សហរដ្ឋអាមេរិក-កូរ៉េខាងជើង ៖ វិមានប្រធានាធិបតីកូរ៉េខាងត្បូងរាយការណ៍កាលពីថ្ងៃទី២៥ កុម្ភៈ ថា គណៈប្រតិភូជាន់ខ្ពស់កូរ៉េខាងជើងមកចូលរួមក្នុងពិធីបិទការប្រកួតកីឡា អូឡាំពិករដូវរងានៅ PYEONGCHANG បានសម្តែងពីឆន្ទៈរបស់ប្រទេសខ្លួនចាប់ផ្តើមការចរចាជាមួយសហរដ្ឋអាមេរិក ។…
សហរដ្ឋអាមេរិក-កូរ៉េខាងជើង ៖ វិមានប្រធានាធិបតីកូរ៉េខាងត្បូងរាយការណ៍កាលពីថ្ងៃទី២៥ កុម្ភៈ ថា គណៈប្រតិភូជាន់ខ្ពស់កូរ៉េខាងជើងមកចូលរួមក្នុងពិធីបិទការប្រកួតកីឡា
អូឡាំពិករដូវរងានៅ PYEONGCHANG បានសម្តែងពីឆន្ទៈរបស់ប្រទេសខ្លួនចាប់ផ្តើមការចរចាជាមួយសហរដ្ឋអាមេរិក ។
ក្នុងសេចក្តីប្រកាសមួយវិមានប្រធានាធិបតីអះអាងថា ក្រុងព្យុងយ៉ាងបង្ហាញពីឆន្ទៈនោះ
ប្រាប់ដល់ប្រធានាធិបតីកូរ៉េខាងត្បូង លោក MOON JAE IN ពេលជួបពិភាក្សាគ្នាជាសម្ងាត់រយៈពេលជិត១ម៉ោងរវាងរូបលោក និងគណៈប្រតិភូកូរ៉េខាងជើង ។
គណៈប្រតិភូនេះអះអាងប្រាប់ដល់លោក MOON ថា ក្រុងព្យុងយ៉ាងប្តេជ្ញាចិត្តចាប់ផ្តើមការចរចាជាមួយក្រុងវ៉ាស៊ីនតោន ហើយយល់ស្របតាមទស្សនៈរបស់លោក MOON ដែលថាទំនាក់ទំនងរវាងក្រុងព្យុងយ៉ាង និងក្រុងសេអ៊ូល ព្រមទាំងទំនាក់ទំនងរវាងក្រុងព្យុងយ៉ាង និងក្រុងវ៉ាស៊ីនតោនត្រូវតែមានការរីកចម្រើនដំណាលគ្នា ។
ទោះបីយ៉ាងណា ក្រសួងការបរទេសអាមេរិកគូសបញ្ជាក់នាថ្ងៃទី២៥ កុម្ភៈ ថា ដំណោះស្រាយមួយចំពោះបញ្ហាកម្មវិធីនុយក្លេអ៊ែររបស់កូរ៉េខាងជើងនៅតែជាលក្ខខណ្ឌជាមុនសម្រាប់រាល់ការកែលម្អទំនាក់ទំនងរវាងកូរ៉េខាងត្បូង និងកូរ៉េខាងជើង ។ ការបញ្ជាក់នេះធ្វើឡើងបន្ទាប់ពីគណៈប្រតិភូកូរ៉េខាងជើងមកចូលរួមក្នុងពិធីបិទការប្រកួតកីឡាអូឡាំពិករដូវរងាគូសបញ្ជាក់ថា ក្រុងព្យុងយ៉ាងបើកចំហចំពោះការចរចាជាមួយសហរដ្ឋអាមេរិក ។
អ្នកនាំពាក្យក្រសួងការបរទេសអាេមរិកនិយាយថា យើងទាក់ទងគ្នាយ៉ាងជិតស្និទ្ធជាមួយកូរ៉េខាងត្បូងទាក់ទិននឹងចម្លើយរួមរបស់យើងចំពោះកូរ៉េខាងជើង ។ ដូចការអះអាងរបស់លោក MOON ការកែលម្អទំនាក់ទំនងរវាងកូរ៉េខាងជើង និងកូរ៉េខាងត្បូងពុំអាចធ្វើដាច់ដោយឡែកពីដំណោះស្រាយមួយលើកម្មវិធីនុយក្លេអ៊ែរកូរ៉េខាងជើងឡើយ។
ចំពោះទណ្ឌកម្មថ្មីខ្លាំងបំផុតរបស់អាមេរិកប្រឆាំងខ្លួនកូរ៉េខាងជើងបានព្រមានកាលពីថ្ងៃទី២៥ កុម្ភៈ ពីវិធានការតបតវិញរបស់ខ្លួនផ្ទាល់ ប្រសិនបើការហ៊ុមព័ទ្ធសមុទ្រ ព្រមទាំងទណ្ឌកម្មឯទៀតៗត្រូវដាក់ដូចការប្រកាសកាលពីថ្ងៃទី២៣ កុម្ភៈ របស់ប្រធានាធិបតីអាមេរិកលោកដូណាល់ ត្រាំ ។
អ្នកនាំពាក្យក្រសួងការបរទេសកូរ៉េខាងជើងនិយាយថា លោកត្រាំ ប្រកាសពីទណ្ឌកម្មថ្មីៗ ជាពិសេសការហ៊ុមព័ទ្ធទាំងស្រុងពាណិជ្ជកម្មតាមផ្លូវសមុទ្ររបស់កូរ៉េខាងជើងជាមួយប្រទេសឯទៀត ៗ ។ កូរ៉េខាងជើងធ្លាប់ប្រកាសជាច្រើនលើកហើយថា ខ្លួនចាត់ទុកការហ៊ុមព័ទ្ធប្រភេទនេះថាជាអំពើនៃសង្គ្រាមមួយ ៕
ចែករំលែកព័តមាននេះ