ទីក្រុងបាងកក ៖ យោងតាមសភាពាណិជ្ជកម្មថៃបានឲ្យដឹងថា ច្រករបៀងសេដ្ឋកិច្ចខាងកើតរបស់ថៃអាចទទួលបានការវិនិយោគបន្ថែម ព្រោះវិនិយោគិនបរទេសបានកែប្រែទស្សនៈ បន្ទាប់ពីលោកប្រធានាធិបតីអាមេរិក ដូណាល់ ត្រាំ ប្រកាសពីការដាក់ពន្ធប្រមាណ៦០ប៊ីលានដុល្លារលើប្រទេសចិន ។
លោក Buntoon Wongseelachote អនុប្រធានផ្នែកចរចាពាណិជ្ជកម្មបរទេសប្រចាំសភានេះ និយាយថា នៅពេលប្រទេសចិនចូលក្នុងជម្លោះពាណិជ្ជកម្មជាមួយសហរដ្ឋអាមេរិក ក្រុមហ៊ុនផលិតជាច្រើនអាចនឹងបង្កើនការវិនិយោគក្នុងប្រទេសថៃ ។
រដ្ឋាភិបាលថៃកំពុងលើកតម្កើងគំនិតផ្តួចផ្តើមក្នុងច្រករបៀងសេដ្ឋកិច្ចខាងកើត ដើម្បីទាក់ទាញការវិនិយោគពីបរទេស ។
លោកនិយាយថា ៖« វិនិយោគិនអាចនឹងគិតថា ប្រទេសថៃកាន់តែមានភាពទាក់ទាញសម្រាប់ការវិនិយោគ ។ ជាមួយគ្នានេះ ប្រទេសវៀតណាម ម៉ាឡេស៊ី សិង្ហបុរី និងព្រុយណេ ក៏គ្មានភាពប្រកួតប្រជែងខ្លាំងជាងប្រទេសថៃដែរ នៅពេលកិច្ចព្រមព្រៀង TPP ថ្មីបានអនុម័តចោលសហរដ្ឋអាមេរិក » ។
ប៉ុន្តែលោកទទួលស្គាល់ថា ព្រោះតែមានខ្សែសង្វាក់ផលិតកម្មក្នុងប្រទេសចិន ថៃនឹងទទួលរងផលប៉ះពាល់ពីការដាក់ពន្ធរបស់សហរដ្ឋអាមេរិក ។
លោក Buntoon បន្តថា ការដាក់ពន្ធថ្មីអាចនឹងជំរុញឲ្យប្រទេសចិននាំចូលគ្រឿងអេឡិចត្រូនិកតិចជាងមុន ។
លោក Sompop Manarungsan ប្រធានគ្រប់គ្រងវិទ្យាស្ថាន Panyapiwat និយាយថា ការនាំចេញរបស់ថៃ អាចនឹងទទួលរងផលប៉ះពាល់ពីការសងសឹងគ្នារវាងប្រទេសសេដ្ឋកិច្ចធំៗទាំងពីរខាងលើ ព្រោះទង្វើទាំងនេះនឹងប៉ះពាល់ដល់ខ្សែសង្វាក់ពិភពលោកទាំងមូល ។
លោកព្យាករថា លោកត្រាំ អាចនឹងបន្តរឹតបន្តឹងវិធានការដើម្បីបង្កើនប្រជាប្រិយភាពក្នុងប្រទេសរបស់ខ្លួន និងបង្កើនសមត្ថភាពនាំចេញរបស់សហរដ្ឋអាមេរិកផងដែរ ។
រដ្ឋមន្ត្រីពាណិជ្ជកម្មថៃ លោកស្រី Chutima Bunyapraphasara បានថ្លែងកាលពីថ្ងៃសុក្រថា ក្រសួងនឹងបញ្ជាឲ្យការិយាល័យគោលនយោបាយ និងយុទ្ធសាស្ត្រពាណិជ្ជកម្ម
វាយតម្លៃលើផលប៉ះពាល់ និងប្រមូលព័ត៌មានដើម្បីចរចាជាមួយសហរដ្ឋអាមេរិក ៕
ចែករំលែកព័តមាននេះ