រដ្ឋធានីវ៉ាស៊ីនតោន ៖ លោកប្រធានាធិបតី ដូណាល់ ត្រាំ បាននិយាយថា សហរដ្ឋអាមេរិកជិតសម្រេចបានកិច្ចព្រមព្រៀងពាណិជ្ជកម្មជាមួយកូរ៉េខាងត្បូង ខណៈប្រទេសនេះព្យាយាមទទួលបានការរួចពន្ធ និងកំពុងតែដំណើរការចរចាលើការកែទម្រង់កិច្ចព្រមព្រៀងពាណិជ្ជកម្មទ្វេភាគី ។
លោកត្រាំ បាននិយាយនៅ White House កាលពីថ្ងៃសុក្រកន្លងមកថា កិច្ចព្រមព្រៀងអាមេរិកជាមួយប្រទេសកូរ៉េខាងត្បូង ជិតសម្រេចបានហើយ ។ លោកថា ៖« យើងជិតសម្រេចបានកិច្ចព្រមព្រៀងដ៏ល្អជាមួយសម្ព័ន្ធមិត្តរបស់យើងហើយ ។ វាធ្លាប់ជាកិច្ចព្រមព្រៀងដែលបង្កបញ្ហាជាច្រើនដល់ប្រទេសរបស់យើងក្នុងផ្នែកការងារ និងផ្នែកដទៃជាច្រើនទៀត » ។
រដ្ឋមន្ត្រីពាណិជ្ជកម្មអាមេរិក លោក Wilbur Ross បានបកស្រាយថា សហរដ្ឋអាមេរិកជិតសម្រេចបានការដោះស្រាយយ៉ាងទូលំទូលាយជាមួយកូរ៉េខាងត្បូង ។ លោកថា ៖ «ប្រសិនជាសម្រេចបាន វានឹងរួមមានផ្នែក២៣២ និងបញ្ហាពាណិជ្ជកម្មធំៗដទៃទៀត » ។
គួរបញ្ជាក់ថា ផ្នែក២៣២ គឺស្ថិតក្នុងច្បាប់ពង្រីកពាណិជ្ជកម្មឆ្នាំ១៩៦២ របស់សហរដ្ឋអាមេរិក ។ ផ្នែកនេះអនុញ្ញាតឲ្យប្រធានាធិបតីដាក់ពន្ធលើដែកថែបនិងអាលុយមីញ៉ូម ប្រសិនបើការនាំចូលគំរាមកំហែងដល់សន្តិសុខជាតិ ។
កូរ៉េខាងត្បូងស្ថិតក្នុងចំណោមសម្ព័ន្ធមិត្តរបស់អាមេរិកជាច្រើនទៀត ដែលត្រូវបានរួចផុតពីការដាក់ពន្ធ ។ សហរដ្ឋអាមេរិកអនុញ្ញាតឲ្យប្រទេសទាំងនេះរួចផុតពីពន្ធ ខណៈពួកគេបានចរចា ។
មន្ត្រីអាមេរិក និងកូរ៉េខាងត្បូងបានជួបគ្នានៅក្នុងខែនេះ ដើម្បីចរចាលើការកែទម្រង់កិច្ចព្រមព្រៀងពាណិជ្ជកម្មសេរី ។ មុនពេលចរចា លោកត្រាំ បានផ្តល់សញ្ញាថា លោកអាចនឹងដកទ័ពចេញពីប្រទេសកូរ៉េខាងត្បូង ប្រសិនបើកិច្ចព្រមព្រៀងពាណិជ្ជកម្មគ្មានលក្ខខណ្ឌល្អៗ ៕
ចែករំលែកព័តមាននេះ