ខេត្តកំពត ៖ កម្លាំងសមត្ថកិច្ចអន្តរាគមឈុតខ្មៅរបស់ស្នងការខេត្តដោយមានការចង្អុលបញ្ជាពីលោកឧត្តមសេនីយទោ ម៉ៅ ចន្ទ័មធុរិទ្ធ ស្នងការខេត្ត និងមានការសម្រួលនីតិវិធីពីលោកបណ្ឌិត ឯក ឆេងហ៊ួត ព្រះរាជអាជ្ញាអមសាលាដំបូងខេត្តដឹកនាំដោយលោកវរសេនីយទោ លក ញ៉ាវ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកាលពីវេលាម៉ោង០២និង៣០នាទីរសៀល ថ្ងៃទី២៦ ខែមីនា ឆ្នាំ២០១៨ បានចុះពិនិត្យក្រុមដឹកសម្ភារមកដាក់តាំងលក់ថ្ងៃតាំងពិពណ៌ខាងមុខ ក៏បានប្រទះឃើញក្រុមលួចបន្លំលក់សម្ភារបង្កប់ដោយគ្រឿងញៀន ហើយបានឃាត់នាំរថយន្តមកកាន់ស្នងការខេត្តដើម្បីពិនិត្យ និងឆែកឆេរ សមត្ថកិច្ចបានរកឃើញថ្នាំញៀនប្រភេទម្សៅក្រាមម៉ាទឹកកកចំនួន៦៦កញ្ចប់តូច ។ ក្រោយពីឆែកឆេរឃើញសមត្ថកិច្ចក៏បានឃាត់ខ្លួនជនសង្ស័យប្រុសស្រីចំនួន៥នាក់ដើម្បីធ្វើការសាកសួរ ។
លោកវរសេនីយទោ លក ញ៉ាវ បានឲ្យដឹងថា ជនសង្ស័យដែលសមត្ថកិច្ចឃាត់ខ្លួនទាំង៥នាក់មាន ទី១-ឈ្មោះ ចាន់ ភារម្យ ភេទប្រុស អាយុ២២ឆ្នាំ នៅភូមិដើមស្លែង សង្កាត់ច្បារអំពៅ ខណ្ឌមានជ័យ រាជធានីភ្នំពេញ, ទី២-ឈ្មោះ ខាន់ ណារ៉ា ភេទប្រុស អាយុ១៦ឆ្នាំ នៅភូមិដើមស្លែង សង្កាត់ច្បារមន ខណ្ឌមានជ័យ រាជធានីភ្នំពេញ, ទី៣-ឈ្មោះ ឆេ ណូ ភេទប្រុស អាយុ២១ឆ្នាំ នៅភូមិតាហែន ឃុំក្តុលលើ ស្រុកកំរៀង ខេត្តបាត់ដំបង, ទី៤-ឈ្មោះ ស លាងហ៊ន ភេទស្រី អាយុ២២ឆ្នាំ នៅភូមិក្បាលដំរីលើ ឃុំក្បាលដំរីលើ ស្រុកកោះធំ ខេត្តកណ្តាល និងទី៥-ឈ្មោះ មុំ ម៉ី ភេទស្រី អាយុ២២ឆ្នាំ នៅភូមិដើមស្លែង សង្កាត់ច្បារមន ខណ្ឌមានជ័យ រាជធានីភ្នំពេញ ។
ជនសង្ស័យកំពុងត្រូវបានសមត្ថកិច្ចនាំទៅសាកសួរនៅការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ