងជញ្ជីងថ្លឹងថ្នាំញៀនមួយចំនួនទៀត។
វត្ថុតាង និងជនសង្ស័យទាំង២នាក់នោះសមត្ថកិច្ចបាននាំទៅទីបញ្ជាការកងរាជអាវុធហត្ថរាជធានីភ្នំពេញដើម្បីចាត់ការតាមផ្លូវច្បាប់។ ក្រៅពីវត្ថុតាងទាំងនោះសមត្ថកិច្ចដកហូតរថយន្តរបស់ជនសង្ស័យទាំង២នាក់ដែលជិះទៅកាន់ផ្ទះសំណាក់សម្បត្តិទិព្វដើម្បីដោះដូរគ្នាយកប្រាក់ និងទទួលថ្នាំញៀនផងដែរ។ រថយន្តចំនួន២គ្រឿងនោះមួយគ្រឿងម៉ាកកាមរីឆ្លាម និងមួយគ្រឿងទៀតម៉ាកសេលីកា។ លោកពៅ ហួត ចៅសង្កាត់ច្បារអំពៅទី១ឱ្យដឹងថា ការបង្ក្រាបមុខសញ្ញាជួញដូរថ្នាំញៀននេះមានកិច្ចសហការល្អពីម្ចាស់ផ្ទះសំណាក់ បន្ទាប់ពីមានការផ្សព្វផ្សាយពីគោលនយោបាយភូមិ-សង្កាត់មានសុវត្ថិភាព ។
ដោយឡែកនៅក្នុងភូមិសាស្ត្រខណ្ឌចំការមនវិញ សមត្ថកិច្ចនគរបាលប៉ុស្តិ៍ទំនប់ទឹកដឹកនាំដោយលោកអនុសេនីយ៍ទោ មីុ ប៊ុនរិន ប្រធាននគរបាលប៉ុស្តិ៍បានចាប់ប្រមូលក្រុមអ្នកប្រើប្រាស់ និងចែកចាយថ្នាំញៀនចំនួន៣នាក់នៅភូមិផ្អេរ សង្កាត់ទំនប់ទឹក កាលពីរសៀលថ្ងៃទី១៤ មីនា ឆ្នាំ២០១១ ដោយដកហូតថ្នាំញៀនមួយថង់តូច។ ប្រតិបត្តិការបោសសំអាតក្រុមអ្នកជួញដូរ និងប្រើប្រាស់ថ្នាំញៀននេះ ប្រជាពលរដ្ឋរស់នៅភូមិផ្អេរ និងនៅសង្កាត់ទំនប់ទឹកបានអបអរសាទរដោយយល់ថា នេះជាការរួមចំណែកធ្វើឱ្យភូមិ-សង្កាត់មានសុវត្ថិភាព ៕
ចែករំលែកព័តមាននេះ