ប្រទេសចិន ៖ សារព័ត៌មានចិនមួយរាយការណ៍នាថ្ងៃទី២៥ កុម្ភៈ ថា បក្សកុំមុយនីស្តចិនបានស្នើឱ្យលុបចោលការកម្រិតក្នុងរដ្ឋធម្មនុញ្ញប្រធានាធិបតីអាចកាន់តំណែងត្រឹម២អាណត្តិដែលបែបនេះនឹងបើកផ្លូវឱ្យមេដឹកនាំបច្ចុប្បន្ន លោកស៊ី ជីនពីង អាចកាន់អំណាចអស់មួយជីវិត ។
គណៈកម្មាធិការកណ្តាលបក្សកុំមុយនីស្តចិនរបៀបជាសភារបស់បក្សបានស្នើឱ្យលុបចេញពីរដ្ឋធម្មនុញ្ញចិននូវមាត្រាដែលចែងថា ប្រធានាធិបតីមួយរូបពុំអាចកាន់តំណែងលើសពីរអាណត្តិជាប់ៗគ្នា ដែលមួយអាណត្តិមានរយៈពេល៥ឆ្នាំឡើយ ។ លោកស៊ី ជីន
ពីង ឡើងធ្វើប្រធានាធិបតីចិនចាប់តាំងពីឆ្នាំ២០១៣មកដោយតាមធម្មតាត្រូវចាកចេញពីតំណែងក្នុងឆ្នាំ២០២៣ ។
យោងតាមទីភ្នាក់ងារព័ត៌មានចិនស៊ីនហួថា គណៈកម្មាធិការកណ្តាលបក្សកុំមុយនីស្តចិន ក៏ស្នើផងដែរបញ្ចូលគំនិតលោកស៊ី ជីនពីងទៅក្នុងរដ្ឋធម្មនុញ្ញរបស់ប្រទេស ។
រាល់សំណើទាំងនេះត្រូវដាក់ជូនសភាប្រជាជនចិនអនុម័តនាសម័យប្រជុំពេញអង្គប្រចាំឆ្នាំដែលត្រូវបើកធ្វើនាថ្ងៃទី៥ មីនា ខាងមុខនេះ ។
ក្នុងឱកាសនៃសមាជិកលើក១៩របស់បក្សកុំមុយនីស្តចិនដែលប្រព្រឹត្តទៅកាលពីខែតុលា ឆ្នាំ២០១៧ លោកស៊ី ជីនពីង ទទួលបានរួចហើយការបញ្ចូលគំនិតលោកស្តីពីលទ្ធិសង្គមនិយមតាមបែបចិននៃសករាជថ្មីទៅក្នុងលក្ខន្តិកៈរបស់បក្ស ដែលនោះជាកិត្តិយសដ៏ឧត្តមផ្តល់ជូនមេដឹកនាំមួយរូបដែលនៅរស់រានមានជីវិតធ្លាប់តែប្រគល់ម្តងគត់ដល់លោកប្រធានម៉ៅ សេទុង ស្ថាបនិករបបកុំមុយនីស្តចិនកាលពីឆ្នាំ១៩៤៩ ។
ចាប់តាំងពីឡើងកាន់តំណែងប្រមុខបក្សពីដំណាច់ឆ្នាំ២០១២មក លោកស៊ី ជីនពីង បាន
ប្រមូលផ្តុំអំណាចដែលគ្មានមេដឹកនាំចិនណាមួយរូបធ្លាប់ធ្វើឡើយ ចាប់តាំងពីយ៉ាងតិច២៥ឆ្នាំមកនេះ ។ លោកសន្យាពីការតស៊ូប្រឆាំងអំពើពុករលួយដែលនាំឱ្យមន្ត្រីជាង១លាននាក់ទទួលទណ្ឌកម្មរួចហើយដែលបែបនេះនាំឱ្យអ្នកខ្លះគិតថា លោកប្រើមធ្យោបាយនោះដើម្បីកម្ចាត់រាល់អ្នកប្រឆាំងផ្ទៃក្នុង ។
លោក WILLY LAM ជាអ្នកសិក្សានយោបាយមួយរូបនៃសាកលវិទ្យាល័យចិនក្រុងហុងកុងព្យាករណ៍ថា ខ្ញុំគិតថា លោកស៊ី ជីនពីង នឹងក្លាយជាអធិរាជអស់មួយជីវិត ព្រមទាំងជាម៉ៅសេទុងនៃសតវត្សទី២១ ។ ប្រសិនបើសុខភាពលោកអំណោយផលលោកអាចស្ថិតនៅកាន់អំណាច២០ឆ្នាំ មានន័យថា រហូតដល់ឆ្នាំ២០៣២ ក្នុងឋានៈជាអគ្គលេខាបក្សកុំមុយនីស្តចិន និងរហូតដល់ឆ្នាំ២០៣៣ ក្នុងឋានៈជាប្រមុខរដ្ឋ ។ ក្នុងឆ្នាំ២០៣៣ លោកស៊ី ជីនពីង ពេលនោះនឹងមានអាយុ៨០ឆ្នាំ ៕
ចែករំលែកព័តមាននេះ