រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាទៅប៉ូលិសឲ្យចាត់វិធានការដកហូតទូរស័ព្ទដៃពីលោក ម៉ាជ សុវណ្ណារ៉ា មន្ត្រីជាន់ខ្ពស់មួយរូបរបស់អតីតគណបក្សសង្គ្រោះជាតិ ដែលកំពុងជាប់ឃុំឃាំងនៅពន្ធនាគារព្រៃស ។
សម្តេចតេជោនាយករដ្ឋមន្ត្រី ហ៊ុន សែន ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យអាស៊ីអឺរ៉ុបចំនួន២,១២៥នាក់ បានបញ្ជាឲ្យដកហូតទូរស័ព្ទជាបន្ទាន់ ហើយបានបន្ទោសទៅប៉ូលិស និងប្រធានគុកព្រៃស ដែលបណ្តែតបណ្តោយឲ្យអ្នកទោសប្រើប្រាស់ទូរស័ព្ទតេរាល់ថ្ងៃ ។ សម្តេចតេជោដាក់បញ្ជាថា ៖ «ឥឡូវបញ្ជាប៉ូលិសឲ្យដកទូរស័ព្ទពី មាជ សុវណ្ណារ៉ា […] ។ ហើយម៉េចទុកឲ្យម៉ាជ សុវណ្ណារ៉ា ប្រើប្រាស់ទូរស័ព្ទ ?» […] បើមេគុកគ្រប់គ្រងមិនបាន ដកមេគុកចេញ ។ ម៉េចបណ្តោយឲ្យ ម៉ាជ សុវណ្ណារ៉ា តេទូរស័ព្ទរាល់ថ្ងៃ» ។
ក្រោយបទបញ្ជាភ្លាមៗ មន្ត្រីប៉ូលិសបានរាយការណ៍ជូនសម្តេចថា បានដកហូតហើយ សម្តេចក៏បានផ្តាំទៅម៉ាជ សុវណ្ណារ៉ា «ជាប់ឥតមានថ្ងៃចេញទេ» ព្រោះមេរបស់គាត់ គឺលោកសម រង្ស៊ី ព្រហើនខ្លាំងពេក ។
សម្តេចនាយករដ្ឋមន្ត្រីក៏បានបញ្ជាក់ថា ពួកមន្ត្រីបកប្រឆាំងរួមទាំងមេដឹកនាំរបស់គេបន្តភូតកុហកមិនឈប់អស់ពីថា សម្តេចនឹងត្រូវអាស៊ាន និងអូស្ត្រាលីគាប់សង្កត់ ឥឡូវបែរជាប្រកាសថា ជប៉ុននឹងអន្តរាគមន៍គៀបសង្កត់រាជរដ្ឋាភិបាលទៀតផង ។ សម្តេចបានបញ្ជាក់ថា ជប៉ុនធ្វើតម្រូវតាមប្រជាជនជាង១៥លាននាក់ មិនមែនមនុស្សប៉ុន្មាននាក់របស់លោកសម រង្ស៊ីទេ ។ សម្តេចក៏បានដាក់ចេញនូវរូបមន្ត២មិន១មាន ដែលមានន័យថា «អត់ចរចា អត់លើកលែងទោស មានការបោះឆ្នោត» ។
សម្តេចបញ្ជាក់ថ្មីថា «គ្មានការចរចាជាមួយអស់លោកឯងទេ ផ្លូវច្បាប់គ្មានសិទ្ធឲ្យុខ្ញុំចរចារទេ ។ សិទ្ធស្របច្បាប់មានតែចុះហត្ថលេខាទៅព្រះមហាក្សត្រ ដើម្បីលើកលែងឲ្យអ្នកដែលជាប់គុកដោយសាលដីកាតុលាការស្ថាពរ» ៕
ចែករំលែកព័តមាននេះ